ការថតរូបរវាងថ្នាក់ដឹកនាំ CDC ជាមួយគណៈប្រតិភូខេត្ត Yunnan, CDC
កម្ពុជាស្នើឱ្យក្រុមវិនិយោគិនខេត្ត Yunnan នៃប្រទេសចិនពិចារណាពីការចូលមកបណ្តាក់ទុនផ្ទាល់នៅប្រទេសកម្ពុជា ជាពិសេសការវិនិយោគលើការកែច្នៃកសិផលសម្រាប់បំពេញតម្រូវការក្នុងស្រុក និងសម្រាប់នាំចេញ តាមរយៈការប្រើប្រាស់បច្ចេកវិទ្យាទំនើប និងមានតម្លៃបន្ថែមកាន់តែខ្ពស់។
សំណើនេះត្រូវបានលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា លើកឡើងក្នុងជំនួបជាមួយគណៈប្រតិភូក្រុមហ៊ុនវិនិយោគមកពីខេត្ត Yunnan ប្រទេសចិន ដែលដឹកនាំដោយលោក Liu Jie អនុប្រធានមន្ទីរពាណិជ្ជកម្មខេត្ត Yunnan នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី២៥ ខែកញ្ញា។ នេះបើតាមសេចក្តីប្រកាសព័ត៌មានរបស់ CDC។
លោក ជា វុទ្ធី បានលើកឡើងថា កម្ពុជាត្រូវបានគេចាត់ទុកជាប្រទេសដែលមានបរិយាកាស និងកាលានុវត្តភាពច្រើនសម្រាប់ការចូលមកវិនិយោគ ដោយប្រព័ន្ធច្បាប់ និងបទបញ្ញត្តិពាក់ព័ន្ធនឹងការវិនិយោគ គឺមានភាពបើកចំហ តម្លាភាព និងភាពអាចប៉ាន់ប្រមាណទុកជាមុនបាន រួមជាមួយនឹងកញ្ចប់លើកទឹកចិត្តជាច្រើនពីរាជរដ្ឋាភិបាល។
លោកបន្តថា ជាមួយគ្នានេះរដ្ឋាភិបាលនៃប្រទេសទាំងពីរ(កម្ពុជា-ចិន)ក៏បានសម្រេចបង្កើតនូវ“ច្រករបៀងឧស្សាហកម្ម និងបច្ចេកវិទ្យា” និង "ច្រករបៀងមច្ឆា និងអង្ករ” រួមគ្នាដើម្បីជំរុញបន្ថែមការអភិវឌ្ឍសង្គម-សេដ្ឋកិច្ច។
លោកបានថ្លែងថា៖«ជាការកត់សម្គាល់គឺកម្ពុជាទទួលបានកំណើនខ្ពស់នៃការវិនិយោគរបស់ចិនក្នុងរយៈពេលប៉ុន្មានទសវត្សរ៍ចុងក្រោយនេះ»។
លោកបន្ថែមថា៖«ខ្ញុំសូមជំរុញលើកទឹកចិត្តឱ្យក្រុមហ៊ុនគិតគូរពីការវិនិយោគកែច្នៃកសិផលកម្ពុជាសម្រាប់ផ្គត់ផ្គង់ដល់ទីផ្សារក្នុងស្រុក និងសម្រាប់នាំចេញ តាមរយៈការប្រើប្រាស់បច្ចេកវិទ្យាទំនើប និងមានតម្លៃបន្ថែមខ្ពស់»។
ប្រធានគណៈប្រតិភូពាណិជ្ជកម្មខេត្ត Yunnan លោក Liu Jie បាននិយាយថា ព័ត៌មានដែលលោក និងសហការីទទួលបានពីជំនួបនេះ នឹងក្លាយជាមូលដ្ឋានសម្រាប់ក្រុមហ៊ុនវិនិយោគនៅខេត្ត Yunnan ធ្វើការសម្រេចចិត្តវិនិយោគនៅកម្ពុជាទៅតាមវិស័យវិស័យរៀងៗខ្លួន។
លោកប្រាប់ទៀតថា ដំណើរទស្សនកិច្ចរបស់គណៈប្រតិភូខេត្ត Yunnan មកកម្ពុជាពេលនេះ ក៏មានបំណងចូលរួមជួយផ្សព្វផ្សាយ និងទាក់ទាញវិនិយោគិនចិន ពិសេសក្នុងខេត្ត Yunnan ឱ្យមកបណ្តាក់ទុននៅកម្ពុជាផងដែរ។
បើយោងតាម CDC សមាសភាពនៃក្រុមគណៈប្រតិភូនៃខេត្ត Yunnan រួមមានវិនិយោគិនក្នុងវិស័យជាច្រើនដូចជា ថាមពល, បច្ចេកវិទ្យាឌីជីថល, ពាណិជ្ជកម្មអេឡិចត្រូនិក, កសិកម្ម និងកសិ ឧស្សាហកម្ម, ផលិតកម្មម្ហូបអាហារ និងការផ្តល់សេវាប្រឹក្សាពាក់ព័ន្ធនឹងការវិនិយោគ។
ក្រៅពីជំនួបខាងលើ ក្នុងថ្ងៃទី២៥ ដដែលនេះ ថ្នាក់ដឹកនាំ CDC ក៏បានជួបពិភាក្សាជាមួយថ្នាក់ដឹកនាំក្រុមហ៊ុនមកពីប្រទេសចិនមួយចំនួនទៀតដូចជា ក្រុមហ៊ុន SICHUAN PAN-ASIA INVESTMENT CO., LTD ដែលមានជំនាញក្នុងវិស័យរ៉ែ ការសាងសង់ប្រព័ន្ធឡូជីស្ទីក វិស័យកសិកម្ម និងកសិ-ឧស្សាហកម្ម និងក្រុមហ៊ុន CGN Energy International Holdings Co., Limited. (CGNEI) ដែលមានជំនាញលើវិស័យថាមពលកកើតឡើងវិញ។
កាលពីឆ្នាំ២០២៣ លោក ជា វុទ្ធី ធ្លាប់បានលើកឡើងថា ដើម្បីសម្រួលដល់វិនិយោគិនចិន បច្ចុប្បន្ននៅក្រុមប្រឹក្សាអភិវឌ្ឍន៍កម្ពុជាក៏មានតុចិន (China Desk) សម្រាប់ផ្តល់ការប្រឹក្សាជូនវិនិយោគិនចិនផងដែរ។
សេដ្ឋវិទូនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នៅថ្ងៃទី២៦ ខែកញ្ញា ថា កិច្ចសហប្រតិបត្តិការល្អរវាងរដ្ឋាភិបាលកម្ពុជា-ចិន បានធ្វើឱ្យចរន្តនៃការចូលមកបណ្តាក់ទុន និងចំនួនទឹកប្រាក់នាំចេញ-នាំចូលទំនិញរវាងប្រទេសទាំង ២ បង្ហាញសញ្ញាវិជ្ជមានជាបន្តបន្ទាប់។
ប្រទេសចិន មានប្រជាជនច្រើន និងសេដ្ឋកិច្ចរីកលូតលាស់លឿន ដូច្នេះចំនួនវិនិយោគិនចិនដែលចេញទៅវិនិយោគក្រៅប្រទេស ពិសេសប្រទេសក្នុងតំបន់ ក៏កំពុងកើនឡើងដែរ។
លោកបានថ្លែងថា៖ «បច្ចុប្បន្ននៅកម្ពុជាមិនថាគម្រោងតូច ឬធំគឺភាគច្រើនមានការចូលរួមពីសំណាក់វិនិយោគិនចិន។ ចំនួននេះនឹងបន្តកើនឡើងថែមទៀតនៅពេលខាងមុខ ខណៈរដ្ឋាភិបាលកម្ពុជាបានខិតខំយ៉ាងខ្លាំងក្នុងការផ្សព្វផ្សាយ និងរៀបចំច្បាប់ថ្មីៗជាបន្តបន្ទាប់ដើម្បីទាក់ទាញវិនិយោគិនចម្រុះជាតិសាសន៍ឱ្យចូលមកបើកដំណើរអាជីវកម្មផ្ទាល់នៅកម្ពុជា»។
ទិន្នន័យពី CDC ឱ្យដឹងថា ក្នុងរយៈពេល ៦ ខែដើមឆ្នាំ ២០២៤ ប្រទេសចិន ឈរលើលំដាប់ទី២ ក្នុងនាមជាប្រទេសដែលមានវិនិយោគិនដាក់ទុនវិនិយោគនៅប្រទេសកម្ពុជាច្រើនជាងគេ បន្ទាប់ពីវិនិយោគិនកម្ពុជា។
សម្រាប់ស្ថិតិនាំចេញនាំចូលទំនិញរវាងកម្ពុជា-ចិន ដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា (GDCE) ឱ្យដឹងថា គិតពីខែមករា ដល់ខែសីហា ឆ្នាំ២០២៤ ការធ្វើពាណិជ្ជកម្មរវាងប្រទេសទាំង ២ មានទឹកប្រាក់សរុបជិត ១០,០៨ពាន់លានដុល្លារ កើនឡើង ២៤,៥ភាគរយ ក្នុងនោះទំនិញកម្ពុជានាំទៅចិនចំនួន ១,១៥ ពាន់លានដុល្លារ កើន ២២,៣ភាគរយ និងចិននាំមកវិញ ៨,៩៣ ពាន់លានដុល្លារ កើនឡើង ២៤,៨ ភាគរយ។ ប្រទេសចិនឈរនៅលើកំពូលតារាងនៃបណ្តាប្រទេសដែលមានទំនាក់ទំនងពាណិជ្ជកម្មជាមួយកម្ពុជា៕
