.jpg)
ចាប់ពីខែឧសភានេះ សម្បត្តិហ្វាយនែន ភីអិលស៊ី បានចាប់ផ្តើមផ្តល់កម្ចីឥណទានគាំពារក្នុងវិបត្តិជំងឺ កូវីដ១៩ ដោយមិនគិតការប្រាក់រយៈពេល ៣ ខែដល់ដៃគូបើកបរ និងនិយោជិតរបស់ក្រុមហ៊ុនដែលកំពុងចូលរួមក្នុងគម្រោងនេះ។
កម្មវិធីនេះមានគោលបំណងជួយកាត់បន្ថយការលំបាកផ្នែកហិរញ្ញវត្ថុដែលសហគមន៍បានជួបប្រទះ និងជាសក្ខីភាពនៃការប្តេជ្ញាចិត្តរបស់សម្បត្តិ ហ្វាយនែន ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាលក្នុងគ្រាដ៏លំបាកនេះ។
លោក Harvey Poh អគ្គនាយកប្រតិបត្តិរបស់សម្បត្តិ ហ្វាយនែន បានមានប្រសាសន៍ថា៖ «ដោយមើលឃើញពីការផ្ទុះឡើងនៃជំងឺកូវីដ១៩ កាលពីពេលថ្មីៗនេះដែលបានជះឥទ្ធិពលដល់ជីវភាពរស់នៅរបស់ប្រជាជនជាច្រើន នៅក្នុងរាជធានី-ភ្នំពេញ យើងមានក្តីសោមនស្សរីករាយសូមប្រកាសអំពីកម្មវិធីផ្តល់កម្ចីឥណទានគាំពារក្នុងវិបត្តិជំងឺ កូវីដ១៩ (Covid-19 Relief Loan Programme) សម្រាប់បុគ្គលិកជាដៃគូ CSR របស់យើងដែលបានចូលរួម»។
ដំណើរការដាក់ពាក្យស្នើសុំកម្ចីឥណទាននឹងបញ្ចប់នៅថ្ងៃទី ៣១ ខែសីហា ឆ្នាំ ២០២១។
សម្បត្តិ ហា្វយនែន សង្ឃឹមថាការចូលរួមវិភាគទានដល់សហគមន៍អាចលើកទឹកចិត្តដល់អង្គការដទៃទៀតឱ្យចូលរួមជាមួយស្ថាប័នមីក្រូហិរញ្ញវត្ថុក្នុងការផ្តល់ការគាំទ្រផ្នែកហិរញ្ញវត្ថុដល់ប្រជាជនដែលកំពុងជួបការលំបាក ដោយសារតែផលប៉ះពាល់នៃជំងឺរាតត្បាតដែលកំពុងកើតមាន។
«បច្ចុប្បន្ន យើងកំពុងទទួលបានការស្នើសុំកម្ចីឥណទានគាំពារក្នុងវិបត្តិកូវីដ១៩ នេះ។ ដោយមិនគិតការប្រាក់រយៈពេល ៣ ខែដល់ដៃគូបើកបរ និងនិយោជិតរបស់ក្រុមហ៊ុនដែលកំពុងចូលរួមក្នុងគម្រោងនេះ ដោយប្រើប្រាស់កម្មវិធីសេវាកម្មហិរញ្ញវត្ថុឌីជីថលរបស់យើង ហើយប្រសិនបើអនុម័តយល់ព្រម កម្ចីឥណទាននឹងត្រូវបានបញ្ចូលទៅក្នុងគណនីរបស់អ្នកនៅថ្ងៃបន្ទាប់នៃថ្ងៃធ្វើការ»។
«យើងសូមជម្រាបថា រាល់ព័ត៌មានដែលត្រូវការសម្រាប់ការដាក់ពាក្យស្នើសុំកម្ចី ត្រូវតែបញ្ជូនមកតាមរយៈបណ្តាញទំនាក់ទំនងសង្គមរបស់យើង ដូចជា តេឡេក្រាម ឬហ្វេសប៊ុកដោយមិនចាំបាច់មកជួបមុខដោយផ្ទាល់នោះទេ»។
លោក Harvey Poh មានប្រសាសន៍បន្ថែមថា៖ «យើងក៏កំពុងស្ថិតក្នុងដំណើរការចាប់ដៃគូ CSR បន្ថែមទៀត ដើម្បីឱ្យបានទៅដល់ប្រជាជនកាន់តែច្រើនដែលរងផលប៉ះពាល់ដោយជំងឺកូវីដ១៩ ហើយអ្នកដែលមានចំណាប់អារម្មណ៍អាចទាក់ទងមកយើងបាន»។
សម្រាប់ព័ត៌មានបន្ថែម សូមទាក់ទងមកសម្បត្តិ ហា្វយនែន តាមរយៈទូរស័ព្ទលេខ ០២៣ ៩៩ ៧៧ ២២ ឬ ០៩៣ ៩៩ ៧៧ ២២ ចាប់ពីម៉ោង ៨ ព្រឹក ដល់ម៉ោង ៥ ល្ងាច ពីថ្ងៃចន្ទ ដល់ថ្ងៃអាទិត្យ៕ រូបភាព សហការី
