.jpg)
លោកស្រីការី ឡាម ថ្លែងក្នុងអំឡុងសន្និសីទកាសែតនៅការិយាល័យរដ្ឋាភិបាលក្នុងទីក្រុងហុងកុងកាលពីថ្ងៃទី២១ មិថុនា។ AFP
លោកស្រី ការី ឡាម ប្រមុខប្រតិបត្តិតំបន់រដ្ឋបាលហុងកុងបានលើកឡើងថា យុទ្ធសាស្ត្ររបស់ហុងកុងក្នុងការពង្រឹងតួនាទីជាមជ្ឈមណ្ឌលហិរញ្ញវត្ថុពិភពលោកគឺ តាមរយៈការធ្វើសមាហរណកម្មយ៉ាងជិតស្និទ្ធជាមួយចិនដីគោក។ នេះបើតាមការសម្រង់សម្ដីរបស់លោកស្រីនៅក្នុងវេទិកាហិរញ្ញវត្ថុមួយ ដោយសារព័ត៌មានរ៉យទ័រ។
ជាមួយគ្នានេះដែរ លោកស្រីក៏បានបញ្ជាក់ថា រដ្ឋាភិបាលរដ្ឋធានីប៉េកាំងរួមចំណែកយ៉ាងសំខាន់ក្នុងការពង្រឹងសន្តិសុខរបស់ហុងកុង តាមរយៈការអនុម័តច្បាប់សន្តិសុខជាតិកាលពីឆ្នាំ ២០២០ ក៏ដូចជាការស្ដារសន្តិសុខ និងស្ថិរភាពហុងកុង ក្រោយពីផ្ទុះការតវ៉ាកាលពីឆ្នាំ ២០១៩។ លោកស្រី ការី ឡាម យល់ថា សកម្មភាពរបស់រដ្ឋាភិបាលកណ្ដាលចិនធ្វើឱ្យការអនុវត្តប្រព័ន្ធគ្រប់គ្រង «ប្រទេស ១ ប្រព័ន្ធ ២» បានយ៉ាងរលូន ដែលជំរុញឱ្យមានការអភិវឌ្ឍកាន់តែជឿនលឿននៅហុងកុង។
ហុងកុងអាចដើរតួនាទីសំខាន់ក្នុងការលើកកម្ពស់ការអភិវឌ្ឍហិរញ្ញវត្ថុចិន ដោយរាប់បញ្ចូលទាំង ការសម្របសម្រួលក្នុងការប្រើប្រាស់រូបិយប័ណ្ណយន់របស់ចិននៅលើឆាកអន្តរជាតិ ជួយទ្រទ្រង់ផ្នែកហិរញ្ញវត្ថុក្រុមហ៊ុននៅចិនដីគោក ក៏ដូចជាផ្ដល់ជាកន្លែងសុវត្ថិភាពក្នុងការរក្សារូបិយប័ណ្ណរបស់ចិន។
ប្រមុខហុងកុងវ័យ ៦៤ ឆ្នាំរូបនេះ បានបន្ថែមថា ហុងកុងត្រៀមខ្លួនជាស្រេចឆ្លើយតបនឹងឱកាស ដែលបង្កើតឡើងដោយផែនការរបស់ចិនក្នុងការធ្វើសមាហរណកម្មហុងកុង ម៉ាកាវ និងតំបន់អភិវឌ្ឍន៍ក្វាងតុង៕
ហ៊ីម រដ្ឋា
