ក្រសួងសុខាភិបាលសិង្ហបុរីបានឱ្យដឹងកាលពីថ្ងៃចន្ទថា ខ្លួនកំពុងស៊ើបអង្កេតករណីក្មេងជំទង់ម្នាក់ អាយុ ១៦ ឆ្នាំ ដែលបានស្លាប់ ដោយសារជំងឺសាច់ដុំកន្ត្រាក់ឈាមបេះដូង (cardiac arrest) ក្រោយពីយុវជន នេះ បានលើកដុំដែក ៦ ថ្ងៃ បន្ទាប់ពីការចាក់វ៉ាក់សាំងកូវីដ ១៩ ហើយ។
ប្រភពដដែលបានឱ្យដឹងថា ករណីនេះ ត្រូវបានរាយការណ៍ដោយមន្ទីរពេទ្យ Khoo Teck Puat Hospital កាលពីថ្ងៃទី ៣ ខែកក្កដា កន្លងទៅ។ យុវជនជំទង់នេះ ត្រូវបានគេយកទៅព្យាបាលនៅមន្ទីរពេទ្យនេះ ក្រោយពីគេរកឃើញយុវជនរូបនេះ ដួសសន្លប់នៅផ្ទះ នៅព្រឹកបន្ទាប់ពីការលើកទម្ងន់ដុំដែកនៅឯកន្លែងហាត់ប្រាណ។ ក្រោយមកទៀត គេក៏បានបញ្ជូនរូបគាត់ទៅមន្ទីរពេទ្យសាកលវិទ្យាល័យជាតិ (NUH) ជាកន្លែងដែលគាត់ កំពុងស្ថិតក្នុងស្ថានភាពកាន់តែធ្ងន់ធ្ងរឡើង។
ក្រសួងសុខាភិបាល បាននិយាយថា ក្មេងជំទង់នេះ បានទទួលវ៉ាក់សាំង Pfizer-BioNTech/Comirnaty ដូសទី១ កាលពីថ្ងៃទី ២៧ ខែមិថុនា។ យុវជនរូបនេះ ត្រូវបានបុគ្គលិកថែទាំសុខភាពណែនាំឱ្យសម្រាករយៈពេល ៣០ នាទី ដើម្បីសង្កេតមើលប្រតិកម្មរបស់វ៉ាក់សាំងមុននឹងអនុញ្ញាតឱ្យត្រឡប់ទៅផ្ទះវិញ។ ក្រសួងបានបន្តថា គាត់មានសុខភាពល្អធម្មតាអំឡុងពេល ៥ ថ្ងៃបន្ទាប់ពីចាក់វ៉ាក់សាំង។
ក្រសួងបានឱ្យដឹងថា៖ «មុនពេល យុវជនរូបនេះ ដួលសន្លប់នៅថ្ងៃទី ៣ ខែកក្កដា គាត់បានទៅលើកទម្ងន់នៅឯកន្លែងហាត់ប្រាណ។ ពួកយើងយល់ថា គាត់ហ្វឹកហាត់ជាមួយទម្ងន់ធ្ងន់ដែលលើសទម្ងន់របស់គាត់»។
«យើងកំពុងទាក់ទងជាមួយក្រុមគ្រូពេទ្យនៅមន្ទីរពេទ្យ NUH ដែលកំពុងផ្តល់ការព្យាបាលយ៉ាងជិតស្និទ្ធដល់អ្នកជំងឺ។ ការធ្វើរោគវិនិច្ឆ័យបឋមនៃស្ថានភាពរបស់គាត់គឺត្រូវបានគេសន្និដ្ឋានថា ជាករណីសាច់ដុំកន្ត្រាក់ឈាមបេះដូង (cardiac arrest) ក្រៅមន្ទីរពេទ្យ។ ការធ្វើតេស្តគ្លីនិក និងមន្ទីរពិសោធន៍ កំពុងដំណើរការជាបន្តបន្ទាប់ ដើម្បីស្វែងយល់ពីមូលហេតុមូលដ្ឋាន»។ ក្រសួងបានឱ្យដឹងដូច្នេះ។
ក្រសួងបានបន្តថា៖ «យើងក៏នឹងធ្វើការជាមួយក្រុមគ្រូពេទ្យនៅមន្ទីរពេទ្យ NUH បន្តទៀត ដើម្បីកំណត់ថា តើបញ្ហានេះអាចទាក់ទងនឹងការចាក់វ៉ាក់សាំងកូវីដ របស់គាត់ដែរឬទេ? នេះនឹងរួមបញ្ចូលទាំងការពិចារណាយ៉ាងហ្មត់ចត់ថា តើមានជំងឺរលាកសាច់ដុំបេះដូងធ្ងន់ធ្ងរដែលជាការរលាកធ្ងន់ធ្ងរនៃសាច់ដុំបេះដូង ដែលប៉ះពាល់ដល់មុខងារបេះដូង គឺជាហេតុបង្កឱ្យគាត់ស្លាប់ឬយ៉ាងណា?»
គណៈកម្មាធិការជំនាញស្តីពីវ៉ាក់សាំងកូវីដ ១៩ នឹងតាមដានលទ្ធផលនៃការស៊ើបអង្កេតនេះ។ ទន្ទឹមនេះ បន្ទាប់ពីការពិនិត្យមើលទិន្នន័យក្នុង និងក្រៅគណៈកម្មាធិការនិងអាជ្ញាធរវិទ្យាសាស្ត្រសុខាភិបាល (HSA) បានណែនាំកាលពីថ្ងៃចន្ទថា ប្រជាជនគួរតែចៀសវាងការហាត់ប្រាណខ្លាំងពេក បន្ទាប់ពីទទួលវ៉ាក់សាំងរួច។
នេះគឺជាការធ្វើបច្ចុប្បន្នភាពចុងក្រោយពីការផ្តល់យោបល់ពីមុនរបស់គណៈកម្មាធិការនៅថ្ងៃទី ១១ ខែមិថុនា ដែលបានណែនាំថា អ្នកដែលចាក់វ៉ាក់សាំងគួរតែចៀសវាងការហាត់ប្រាណខ្លាំងពេក ក្នុងរយៈពេល ១ សប្តាហ៍ បន្ទាប់ពីការចាក់វ៉ាក់សាំងនៅដូសទី២។
គណៈកម្មាធិការដដែលនេះ បានឱ្យដឹងដែរថា កាលពីថ្ងៃទី ៣០ ខែមិថុនា អាជ្ញាធរHSA បានទទួលរបាយការណ៍ស្ដីអំពីករណីរលាកសាច់ដុំបេះដូង និងរលាកស្រោមបេះដូង សួត ចំនួន ១២ ករណី ដែលកើតឡើង ចំពោះអ្នកដែលទទួលវ៉ាក់សាំងរួច។
មានចំនួន៥ ករណីក្នុងចំណោមករណីសរុបខាងលើ កើតឡើងចំពោះមនុស្សពេញវ័យដែលមានអាយុ ចាប់ពី ៣០ ឆ្នាំឡើងទៅខណៈករណីចំនួន ៧ ទៀត កើតឡើងចំពោះបុរសដែលមានអាយុក្រោម ៣០ ឆ្នាំដែលគណៈកម្មាធិការ បានកត់សម្គាល់ឃើញថា មានចំនួនខ្ពស់ជាងការរំពឹងទុកសម្រាប់ក្រុមអាយុនេះ ដោយផ្អែកលើអត្រានៃការកើតមានជាយថាហេតុ។
អាជ្ញាធរHSAបាននិយាយនៅក្នុងសេចក្តីថ្លែងការណ៍ដាច់ដោយឡែកទី៣ថា ខណៈពេលករណីជាងពាក់កណ្តាលដែលបានរាយការណ៍កើតឡើងបន្ទាប់ពីការចាក់វ៉ាក់សាំងដូសទី២ យើងទទួលបានរបាយការណ៍ចំនួន ៦ ករណី ដែលបានកើតឡើង បន្ទាប់ពីចាក់វ៉ាក់សាំងលើកដំបូង។ ដោយឡែក បើក្រឡេកមើល ប្រសិទ្ធភាពវ៉ាក់សាំងលើប្រជាជនក្រុមក្មេងវ័យ ពោលគឺមានប្រតិកម្មល្អក្នុងការព្យាបាល ហើយបានជាសះ ស្បើយ ឬក៏ធូរស្បើយពីមន្ទីរពេទ្យដូចធម្មតា។
តែទោះជាយ៉ាងណា គណៈកម្មាធិការរំឭថា ខណៈពេលនេះ ករណីរលាកសាច់ដុំបេះដូង អាចក្លាយទៅជាករណីធ្ងន់ធ្ងរ ដោយសារកត្តាឬសកម្មភាពណា ដែលចំណាយថាមពលខ្លាំង អាចប៉ះពាល់ដល់ ចង្វាក់បេះដូង។ ប្រភពដដែលបានបន្ថែមថា ចំពោះបុគ្គលណា ដែលត្រូវបានគេរកឃើញថា មានជំងឺរលាកសាច់ដុំបេះដូងបន្ទាប់ពីបានចាក់វ៉ាក់សាំងប្រភេទmRNA បុគ្គលទាំងនោះ មិនគួរទទួលយកវ៉ាក់សាំងដូសទី២ ទៀតទេ។
អាជ្ញាធរដដែលបានឱ្យដឹងថា ក្នុងចំណោមវ៉ាក់សាំង ៥ ៤៧០ ៤២៥ ដូស ដែលបានចែកចាយកាលពីថ្ងៃទី ៣០ ខែមិថុនា គេសង្ស័យថា វ៉ាក់សាំងចំនួន ៦ ៦០៦ មានប្រតិកម្មមិនល្អ។ ក្នុងចំណោមនោះ វ៉ាក់សាំងចំនួន ២៥២ ដូស ត្រូវគេសង្ស័យ និងចាត់ថ្នាក់ជាវ៉ាក់សាំងបង្កប្រតិកម្មធ្ងន់ធ្ងរ៕