ចិនបដិសេធមិនឱ្យនាវាចម្បាំងអាល្លឺម៉ង់ Bayern ដែលជានាវាសម្រាប់បាញ់ប្រហារនាវាមុជទឹកចូលសំចតនៅក្នុងកំពង់ផែរបស់ខ្លួន។ នេះបើតាមការលើកឡើងរបស់អ្នកនាំពាក្យក្រសួងការបរទេសអាល្លឺម៉ង់ កាលពីថ្ងៃពុធ។
នាវាអាល្លឺម៉ង់ បានបើកចេញពីដែនដីអាល្លឺម៉ង់កាលពីខែមុនក្នុងបេសកកម្មរយៈពេល ៦ ខែ ទៅកាន់សមុទ្រចិនខាងត្បូង។ ខណៈចិនធ្វើការទាមទារថា ផ្ទៃសមុទ្រចិនខាងត្បូងប្រមាណ ៩០ភាគរយ ជាដែនទឹករបស់ខ្លួន រដ្ឋធានីប៊ែរឡាំង បានធ្វើការសង្កត់ធ្ងន់ថា ខ្លួនមិនទទួលស្គាល់ការទាមទារនេះទេ។
ទោះបីជាអាល្លឺម៉ង់មិនទទួលស្គាល់ក្ដី កន្លងទៅរដ្ឋមន្ត្រីការពារជាតិអាល្លឺម៉ង់ អ្នកស្រី Annegret Kramp-Karrenbauer បានលើកឡើងថា បេសកកម្មនាវាចរណ៍របស់អាល្លឺម៉ង់មួយនេះ មិនសំដៅលើការគំរាមកំហែងប្រទេសណានោះទេ ហើយការដែលចង់ឈប់សំចតនៅស្រុកចិន ក៏ព្រោះតែខ្លួនមានបំណង «រក្សានូវកិច្ចសន្ទនា» រវាងសម្ព័ន្ធមិត្ត និងចិនតែប៉ុណ្ណោះ។
អ្នកនាំពាក្យក្រសួងការបរទេស និងក្រសួងការពារជាតិចិនមិនទាន់ធ្វើការឆ្លើយតបភ្លាមៗចំពោះការលើកឡើងរបស់ក្រសួងការបរទេសអាល្លឺម៉ង់នេះនៅឡើយទេ៕
ហ៊ីម រដ្ឋា