.jpg)
ក្នុងការបោះជំហានដ៏កម្រមួយប្រធានាធិបតីអាមេរិកលោក ចូ បៃដិន នាយករដ្ឋមន្ត្រីអង់គ្លេសលោក បូរីស ចនសុន និងនាយករដ្ឋមន្ត្រីអូស្ត្រាលីលោក ស្កត ម៉ូរីសុន កាលពីថ្ងៃពុធ បានប្រកាសថា សហរដ្ឋអាមេរិក និងចក្រភពអង់គ្លេស នឹងចែករំលែកបច្ចេកវិទ្យានាវាមុជទឹកដើរដោយថាមពលនុយក្លេអ៊ែរជាមួយអូស្ត្រាលី ជាផ្នែកមួយនៃភាពជាដៃគូសន្តិសុខត្រីភាគីថ្មីនៅឥណ្ឌូ-ប៉ាស៊ីហ្វិក ខណៈពេលដែលប្រទេសទាំង ៣ មានគោលដៅប្រឆាំងការរីកចម្រើនឥទ្ធិពលរបស់ប្រទេសចិន។
ក្នុងរយៈពេលប៉ុន្មានឆ្នាំចុងក្រោយនេះ ភាពតានតឹងបានកើនឡើងរវាងប្រទេសចិន និងបណ្ដាប្រទេសលោកខាងលិច ជាពិសេសជុំវិញជម្លោះនៅសមុទ្រចិនខាងត្បូងដែលជាផ្លូវដឹកជញ្ជូនដ៏សំខាន់មួយហើយពោរពេញទៅដោយធនធានធម្មជាតិដូចជាប្រេង ឧស្ម័នធម្មជាតិ និងមច្ឆជាតិ។ ថ្មីៗនេះ សម្ព័ន្ធមិត្តអឺរ៉ុបរបស់អាមេរិក ដូចជាអង់គ្លេស បារាំង អាល្លឺម៉ង់ បានបង្កើនសកម្មភាពរបស់ពួកគេនៅតំបន់នេះ ធ្វើឱ្យចិនខឹងសម្បា។
ក្នុងសន្និសីទរួមគ្នាតាមរយៈវីដេអូ មេដឹកនាំទាំងបីបានសង្កត់ធ្ងន់ថា អូស្ត្រាលីនឹងមិនប្រើប្រាស់អាវុធនុយក្លេអ៊ែរទេ ប៉ុន្តែនឹងប្រើប្រាស់ថាមពលនុយក្លេអ៊ែរសម្រាប់ដំណើរការនាវាទាំងនេះ ដែលនឹងអនុញ្ញាតឱ្យធ្វើដំណើរលឿនជាងមុន និងឆ្ងាយជាងមុន ហើយងាយលាក់ខ្លួនជាងមុន។
អាមេរិកធ្លាប់បានចែករំលែកបច្ចេកវិទ្យានាវាមុជទឹកនុយក្លេអ៊ែរតែ ១ ដងគត់ នោះគឺជាមួយចក្រភពអង់គ្លេសកាលពីឆ្នាំ ១៩៥៨ ប្រមាណជាង ៦០ ឆ្នាំមុន។ សហរដ្ឋអាមេរិកចាត់ទុកបច្ចេកវិទ្យានេះថាជាផ្នែកដ៏សំខាន់សម្រាប់សមត្ថភាពកងទ័ពជើងទឹករបស់ពួកគេ ហើយបានរក្សាការសម្ងាត់យ៉ាងខ្លាំង។
សេចក្ដីប្រកាសត្រីភាគីនេះបានបង្កឱ្យមានប្រតិកម្មតបតយ៉ាងឆាប់រហ័សពីប្រទេសចិន និងតួអង្គសំខាន់របស់ពិភពលោកមួយទៀត គឺប្រទេសបារាំង។
អ្នកនាំពាក្យស្ថានទូតចិនប្រចាំក្រុងវ៉ាស៊ីនតោនលោក លូ ប៉េងយូ និយាយថា បណ្ដាប្រទេស «មិនគួរបង្កើតប្លុករើសអើង ដើម្បីធ្វើឱ្យប៉ះពាល់ដល់ផលប្រយោជន៍ភាគីទី៣។ ជាពិសេសពួកគេគួរតែរុះរើចិត្តគំនិតសង្គ្រាមត្រជាក់ និងការរើសអើងមនោគមន៍វិជ្ជា»។
រីឯប្រទេសបារាំងវិញ បាននិយាយថា ពួកគេមានការអាក់អន់ចិត្តដោយសារមិនបានចូលរួមក្នុងកិច្ចព្រមព្រៀងនេះ ហើយមានការខឹងសម្បាចំពោះការសម្រេចចិត្តរបស់អូស្ត្រាលី ផ្អាកការបញ្ជាទិញនាវាមុជទឹកជាង ៤០ ពាន់លានដុល្លារពីបារាំង៕
