.jpg)
អ្នកជំនាញព្យាករថា ប្រទេសអូស្រ្ដាលី នឹងត្រូវទទួលរងវិបត្តិមួយទៀតគឺ «ស្រមោលកូវីដ» ដែលជាវិបត្តិសុខភាពផ្លូវចិត្តបន្សល់ដោយវិបត្តិកូវីដ និងការបិទខ្ទប់ជាបន្តបន្ទាប់ ដើម្បីទប់ស្កាត់ការរីករាលដាលនៃមេរោគ។ នេះបើតាមឱ្យដឹងពីសារព័ត៌មានឆេនែលញូស៍អេស៊ា។
លោក Patrick McGorry សាស្ត្រាចារ្យផ្នែកសុខភាពផ្លូវចិត្តយុវជននៅសាកលវិទ្យាល័យមែលប៊ន បានប្រើឃ្លាមួយ ដើម្បីពិពណ៌នាអំពីផលប៉ះពាល់បន្សល់ ដោយជំងឺនេះថា ជាស្រមោលនៃជំងឺផ្លូវចិត្តដ៏គួរឱ្យភ័យខ្លាចដែលកំពុងប្រឈមមុខនឹងប្រទេសអូស្រ្តាលី នាពេលបច្ចុប្បន្ននេះ ជាពិសេសចំពោះយុវជននិងជនងាយរងគ្រោះ។
ប៉ុន្តែតាមពិតវិបត្តិនេះ បានជះឥទ្ធិពលដល់មនុស្សគ្រប់រូបមិនថា ក្នុងកម្រិតធ្ងន់ធ្ងរ ឬកម្រិតស្រាលទេ ដែលសុទ្ធតែជាផលប៉ះពាល់រយៈពេលវែងមិនអាចគេចផុតឡើយ។
សាស្ត្រាចារ្យ McGorry បាននិយាយថា៖ «វាគឺជាការគំរាមកំហែងដ៏ធំមួយចំពោះសុខភាពផ្លូវចិត្តរបស់យើង។ បញ្ហាទាំងនោះរួមមាន ការបាត់បង់សុវត្ថិភាពផ្លូវអារម្មណ៍ ការប្រឈមមុខនឹងការភ័យខ្លាចថា នឹងរាតត្បាតសាជាថ្មី សមត្ថភាពក្នុងការធ្វើលំហាត់ប្រាណ ការរស់នៅជាមួយមនុស្សផ្សេងទៀត តួនាទីសង្គម តួនាទីអាជីព ឬការងារនៅក្នុងសង្គម ទាំងនេះ គឺជាបញ្ហាប្រឈមធំៗ ដែលយើងទាំងអស់គ្នាកំពុងជួបប្រទះ»។
ជំនួយការរដ្ឋមន្រ្តីអូស្រ្តាលី របស់នាយករដ្ឋមន្រ្តី ដែលទទួលបន្ទុកសុខភាពផ្លូវចិត្ត និងបញ្ចៀស ការធ្វើអត្តឃាត លោក David Coleman សង្ឃឹមថា គ្លីនិកឥតគិតថ្លៃនានា ដែលផ្ដល់សេវាពិគ្រោះផ្លូវចិត្ត ជួយសម្រួល និងផ្ដល់ជំនួយដល់ប្រជាជន ដែលរងផលប៉ះពាល់ដោយជំងឺរាតត្បាត។
រហូតមកទល់ពេលនេះ នៅរដ្ឋញូសៅវែលតែម្នាក់ឯង មានការកើនឡើងចំនួនក្មេងអាយុពី ១២ ទៅ ១៧ ឆ្នាំ ដែលមកស្វែងរកមន្ទីរពេទ្យសង្គ្រោះបន្ទាន់ ផ្នែកធ្វើអត្តឃាតខ្លួនឯង កើនឡើងប្រមាណ ៤៩ ភាគរយ បើប្រៀបធៀបទៅនឹងឆ្នាំ ២០១៩។
ដោយឡែកការិយាល័យស្ថិតិរបស់ប្រទេសនេះបង្ហាញថា ជនជាតិអូស្ត្រាលីម្នាក់ក្នុងចំណោម ៣ នាក់ ដែលមានអាយុចន្លោះពី ១៨ ទៅ ៣៤ ឆ្នាំ បានសារភាពថា ខ្លួនបានជួបប្រទះនូវបញ្ហាផ្លូវចិត្តកម្រិតខ្ពស់នៅក្នុងខែមិថុនា ឆ្នាំនេះ។ សម្រាប់បុគ្គលិកជួរមុខក៏ត្រូវប្រឈមនឹងភាពតានតឹងផ្លូវចិត្ត ផ្លូវកាយ និងសង្គមផងដែរ។
លោកស្រី Jacquie Blackwell អ្នកនាំពាក្យរបស់ក្រុម Shadow Pandemic Victoria ដែលបានដាក់ញត្តិតាមអ៊ីនធឺណិតទាមទារឱ្យមានសកម្មភាពពីរដ្ឋាភិបាលរដ្ឋ Victorian បាននិយាយថា៖ «យើងយល់ថា លក្ខណៈនៃជំងឺរាតត្បាតនេះគឺថា យើងត្រូវព្យាយាមគ្រប់គ្រងវាឱ្យបាន»។
ការទប់ទល់ នឹងអារម្មណ៍ដ៏លើសលប់អាចជាការពិបាក ជាពិសេសសម្រាប់កុមារ និងក្មេងជំទង់ដែលប៉ះពាល់ការអភិវឌ្ឍខួរក្បាលមានន័យថា ពួកគេងាយនឹងស្ត្រេស។
បើយោងតាមការស្រាវជ្រាវថ្មី ដែលបោះពុម្ពផ្សាយដោយសាកលវិទ្យាល័យមែលប៊ន និងសាកលវិទ្យាល័យ វេសស៊ីដនី បង្ហាញថា ការមើលភាពយន្ត និងទូរទស្សន៍ គឺជាសកម្មភាពច្នៃប្រឌិតដ៏ពេញនិយមបំផុតដែលធ្វើឡើងដោយជនជាតិអូស្ត្រាលីក្នុងកំពុងពេលបិទខ្ទប់។
ទោះយ៉ាងណាលទ្ធផលនៃការស្រាវជ្រាវក៏បានបង្ហាញផងដែរថា ការស្តាប់ចម្រៀង ដែលយើងចូលចិត្ត ឬការស្តាប់ចម្រៀងពេលងូតទឹកប្រហែលជាល្អសម្រាប់សុខភាពផ្លូវចិត្តផងដែរ។
វេជ្ជបណ្ឌិត Frederic Kiernan ជាអ្នកស្រាវជ្រាវនៅសាកលវិទ្យាល័យ University of សម្រាប់សុខភាពរាងកាយនិងផ្លូវអារម្មណ៍ (CAWRI)៖ «សកម្មភាពច្នៃប្រឌិតទូទៅដែលពេញនិយមបំផុតគឺ ការមើលភាពយន្តនិងទូរទស្សន៍ ប៉ុន្តែប្រសិទ្ធភាពក្នុងការជួយដល់សុខភាពផ្លូវចិត្តមានកម្រិតទាបនៅឡើយ»។
វេជ្ជបណ្ឌិត Kiernan មានប្រសាសន៍ថា៖ «យើងបានរកឃើញថា ការស្តាប់តន្រ្តីការច្រៀង និងការរាំ គឺជាសកម្មភាព ដែលមានប្រសិទ្ធភាពបំផុតក្នុងចំណោមសកម្មភាពទាំង ៣ ដែលធ្វើឱ្យមនុស្សមានអារម្មណ៍ធូរស្រាល»។
ការច្រៀង និងរាំ ស្ថិតនៅលំដាប់ទី២ និងទី៣ សម្រាប់ការធ្វើឱ្យអារម្មណ៍ប្រសើរឡើង ពិព្រោះវាជំរុញដល់សកម្មភាពច្នែប្រឌិត និងធ្វើឱ្យអារម្មណ៍ប្រសើរឡើង៕
