កាលពីថ្ងៃពុធ ទី ១៥ កញ្ញា កូរ៉េខាងជើង និងកូរ៉េខាងត្បូង បានធ្វើការសាកល្បងមីស៊ីលផ្លោង (Ballistic Missile) រៀងៗខ្លួន ដែលជាព្រឹត្តិការណ៍ចុងក្រោយបំផុតក្នុងការប្រកួតប្រជែងអាវុធរវាងប្រទេសទាំង ២ បានធ្វើឱ្យមានការបង្កើតអាវុធកាន់តែទំនើបទៅៗ ខណៈពេលដែលការចរចា ដើម្បីកាត់បន្ថយភាពតានតឹងនៅជាប់គាំង។
កូរ៉េខាងត្បូងបានធ្វើការសាកល្បងមីស៊ីលផ្លោងបាញ់ចេញពីនាវាមុជទឹក ធ្វើឱ្យប្រទេសនេះក្លាយជាប្រទេសដំបូងគេដែលគ្មានអាវុធនុយក្លេអ៊ែរ ហើយបង្កើតមីស៊ីលប្រភេទនេះ។ ប្រធានាធិបតីកូរ៉េខាងត្បូងលោក មូន ជេអ៊ីន បានចូលរួមទស្សនាការសាកល្បងនេះ មុនពេលដែលទទួលដំណឹងថា កូរ៉េខាងជើងក៏បានធ្វើការសាកល្បងមីស៊ីលផងដែរ។
ក្រសួងការពារជាតិកូរ៉េខាងត្បូង និងជប៉ុនបាននិយាយថា កូរ៉េខាងជើងបានបាញ់មីស៊ីលផ្លោងចំនួន ២ គ្រឿង ដែលធ្លាក់នៅក្នុងតំបន់សេដ្ឋកិច្ចផ្ដាច់មុខរបស់ជប៉ុន ១ ថ្ងៃ បន្ទាប់ពីបានសាក ល្បងមីស៊ីលហោះទាប ដែលគេជឿជាក់ថា អាចបញ្ជូនក្បាលគ្រាប់នុយក្លេអ៊ែរបាន។
អ្នកនាំពាក្យក្រសួងការបរទេសអាមេរិកនិយាយថា សហរដ្ឋអាមេរិកថ្កោលទោសការសាកល្បងមីស៊ីលរបស់កូរ៉េខាងជើងថា បានរំលោភសេចក្ដីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ ហើយបានបង្កការគំរាមកំហែងដល់ប្រទេសជិតខាង។ អាមេរិកមិនបាននិយាយទាក់ទងនឹងការសាកល្បងរបស់កូរ៉េខាងត្បូងទេ។
អ្នកនាំពាក្យក្រសួងការបរទេសចិនលោក ចាវ លីជៀន បាននិយាយថា ប្រទេសចិន រំពឹងថាគ្រប់ភាគីអាចអនុវត្តការអត់ធ្មត់។
ប្រទេសកូរ៉េខាងជើង បានធ្វើការអភិវឌ្ឍប្រព័ន្ធអាវុធរបស់ពួកគេជាបន្តបន្ទាប់ ខណៈពេលមានការជាប់គាំងក្នុងការចរចា ដើម្បីរុះរើក្បាលគ្រាប់នុយក្លេអ៊ែរ និងមីស៊ីលរបស់កូរ៉េខាងជើង ដែលចាប់ផ្ដើមដោយអតីតប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន ក្នុងឆ្នាំ ២០១៨។
ក្នុងរយៈពេលប៉ុន្មានឆ្នាំចុងក្រោយនេះកូរ៉េខាងត្បូងក្រោមការគ្រប់គ្រងរបស់លោក មូន បានធ្វើការចំណាយយ៉ាងធំទៅលើប្រព័ន្ធអាវុធថ្មី ដែលរួមមានមីស៊ីលផ្លោង នាវាមុជទឹក និងនាវាដឹកយន្តហោះដំបូង ហើយបានជំរុញស្វ័យភាពគោលនយោបាយការបរទេសពីអាមេរិក។ អ្នកវិភាគមួយចំនួនគិតថា លោក មូន បានធ្វើបែបនេះដោយសារកត្តាជាច្រើនដែលរួមមាន ការខ្វះភាពជឿជាក់លើអាមេរិកបន្ទាប់ការកាន់អំណាចរបស់លោក ត្រាំ និងការអភិវឌ្ឍអាវុធថ្មីៗនៅកូរ៉េខាងជើង និងចិន៕