ក្រុមអ្នកជំនាញមកពីទីភ្នាក់ងារឃ្លាំមើលនុយក្លេអ៊ែរ របស់អង្គការសហប្រជាជាតិ (UN) បានចុះត្រួតពិនិត្យទីតាំង ២ ក្នុងប្រទេសអ៊ុយក្រែន កាលពីថ្ងៃអង្គារ។ ខណៈដែលរុស្ស៊ី បានចោទប្រកាន់ថា អាជ្ញាធរអ៊ុយក្រែន បានរៀបចំផែនការប្រើប្រាស់គ្រាប់បែកវិទ្យុសកម្ម (Dirty Bomb) នៅក្នុងប្រទេសរបស់ខ្លួន ដើម្បីទម្លាក់កំហុសទៅលើរុស្ស៊ី។
តែយ៉ាងណាក្ដី ការិយាល័យប្រធានាធិបតីអ៊ុយក្រែន បានធ្វើការរាយការណ៍ថា ការវាយប្រហាររបស់រុស្សី សំដៅទៅលើតំបន់ចំនួន ៨ ស្ថិតនៅភូមិភាគអាគ្នេយ៍នៃប្រទេសអ៊ុយក្រែន បានសម្លាប់ជនស៊ីវិល ៤ នាក់ និងរងរបួស ៤ នាក់ផ្សេងទៀត ក្នុងរយៈពេលត្រឹមតែ ២៤ ម៉ោង។ ក្រៅពីនេះ មនុស្សរាប់ម៉ឺននាក់ បានប្រឈមនឹងការដាច់ចរន្តអគ្គិសនី និងការខ្វះខាតទឹកប្រើប្រាស់ បន្ទាប់ពីការបាញ់ផ្លោងគ្រាប់មីស៊ីលរបស់រុស្ស៊ី សំដៅទៅលើហេដ្ឋារចនាសម្ព័ន្ធថាមពល ក្នុងតំបន់ចំនួន ១០ កាលពីថ្ងៃចន្ទ។
អគ្គនាយកទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បានប្រាប់ថា៖ «បេសកកម្មត្រួតពិនិត្យរកភ័ស្តុតាងនៃគ្រាប់បែកវិទ្យុសកម្ម ដែលស្នើដោយទីក្រុងកៀវ ក្រោយមានការចោទប្រកាន់ ដោយគ្មានមូលដ្ឋានពីសំណាក់រុស្ស៊ី នឹងត្រូវបិទបញ្ចប់ឆាប់ៗខាងមុខនេះ»។
យោងតាមការចុះផ្សាយរបស់ AP News កាលពីថ្ងៃអង្គារ បន្ទាប់ពីបរាជ័យ នៅសមរភូមិជាច្រើន មន្ត្រីកំពូលៗរបស់រុស្ស៊ី រួមទាំងប្រធានាធិបតី លោក វ្ល៉ាឌីមៀរ ពូទីន បានចោទប្រកាន់ ដោយគ្មានមូលដ្ឋានដដែលៗថា អ៊ុយក្រែន កំពុងរៀបចំប្រើប្រាស់គ្រាប់បែក ដែលមានបន្សាយកាកសំណល់វិទ្យុសកម្ម។
ឯកអគ្គរដ្ឋទូតរុស្ស៊ី ប្រចាំ UN លោក Vassily Nebenzia បានធ្វើការចោទប្រកាន់ ក្នុងលិខិត ១ ដែលផ្ញើទៅសមាជិកក្រុមប្រឹក្សាសន្តិសុខ នៅសប្តាហ៍មុនថា កន្លែងស្រាវជ្រាវនុយក្លេអ៊ែរ និងក្រុមហ៊ុនរុករករ៉ែរបស់អ៊ុយក្រែន បានទទួលបញ្ជាដោយផ្ទាល់ពីប្រធានាធិបតីអ៊ុយក្រែន លោក Volodymyr Zelensky ដើម្បីអភិវឌ្ឍគ្រាប់បែកវិទ្យុសកម្មនេះ។
ជាការឆ្លើយតប ប្រទេសលោកខាងលិច បានហៅការអះអាងរបស់ទីក្រុងម៉ូស្គូថា «ជារឿងភូតកុហកច្បាស់ក្រឡែត»។ ចំណែកអាជ្ញាធរអ៊ុយក្រែន បានច្រានចោលការចោទរបស់រុស្ស៊ី ដោយលើកឡើងថា វាគឺជាការប៉ុនប៉ង ដើម្បីបង្វែរការចាប់អារម្មណ៍លើគម្រោងការរបស់ក្រុងម៉ូស្គូ ក្នុងការបំផ្ទុះគ្រាប់បែកវិទ្យុសកម្ម ដែលនេះជាមធ្យោបាយ ១ ដើម្បីបង្ហាញពិភពលោកថា ទង្វើរបស់រុស្ស៊ី គឺត្រឹមត្រូវ។
គួរដឹងដែរថា IAEA បានលើកឡើងថា ទីតាំងស៊ើបអង្កេត ដែលស្ថិតនៅក្រោមការការពាររបស់ខ្លួន ត្រូវបានចុះទៅត្រួតពិនិត្យយ៉ាងទៀងទាត់ ដោយអធិការរបស់ IAEA ដែលបេសកកម្មរបស់ពួកគេ គឺការស្វែងរកសកម្មភាពផលិតនុយក្លេអ៊ែរ និងឧបករណ៍ ដែលលាក់ទុកមួយចំនួនទៀត ដែលជាប់ពាក់ព័ន្ធនឹងការអភិវឌ្ឍគ្រាប់បែកវិទ្យុសកម្ម។
ទីភ្នាក់ងារដដែលនេះ បានឱ្យដឹងក្នុងសេចក្តីថ្លែងការណ៍ កាលពីថ្ងៃចន្ទថា៖ «IAEA ធ្លាប់បានចុះត្រួតពិនិត្យទីតាំងមួយ ក្នុងចំណោមទីតាំងទាំង ២ កាលពី ១ ខែមុន ហើយបានរកឃើញថា គ្មានសកម្មភាព ឬសម្ភារនុយក្លេអ៊ែរ ដែលត្រូវបានគេលាក់ទុក នៅទីនោះទេ»។
ក្រុមអ្នកឃ្លាំមើលថាមពលបរមាណូរបស់ UN ក៏មានអ្នកត្រួតពិនិត្យ នៅឯរោងចក្រថាមពលនុយក្លេអ៊ែរ Zaporizhzhia ដែលកាន់កាប់ដោយរុស្ស៊ីផងដែរ។ ការប្រយុទ្ធគ្នា នៅជុំវិញស្ថានីយថាមពលនុយក្លេអ៊ែរដ៏ធំបំផុតរបស់អឺរ៉ុបនេះ បង្កើនការបារម្ភពីការលេចធ្លាយដ៏មហន្តរាយដែលអាចកើតនៅទីនោះ។
កាលពីថ្ងៃអង្គារ ការិយាល័យប្រធានាធិបតីអ៊ុយក្រែន បាននិយាយថា ទីក្រុង និងទីប្រជុំជន ជុំវិញរោងចក្រ បានជួបប្រទះនឹងការបាញ់ផ្លោងកាន់តែធ្ងន់ធ្ងរឡើងៗ នៅចន្លោះថ្ងៃចន្ទ ដល់ថ្ងៃអង្គារ។ ក្រុង Nikopol ជាទីក្រុង ដែលប្រឈមមុខជាងគេជាមួយនឹងការលេចធ្លាយរោងចក្រ ដែលអាចហូរតាមទន្លេ Dnieper ដ៏ធំមួយ ហើយអគារផ្ទះល្វែងជាច្រើន សាលាមត្តេយ្យ និងអាជីវកម្មផ្សេងៗជាច្រើន ត្រូវបានបំផ្លិចបំផ្លាញ។
ការបាញ់ផ្លោងរបស់រុស្ស៊ី បានកម្ទេចទីក្រុង និងភូមិចំនួន ១៤ នៅតំបន់ Donetsk ភាគខាងកើត នាថ្ងៃចន្ទ និងថ្ងៃអង្គារ ដោយបានបំផ្លាញផ្លូវរថភ្លើង ១ ផ្នែកធំ ធ្វើឱ្យខូចខាតខ្សែថាមពល និងបំផ្លាញប្រព័ន្ធទំនាក់ទំនងចល័ត ក្នុងតំបន់មួយចំនួនទៀត។ លើសពីនេះ មីស៊ីល ១ គ្រាប់ ក៏បានបាញ់ប្រហារលើទីក្រុង Kramatorsk ដែលជាទីស្នាក់ការកណ្តាលរបស់កងទ័ពអ៊ុយក្រែន។
លោក PavloKyrylenko អភិបាលនៃតំបន់ខូចខាតនេះ បាននិយាយថា៖ «ការបាញ់ផ្លោងមីស៊ីលរុស្ស៊ី បានសម្លាប់ជនស៊ីវិល ៣ នាក់ និងរបួស ៣ នាក់ផ្សេងទៀត»។ គួររំឭកដែរថា Donetsk គឺជាតំបន់ ១ ក្នុងចំណោមតំបន់ចំនួន ៤ ដែលត្រូវបានទីក្រុងម៉ូស្គូ ដាក់បញ្ជូលជាតំបន់ឧបសម្ព័ន្ធ កាលពីខែមុន។
បើតាមអភិបាលក្រុងតំបន់នោះ កាលពីថ្ងៃអង្គារស្ត្រីម្នាក់ត្រូវបានសម្លាប់ បន្ទាប់ពីគ្រាប់រ៉ុក្កែតរបស់រុស្សី បានបាញ់ប្រហារទៅលើអគារផ្ទះល្វែង និងសាលារៀន ១ កន្លែងក្នុងទីក្រុង Mykolayiv ភាគខាងត្បូងប្រទេស។ មិនត្រឹមតែប៉ុណ្ណោះ អ៊ុយក្រែន ជួបប្រទះនឹងផលវិបាកពីការវាយប្រហារដ៏ធំពីរុស្ស៊ី នៅថ្ងៃចន្ទ ដែលរំខានការផ្គត់ផ្គង់ថាមពល និងទឹក ក្នុងទីក្រុង និងតាមភូមិជាច្រើនទៀត។
អភិបាលក្រុងកៀវ លោក Vitali Klitschko បាននិយាយថា៖ «អាជ្ញាធរបានព្យាយាមជួសជុលចរន្តអគ្គិសនី និងទឹកប្រើប្រាស់ឡើងវិញ នៅក្នុងអគារលំនៅដ្ឋាននានា ក្នុងរដ្ឋធានី ប៉ុន្តែការដាច់ចរន្តអគ្គិសនី នឹងបន្តនៅក្នុងទីក្រុង ដោយសារតែកង្វះថាមពលផ្គត់ផ្គង់ច្រើន»។ អភិបាលតំបន់ ១ នៃទីក្រុងកៀវ លោក Oleksiy Kuleba ប្រាប់ កាលពីថ្ងៃអង្គារថា ផ្ទះល្វែងចំនួន ២០ ០០០ ខ្នង នៅតែគ្មានថាមពលប្រើប្រាស់។
ក្រុមហ៊ុនផ្គត់ផ្គង់ថាមពលរដ្ឋរបស់អ៊ុយក្រែន Ukrenergo បានប្រកាស នៅក្នុងសេចក្តីថ្លែងការណ៍ ១ កាលពីថ្ងៃអង្គារថា៖ «តំបន់ចំនួន ៧ នឹងជួបប្រទះការដាច់ចរន្តអគ្គិសនី ដើម្បីកាត់បន្ថយចំនួនប្រើប្រាស់ និងដើម្បីរក្សាតុល្យភាព ហើយនិងស្ថិរភាព នៅក្នុងប្រព័ន្ធ ដោយធ្វើយ៉ាងណា ចៀសវាងការដាច់ប្រព័ន្ធផ្គត់ផ្គង់ម្តងហើយម្តងទៀត»។
នៅទីក្រុង Kharkiv ដែលជាទីក្រុងធំទី ២ របស់អ៊ុយក្រែន សេវារថភ្លើងក្រោមដីត្រូវបានផ្អាកម្តងទៀត កាលពីថ្ងៃអង្គារ ដោយមិនបានបញ្ជាក់ហេតុផលនោះទេ។ នេះបើយោងតាមបណ្ដាញសង្គម Telegram របស់រថភ្លើងក្រោមដី ១ នេះ។
នៅតំបន់ Kherson ដែលជាតំបន់កាន់កាប់ដោយរុស្ស៊ី ឯនោះវិញ អាជ្ញាធររុស្ស៊ី បានជម្លៀសប្រជាជន រហូតដល់ទៅប្រមាណ ៧ ម៉ឺននាក់ ដែលរស់នៅចម្ងាយ ១៥ គីឡូម៉ែត្រក្បែរទន្លេ Dnieper ដោយសារតែការប្រមើលមើលថា ការវាយលុកពីអ៊ុយក្រែនលើតំបន់នេះ អាចនឹងកើតមាន នាពេលឆាប់ៗខាងមុខ។ នេះបើយោងតាមអភិបាលតំបន់ ដែលតែងតាំងដោយវិមានក្រឹមឡាំង លោក Vladimir Saldo។ យ៉ាងណាក្ដី មន្ត្រីទូទៅរបស់អ៊ុយក្រែន កាលពីថ្ងៃអង្គារ បានពណ៌នាការជម្លៀសថ្មីនេះថា ជាការផ្លាស់ទីលំនៅ ដោយបង្ខំ ព្រោះអ្នករស់នៅតាមច្រាំងទន្លេ Dnieper ត្រូវបានបណ្តេញចេញពីផ្ទះរបស់ពួកគេ។
នៅរុស្ស៊ីឯណោះវិញ កងទ័ពដែលទើបនឹងកេណ្ឌបានសរុប ១២ ម៉ឺននាក់ ត្រូវបានរំពឹងថា នឹងត្រូវបានបញ្ជូនឱ្យទៅធ្វើជាទាហាន ក្នុងរយៈពេល ២ ខែខាងមុខនេះ។ ទន្ទឹមនឹងនេះ មន្ត្រីយោធារុស្ស៊ីបានធានាថា ទាហានជើងគោក ដែលទើបនឹងកេណ្ឌបាននេះ នឹងមិនត្រូវបានបញ្ជូនទៅប្រយុទ្ធ នៅសមរភូមិអ៊ុយក្រែន និងតំបន់ឧបសម្ព័ន្ធទេ។
សេចក្តីព្រាងច្បាប់នៃការកេណ្ឌទ័ពបន្ថែម គ្រោងនឹងចាប់ផ្តើម នៅខែតុលា ប៉ុន្តែត្រូវបានពន្យារពេល ១ ខែ ដោយសារមានការចល័តទាហានផ្នែកខ្លះចំនួន ៣ សែននាក់ ទើបបញ្ចប់ កាលពីថ្ងៃចន្ទ។
រដ្ឋមន្ត្រីការពារជាតិរុស្សី លោក Sergei Shoigu បាននិយាយ កាលពីថ្ងៃអង្គារថា៖ «ក្នុងចំណោមទាហានថ្មីៗ ទាំង ៣ សែននាក់ មានមួយចំនួន បានចូលធ្វើទាហានតាមការប្រកាសដោយលោក ពូទីន កាលពីថ្ងៃទី ២១ ខែកញ្ញា ក្នុងនោះទាហាន ៨៧ ០០០ នាក់ ត្រូវបានបញ្ជូនទៅកាន់អ៊ុយក្រែន ហើយគ្រូបង្ហាត់យោធាប្រហែល ៣ ពាន់នាក់ ដែលមានបទពិសោធប្រយុទ្ធ ក៏ត្រូវទទួលភារៈបណ្តុះបណ្តាល នៅទីនោះផងដែរ»។
ប្រព័ន្ធផ្សព្វផ្សាយរុស្ស៊ី និងទីភ្នាក់ងារព័ត៌មាន AP ឱ្យដឹងថា ទាហានបម្រុង ដែលគ្មានបទពិសោធធ្វើសង្គ្រាម ត្រូវបានបង្គាប់ឱ្យទិញសម្ភារមូលដ្ឋាន ដូចជាកញ្ចប់វេជ្ជសាស្ត្រ និងអាវធំខ្លួនឯង និងមិនបានទទួលការបណ្តុះបណ្តាល មុនពេលបញ្ជូនទៅប្រយុទ្ធឡើយ៕