រឿងចៃដន្យដ៏គួរឱ្យកត់សម្គាល់មួយ គឺថា ខណៈដែលបណ្ដាប្រទេសនានាអ្នកធ្វើយុទ្ធនាការ និងម្ចាស់អាជីវកម្ម កំពុងជួបប្រជុំគ្នា នៅក្នុងប្រទេសអេហ្ស៊ីប ដើម្បីដោះស្រាយបញ្ហាអាកាសធាតុ កំណើនប្រជាជនពិភពលោកសរុបឯណោះវិញ បានកើនឡើងរហូតដល់ចំនួន ៨ ប៊ីលាននាក់ ដែលនេះជាព្រឹត្តិការណ៍ដ៏សំខាន់សម្រាប់មនុស្សជាតិទាំងមូល។ តួលេខនេះមានន័យថា ប្រជាជនពិភពលោក កំពុងធ្វើដំណើរឆ្ពោះទៅរកការកើនឡើង រហូតដល់ចំនួន ១ ម៉ឺនលាននាក់ ឬ ១០ ប៊ីលាននាក់ ឬច្រើនជាងនេះទៀត នៅក្នុងសតវត្សរ៍ទី២១ នេះ។
ទោះជាយ៉ាងណា ក្រុមប្រទេសដែលកំពុងជួបប្រជុំ នៅសន្និបាតភាគីលើកទី២៧ (COP27) ហាក់មិនខ្វាយខ្វល់អំពីទំនាក់ទំនង រវាងកំណើនប្រជាជនពិភពលោក ដោយឥតឈប់ឈរ និងការបន្តកើនឡើងសីតុណ្ហភាពរបស់អាកាសធាតុនោះទេ។ ទោះបីជាការពិតបានបង្ហាញយ៉ាងច្បាស់ថា មនុស្សរាប់ពាន់លាននាក់ នឹងបន្តរស់នៅក្នុងរយៈពេល ៧០ឆ្នាំទៅមុខទៀត ហើយពួកគេនឹងត្រូវការប្រើប្រាស់ធនធានកាន់តែច្រើន និងមានការបំភាយឧស្ម័នកាន់តែខ្លាំងក៏ដោយ ក៏បញ្ហាកំណើនប្រជាជន នៅតែត្រូវបានមេដឹកនាំពិភពលោក មិនអើពើមិនខ្វាយខ្វល់ និងតែងតែបដិសេធ មិនព្រមលើកជាបញ្ហាធំនោះឡើយ។
ផ្នែកមួយនៃបញ្ហានេះ គឺភាពរសើបនៅពេលដែលនិយាយអំពីចំនួនមនុស្សនៅលើពិភពលោក។ ប្រវត្តិសាស្ត្រពោរពេញទៅដោយរដ្ឋាភិបាលហិង្សា ដែលព្យាយាមបង្ខំជនងាយរងគ្រោះឱ្យប្រើប្រាស់វិធីបង្ការមិនអាចមានកូនបាន។ ក្នុងនោះរួមមាន យន្តការកាត់បន្ថយចំនួនប្រជាជនទូទៅ ត្រូវបានដាក់ចេញដោយរដ្ឋាភិបាលផ្តាច់ការ និងពួកស្ដាំជ្រុលនិយម។ ដោយឡែកការព្រួយបារម្ភ ជុំវិញបញ្ហាកំណើនប្រជាជន នៅក្នុងបណ្ដាប្រទេសអ្នកមាន តែងតែត្រូវបានចោទប្រកាន់ថា មានការរើសអើង ឬជារដ្ឋាភិបាល ដែលប្រកាន់យកលទ្ធិហ្វាស៊ីសនិយម។
អ្នកវិទ្យាសាស្ត្រ លោក James Lovelock តែងតែនិយាយថា៖ «អ្នកណាក៏ដោយ ដែលមិនបានមើលឃើញពីទំនាក់ទំនង រវាងអាកាសធាតុ និងចំនួនប្រជាជន គឺជាមនុស្សល្ងង់ខ្លៅ ឬព្យាយាមលាក់បាំងពីការពិត»។
លោកបន្ថែមថា បញ្ហាបរិស្ថានដ៏ធំទាំង២ នេះ គឺជាការមិនអាចបែងចែកពីគ្នាឱ្យដាច់បានទេ ហើយការលើកយកបញ្ហាណាមួយមកពិភាក្សា ដោយមិនអើពើ ចំពោះបញ្ហាមួយទៀតនោះ ជារឿងដែលមិនសមហេតុផលទាល់តែសោះ។
រហូតមកដល់ពេលនេះ បញ្ញវន្តលោកខាងលិច មានជំនឿជឿជាក់ថា ចំនួនប្រជាជនពិភពលោកច្រើន មិនមែនជាបញ្ហានោះទេ អ្វីដែលជាបញ្ហានោះ គឺរបៀបដែលពួកគេប្រើប្រាស់ធនធាន នៅលើផែនដីទៅវិញទេ។ ការប្រើប្រាស់ និងវិសមភាព គឺជាបញ្ហាចម្បងមិនមែនទំហំប្រជាជននោះទេ។ ជាការពិតណាស់អ្នកមានបំផុត ១០% នៅលើពិភពលោក ប្រើប្រាស់ថាមពលប្រមាណ ២០ ដង ច្រើនជាងអ្នកក្រខ្សត់បំផុត ១០% នៅលើពិភពលោក។ ដូច្នេះប្រាកដណាស់អ្នកមានត្រូវតែផ្លាស់ប្តូររបៀបរបបរស់នៅរបស់ពួកគេ។ យ៉ាងណាក៏ដោយ ការលើកឡើងថា បម្រែបម្រួលអាកាសធាតុទាំងអស់បណ្ដាលមកពីការប្រើប្រាស់ធនធាន នៅលើភពផែនដី បានក្លាយជាលេស សម្រាប់ប្រទេសនានា ក្នុងការដែលមិនបានដាក់ចេញនូវយន្តការកាត់បន្ថយចំនួនប្រជាជនរបស់ពួកគេ។
ការពិតដ៏ពិបាកទទួលយកមួយនោះ គឺថានៅក្នុងយុគសម័យនៃការប្រែប្រួលអាកាសធាតុចំនួនមនុស្សរស់នៅលើភពផែនដី គឺជាបញ្ហាចម្បងមួយ ព្រោះផលប៉ះពាល់ប្រព័ន្ធអេកូឡូស៊ីរបស់មនុស្ស ២ ទៅ ៣ពាន់លាននាក់ ធំធេងខ្លាំងណាស់។
បញ្ហាទាំងអស់នេះ ក៏ពាក់ព័ន្ធនឹងសិទ្ធិស្ត្រីផងដែរ។ ដោយការព្រងើយកន្តើយ ចំពោះចំនួនប្រជាជន តម្រូវការរបស់ស្ត្រី និងកុមារី កំពុងត្រូវបានដកចេញដោយរដ្ឋាភិបាល ដែលឈ្លក់វង្វេងនឹងការប្រើប្រាស់ធនធាន នៅលើផែនដី ដើម្បីផ្ដោតលើការអប់រំ និងផែនការគ្រួសារ ក្នុងការដោះស្រាយភាពអាសន្ននៃអាកាសធាតុ។
ម្ចាស់ពានរង្វាន់ណូបែលសន្តិភាព លោកស្រី Malala Yousafzai បានលើកឡើង កាលពីឆ្នាំមុនថា៖ «ពេលក្មេងស្រីទទួលបានការអប់រំ ហើយពេលពួកគេរវល់តែផ្ដោតលើការសិក្សា នៅសាលា ពួកគេនឹងរៀបការ នៅពេលក្រោយបញ្ចប់ការសិក្សានោះ ពួកគេនឹងមានកូនចំនួនតិច។ ការណ៍នេះជាការចូលរួមកាត់បន្ថយផលប៉ះពាល់នៃការប្រែប្រួលអាកាសធាតុ តាមរយៈចំនួនប្រជាជនកើនឡើងតិចតួច»។
លោកស្រីបន្តថា «ប្រសិនបើក្មេងស្រីគ្រប់រូបអាចយល់ដឹង និងអនុវត្តសុខភាពផ្លូវភេទ សុខភាពបន្តពូជ និងសិទ្ធិរបស់ពួកគេ តាមរយៈការអប់រំប្រកបដោយគុណភាព និងទទួលបានមធ្យោបាយពន្យារកំណើត តាមបែបទំនើប វាពិតជាអាចកាត់បន្ថយការបំភាយឧស្ម័នបានច្រើន»។
យោងតាមមូលនិធិប្រជាជនរបស់អង្គការសហប្រជាជាតិ (UNFPA) ស្ត្រីចំនួន ២៥៧ លាននាក់ មិនអាចទទួលបានការពន្យារកំណើត បានត្រឹមត្រូវ ពាក់កណ្តាលនៃការមានផ្ទៃពោះទូទាំងពិភពលោក កើតឡើងដោយមិនបានគ្រោងទុក ហើយជិត ១/៤ នៃស្ត្រីទាំងអស់ មិនមានភ្នាក់ងារគ្រប់គ្រាន់ ដើម្បីពិគ្រោះយោបល់អំពីការបដិសេធការរួមភេទនោះទេ។
ប៉ុន្តែប្រទេសដែលមានជាងគេបំផុតលើពិភពលោករួមគ្នាបរិច្ចាគត្រឹមតែ ២-៣រយលានដុល្លារប៉ុណ្ណោះ ក្នុង ១ ឆ្នាំ ទៅដល់ទីភ្នាក់ងារប្រជាជនរបស់អង្គការសហប្រជាជាតិ។ ប្រទេសមួយចំនួនថែមទាំង បានជំរុញគោលនយោបាយបង្កើនចំនួនប្រជាជនរបស់ពួកគេទៀតផង។ នៅឆ្នាំ ២០១៧ លោក ដូណាល់ ត្រាំ បានកាត់បន្ថយការផ្តល់មូលនិធិរបស់សហរដ្ឋអាមេរិកដល់ UNFPA ហើយកាលពីឆ្នាំមុនអង់គ្លេស ក៏បានធ្វើតាមអាមេរិកផងដែរ ដោយកាត់បន្ថយការរួមចំណែករបស់ខ្លួនដល់ទីភ្នាក់ងារនេះចំនួន ៨៥% ពី ២០០ លានដុល្លារ មកនៅត្រឹមតែ ៣២ លានដុល្លារប៉ុណ្ណោះ។
យ៉ាងណាក៏ដោយ ជំនួយរបស់សហរដ្ឋអាមេរិក ត្រូវបានស្ដារឡើងវិញ បានមួយផ្នែកខ្លះហើយ។ ជំនួយរបស់ប្រទេសទាំង២ ត្រូវបានគេប៉ាន់ប្រមាណថា អាចជួយការពារការស្លាប់របស់ម្តាយ និងកូនប្រហែល ២៥០ ០០០ នាក់ ការមានផ្ទៃពោះដោយអចេតនាចំនួន ១៤,៦ លាននាក់ និងការរំលូតកូន ដែលមិនមានសុវត្ថិភាពចំនួន ៤,៣ លាននាក់។
កិច្ចពិភាក្សាអន្តររដ្ឋាភិបាលស្តីពីការប្រែប្រួលអាកាសធាតុ ដែលជាមតិឯកច្ឆន្ទរបស់អ្នកវិទ្យាសាស្ត្រអាកាសធាតុពិភពលោក បានកត់សម្គាល់ថា កំណើនចំនួនប្រជាជនពិភពលោកជាមួយ ក្នុងចំណោមកត្តាជំរុញដ៏ធំបំផុត ២ នៃការកើនឡើងនៃការបំភាយឧស្ម័នកាបូនិក។
អ្នកវិទ្យាសាស្ត្របាននិយាយ កាលពីដើមឆ្នាំនេះថា៖ «ផលិតផល ក្នុងស្រុកសរុប សម្រាប់មនុស្សម្នាក់ និងកំណើនប្រជាជន នៅតែជាកត្តាជំរុញខ្លាំងបំផុតនៃការបំភាយឧស្ម័នកាបូនិកបណ្ដាលមកពីការដុតឥន្ធនៈហ្វូស៊ីល ក្នុងទសវត្សរ៍ចុងក្រោយនេះ»។ ពួកគេក៏បានព្រមានផងដែរថា ប្រសិនបើចំនួនប្រជាជន នៅតែបន្តកើនឡើងវានឹងកាន់តែពិបាក ក្នុងការសម្រេចបាននូវគោលដៅសីតុណ្ហភាព ១,៥ អង្សាសេ ដែលបានកំណត់ ក្នុងកិច្ចព្រមព្រៀងទីក្រុងប៉ារីស ឆ្នាំ ២០១៥។
នេះគួរតែជាភ័ស្តុតាងគ្រប់គ្រាន់សម្រាប់មនុស្សគ្រប់គ្នាដែលថា កំណើនប្រជាជន និងផលប៉ះពាល់បរិស្ថាន នាពេលអនាគតរបស់វា គឺជាវិបត្តិសកលទ្វេដង ហើយទីភ្នាក់ងារអង្គការសហប្រជាជាតិ និងក្រុមអង្គការសង្គមស៊ីវិល ដែលប្រជុំនៅក្នុងប្រទេសអេហ្ស៊ីប ត្រូវតែទទួលស្គាល់ជាបន្ទាន់ថា បញ្ហាទាំង២ កំពុងជំរុញការបំផ្លិចបំផ្លាញភពផែនដី និងកំណើនភាពក្រីក្រកាន់តែខ្លាំង៕