ក្រុមមន្ត្រីបានប្រាប់សារព័ត៌មាន The Associated Press នៅថ្ងៃពុធ ទី ១៥ ខែវិច្ឆិកាថា នាវាដឹកប្រេង ១ គ្រឿង ដែលមានជាប់ពាក់ព័ន្ធជាមួយមហាសេដ្ឋីអ៊ីស្រាអែល ត្រូវបានវាយប្រហារ ដោយយន្តហោះគ្មានមនុស្សបើក (ដ្រូន) នៅឯឆ្នេរសមុទ្រប្រទេសអូម៉ង់ ចំពេលកំពុងមានភាពតានតឹងកាន់តែខ្លាំងឡើងជាមួយប្រទេសអ៊ីរ៉ង់។
មន្ត្រីការពារជាតិ ដែលមានមូលដ្ឋាន នៅមជ្ឈិមបូព៌ាបាននិយាយថា ការវាយប្រហារលើនាវាដឹកប្រេង ដែលមានទង់ជាតិលីបេរីយ៉ា មានឈ្មោះថា Pacific Zircon បានកើតឡើង កាលពីយប់ថ្ងៃអង្គារ នៅឯឆ្នេរសមុទ្រនៃប្រទេសអូម៉ង់។ ក្រុមមន្ត្រីទាំងនោះ បានលើកឡើង ដោយមិនបញ្ចេញឈ្មោះនោះទេ ដោយសារតែពួកគេមិនមានការអនុញ្ញាតឱ្យលើកឡើង អំពីការវាយប្រហារនេះជាសាធារណៈនោះឡើយ។
គួរដឹងដែរថា នាវាដឹកប្រេង Pacific Zircon គ្រប់គ្រង ដោយក្រុមហ៊ុន Eastern Pacific Shipping មានមូលដ្ឋាន នៅប្រទេសសិង្ហបុរី ដែលជាក្រុមហ៊ុនគ្រប់គ្រងដោយមហាសេដ្ឋីអ៊ីស្រាអែលម្នាក់ឈ្មោះថា Idan Ofer។
នៅក្នុងសេចក្តីថ្លែងការណ៍មួយរបស់ក្រុមហ៊ុន Eastern Pacific Shipping បានលើកឡើងថា នាវារបស់ខ្លួនដែលមានឈ្មោះថា Pacific Zircon ដែលកំពុងដឹកប្រេងឧស្ម័នត្រូវបានវាយប្រហារដោយគ្រាប់ផ្លោង ចម្ងាយប្រហែល ២៤០ គីឡូម៉ែត្រ បាញ់ចេញពីឆ្នេរសមុទ្រនៃប្រទេសអូម៉ង់។
សេចក្ដីថ្លែងការណ៍ដដែលបានបន្តថា៖ «យើងកំពុងទាក់ទងជាមួយក្រុមការងារ នៅលើនាវាផ្ទាល់ ហើយមិនមានការរាយការណ៍អំពីការរងរបួស ឬការបំពុលនោះទេ។ នាវិកទាំងអស់មានសុវត្ថិភាព ប៉ុន្តែមានការខូចខាតបន្តិចបន្តួចត្រង់កន្លែងចំហៀងផ្នែកខាងក្រោមរបស់នាវា ប៉ុន្តែមិនមានការលេចធ្លាយប្រេង ឬទឹកហូរចូលឡើយ»។
មន្ត្រីអ៊ីស្រាអែលម្នាក់ ដែលបាននិយាយជាមួយទីភ្នាក់ងារព័ត៌មាន AP ក្នុងលក្ខខណ្ឌមិនបញ្ចេញឈ្មោះ បានបកស្រាយលម្អិតអំពីការវាយប្រហារថា វាហាក់ដូចជាអ៊ីរ៉ង់ បានធ្វើការវាយប្រហារ ដោយយន្តហោះគ្មានដ្រូនប្រភេទ Shahed-136 ព្រោះអ៊ីរ៉ង់ បានផ្គត់ផ្គង់ដ្រូនប្រភេទទាំងនោះទៅឱ្យរុស្ស៊ី ក្នុងគោលដៅបំផ្លិចបំផ្លាញហេដ្ឋារចនាសម្ព័ន្ធ និងជនស៊ីវិល នៅអ៊ុយក្រែន។
មន្ត្រីរូបនេះបានលើកឡើងបន្តថា មានការឯកភាពគ្នាលើរឿងនេះ នៅក្នុងក្រុមស៊ើបការណ៍សម្ងាត់ និងការពារជាតិអ៊ីស្រាអែលថា វាគឺជាការវាយប្រហាររបស់អ៊ីរ៉ង់។ តែយ៉ាងណាក៏ដោយ រដ្ឋាភិបាលអ៊ីរ៉ង់មិនបានប្រកាសទទួលខុសត្រូវ ចំពោះការវាយប្រហារលើនាវាមួយនេះទេ ហើយស្ថានបេសកកម្មរបស់អ៊ីរ៉ង់ប្រចាំ នៅអង្គការសហប្រជាជាតិ ក៏មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយ ជុំវិញបញ្ហានេះនោះដែរ។ ជាការកត់សម្គាល់ តម្លៃប្រេងបានឡើងថ្លៃមួយរំពេច បន្ទាប់ពីព័ត៌មាននៃការវាយប្រហារមួយនេះ ត្រូវបានបែកធ្លាយ ដោយការទិញលក់ប្រេងឆៅមានតម្លៃលើសពី ៩៤ដុល្លារ ក្នុង ១បារ៉ែល។
ខណៈដែលគ្មាននរណាម្នាក់ ចេញមុខប្រកាសទទួលខុសត្រូវ ចំពោះការវាយប្រហារនោះ ការសង្ស័យបានធ្លាក់មកលើអ៊ីរ៉ង់ភ្លាមៗ។ នេះអាចមកពីកន្លងមក ទីក្រុងតេអេរ៉ង់ និងអ៊ីស្រាអែល បានពាក់ព័ន្ធទៅនឹងសង្គ្រាមស្រមោលអស់រយៈពេលជាច្រើនឆ្នាំ នៅមជ្ឈិមបូព៌ា។ ភាគីទាំង ២ តែងធ្វើការវាយប្រហារដោយដ្រូន ដោយបានកំណត់គោលដៅលើនាវា ដែលពាក់ព័ន្ធជាមួយអ៊ីស្រាអែល ជាពិសេសនាវា ដែលធ្វើដំណើរជុំវិញតំបន់។
សហរដ្ឋអាមេរិក ក៏បានរិះគន់អ៊ីរ៉ង់ ចំពោះការវាយប្រហារជាបន្តបន្ទាប់ ដែលកើតឡើងនៅឆ្នេរសមុទ្រនៃប្រទេសអេមីរ៉ាតអារ៉ាប់រួម ក្នុងឆ្នាំ ២០១៩ កន្លងទៅ។ នៅពេលនោះ ទីក្រុងតេអេរ៉ង់ បានចាប់ផ្តើមបង្កើនកម្មវិធីនុយក្លេអ៊ែររបស់ខ្លួនបន្ទាប់ពីសហរដ្ឋអាមេរិក បានដកខ្លួនចេញដោយឯកតោភាគីពីកិច្ចព្រមព្រៀងបរមាណូរបស់អ៊ីរ៉ង់ជាមួយមហាអំណាចពិភពលោក។
គួររម្លឹកផងដែរថា នៅឆ្នាំ ២០២១ មានការសង្ស័យថា ដ្រូនរបស់អ៊ីរ៉ង់ បានវាយប្រហារលើនាវាដឹកប្រេង ដែលជាប់ពាក់ព័ន្ធជាមួយប្រទេសអ៊ីស្រាអែល ឈ្មោះថា Mercer Street ដោយថែមទាំងបានសម្លាប់មនុស្ស ២នាក់ នៅលើនាវានោះទៀតផង។
យ៉ាងណាមិញ គេមិនទាន់ច្បាស់នៅឡើយទេថា តើនាវាដឹកប្រេង Pacific Zircon នោះ នៅទីណានោះទេ កាលពីថ្ងៃពុធ។ ទិន្នន័យដែលតាមដានតាមរយៈផ្កាយរណបពីល្ងាចថ្ងៃអង្គារផ្តល់ជូនដោយ MarineTraffic.com បានដាក់សញ្ញានាវាធ្វើដំណើរចូលទៅក្នុងសមុទ្រអារ៉ាប់ បន្ទាប់ពីចាកចេញពីកំពង់ផែ Omani នៃទីក្រុង Sohar ប្រទេសអូម៉ង់។
ចាប់តាំងពីបរាជ័យនៃកិច្ចព្រមព្រៀងនុយក្លេអែររបស់អ៊ីរ៉ង់ អ្នកជំនាញបានព្រមានថា អ៊ីរ៉ង់ឥឡូវនេះ មានសារធាតុអ៊ុយរ៉ាញ៉ូម ដែលចម្រាញ់បានគ្រប់គ្រាន់ ដើម្បីធ្វើអាវុធនុយក្លេអ៊ែរយ៉ាងហោចណាស់ អាចផលិតអាវុធនុយក្លេអ៊ែរបានមួយហើយ ប្រសិនបើប្រទេសនេះជ្រើសរើសចង់ផលិត ទោះបីជាទីក្រុងតេអេរ៉ង់ តែងតែអះអាងថា កម្មវិធីនុយក្លេអ៊ែររបស់ខ្លួនមិនមានសកម្មភាពអ្វីក៏ដោយ។
លោក Torbjorn Soltvedt អ្នកវិភាគនៅក្រុមហ៊ុនស៊ើបការណ៍ហានិភ័យ ដែលមានឈ្មោះថា Verisk Maplecroft បាននិយាយថា៖ «ការវាយប្រហារនេះមិនមានអ្វីជាការភ្ញាក់ផ្អើលទេ»។
លោកបានបន្តថា ហានិភ័យនៃការវាយប្រហារប្រឆាំងនឹងការដឹកជញ្ជូន និងហេដ្ឋារចនាសម្ព័ន្ធថាមពល នៅក្នុងតំបន់បានកើនឡើង ដោយសារតែកង្វះវឌ្ឍនភាព ក្នុងទំនាក់ទំនងការទូតនុយក្លេអ៊ែរ រវាងសហរដ្ឋអាមេរិក និងអ៊ីរ៉ង់ និងការសម្រេច ដោយទីក្រុងវ៉ាស៊ីនតោន ដើម្បីដាក់សម្ពាធបន្ថែមលើប្រទេសអ៊ីរ៉ង់។ ចាប់តាំងពីឆ្នាំ២០១៩ មក អ៊ីរ៉ង់បានឆ្លើយតបចំពោះការដាក់ទណ្ឌកម្មរបស់សហរដ្ឋអាមេរិក តាមរយៈការបង្កើនសកម្មភាពយោធាសម្ងាត់ នៅក្នុងតំបន់។
លោក Soltvedt បានលើកឡើងថា៖ «វាមិនត្រឹមតែមានការកើនឡើងហានិភ័យ ដែលបណ្ដាលមកពីការបំផ្លិចបំផ្លាញហេដ្ឋារចនាសម្ព័ន្ធថាមពល នៅក្នុងតំបន់ប៉ុណ្ណោះទេ ប៉ុន្តែក៏មានហានិភ័យ ដែលត្រូវប្រឈមមុខគ្នាផ្នែកយោធាកាន់តែតានតឹង ហើយផលវិបាកនឹងកាន់តែធ្ងន់ធ្ងរបន្ថែមទៀត សម្រាប់ទីផ្សារថាមពលពិភពលោក»។
ចំណុចគួរកត់សម្គាល់មួយទៀតនោះ គឺថា ការវាយប្រហារនាវាដឹកប្រេងនេះ កើតមានតែប៉ុន្មានថ្ងៃមុនព្រឹត្តិការណ៍ FIFA World Cup 2022 នៅប្រទេសកាតា។ ខណៈដែលរដ្ឋាភិបាលទីក្រុងដូហា ប្រទេសកាតា កំពុងរក្សាទំនាក់ទំនងល្អជាមួយរដ្ឋាភិបាលទីក្រុងតេអេរ៉ង់។ ប្រទេសទាំង ២ ជាតំបន់ដែលសម្បូរទៅដោយឧស្ម័នធម្មជាតិដ៏ច្រើនសន្ធឹកសន្ធាប់ដូចគ្នា។ ម្យ៉ាងទៀត អ៊ីរ៉ងក៏នឹងចូលរួមការប្រកួតបាល់ទាត់ដណ្ដើមពានរង្វាន់ពិភពលោក នាពេលខាងមុខនេះផងដែរ ដោយក្នុងនោះក្រុមជម្រើសជាតិអ៊ីរ៉ង់ក៏ត្រូវប៉ះជាមួយក្រុមអង់គ្លេស និងសហរដ្ឋអាមេរិក សម្រាប់ហ្គេម ក្នុងវគ្គសន្សំពិន្ទុ ក្នុងពូល B របស់ខ្លួន ខណៈដែលអ៊ីរ៉ង់ កំពុងចោទប្រកាន់ប្រទេសមហាអំណាចទាំង២ ថា បានបង្កភាពចលាចល នៅក្នុងប្រទេសអ៊ីរ៉ង់ផ្ទាល់៕