យោងតាមការចុះផ្សាយរបស់ BBC News ក្រុមយោធាមីយ៉ាន់ម៉ានឹងដោះលែងអ្នកទោសចំនួន ៦ ០០០ នាក់ ក្នុងនោះរួមមាន អតីតឯកអគ្គរាជទូតអង់គ្លេស ផលិតករភាពយន្តជប៉ុន និងទីប្រឹក្សាជនជាតិអូស្ត្រាលីម្នាក់ ដែលធ្លាប់ធ្វើជាទីប្រឹក្សាឱ្យលោកស្រី អ៊ុងសាន ស៊ូជី។
គួររំឭកផងដែរថា អតីតអ្នកការទូតលោកស្រី Vicky Bowman និងអ្នកផលិតភាពយន្តឯកសារជនជាតិជប៉ុន លោក Toru Kubota ត្រូវបានជាប់ពន្ធនាគារ កាលពីដើមឆ្នាំ ២០២២ នេះ ចំណែកឯទីប្រឹក្សាលោកស្រី អ៊ុងសាន ស៊ូជី និងជាសេដ្ឋវិទូជនជាតិអូស្ត្រាលី លោក Sean Turnell ត្រូវបានចាប់ឃុំខ្លួនភ្លាមៗ បន្ទាប់ពីរដ្ឋប្រហារកាលពីដើមឆ្នាំ ២០២១។
របបយោធាបានលើកឡើងថា ការលើកលែងទោស ចំពោះអ្នកជាប់ពន្ធនាគារទាំងអស់នេះ គឺដើម្បីជាការប្រារព្ធទិវាជាតិមីយ៉ាន់ម៉ា។ តែយ៉ាងណាក៏ដោយ នៅមានអ្នកទោសជាច្រើនទៀត ដែលមិនទាន់បានរួចខ្លួន។ ចាប់តាំងពីបានកាន់អំណាចរបបយោធាមួយនេះ បានចោទប្រកាន់ និងចាប់ខ្លួនពលរដ្ឋមីយ៉ាន់ម៉ា និងជនបរទេសប្រមាណជា ១៦ ០០០ នាក់ រួចមកហើយ។
គួរបញ្ជាក់ឡើងវិញផងដែរថា របបយោធាសព្វថ្ងៃរបស់មីយ៉ាន់ម៉ា បានផ្តួលរំលំរដ្ឋាភិបាលជាប់ឆ្នោត តាមបែបប្រជាធិបតេយ្យរបស់លោកស្រី ស៊ូជី កាលពីខែកុម្ភៈ ឆ្នាំ២០២១។ ព្រឹតិ្តការណ៍នោះ បានបង្កឱ្យមានការបាតុកម្មតវ៉ា នៅទូទាំងប្រទេស និងចលនាតស៊ូរីករាលដាលពាសពេញផ្ទៃប្រទេស។
ក្រឡេកទៅមើលលោកស្រី Bowman វិញ លោកស្រីធ្លាប់បានបម្រើការជាបេសកជនពិសេសរបស់អង់គ្លេសប្រចាំ នៅប្រទេសមីយ៉ាន់ម៉ា ចន្លោះឆ្នាំ ២០០២ ដល់ឆ្នាំ ២០០៦។ អំឡុងពេលត្រូវបានគេចាប់ខ្លួន កាលនោះ លោកស្រីកំពុងគ្រប់គ្រងមជ្ឈមណ្ឌលមីយ៉ាន់ម៉ា សម្រាប់អាជីវកម្ម ដែលមានការទទួលខុសត្រូវ ឬហៅកាត់ថា MCRB ដែលមានមូលដ្ឋាន នៅទីក្រុងយ៉ាំងហ្គោន។
ជាអ្នកចេះនិយាយភាសាភូមាយ៉ាងស្ទាត់ជំនាញ លោកស្រី គឺជាសមាជិកដ៏ល្បីល្បាញម្នាក់ ក្នុងសហគមន៍អន្តរជាតិតូចមួយរបស់មីយ៉ាន់ម៉ា។ ដោយឡែក ស្វាមីរបស់លោកស្រី លោក Htein Lin ក៏ជាអតីតអ្នកទោសនយោបាយម្នាក់ផង ដែរ។ ស្វាមីភរិយា ១ គូនេះ ត្រូវបានចាប់ឃុំខ្លួន នៅពេលពួកគេត្រឡប់មកកាន់ទីក្រុងពីផ្ទះរបស់ពួកគេ នៅឯរដ្ឋ Shan។ ក្រុមអាជ្ញាធរយោធាមីយ៉ាន់ម៉ា បានចោទប្រកាន់ពួកគេទាំង ២ នាក់ ពីបទមិនបានចុះឈ្មោះលោកស្រី Bowman ថាបានរស់នៅអាសយដ្ឋានផ្សេង។ ទោះយ៉ាងណាក៏ដោយ ករណីនេះទំនងជាជាប់ពាក់ព័ន្ធនឹងរឿងនយោបាយច្រើនជាងបទល្មើសអន្តោប្រវេសន៍ជាក់ស្ដែង ព្រោះជនបរទេសកម្រត្រូវបានកាត់ទោសនៅក្នុងប្រទេសមីយ៉ាន់ម៉ាពីបទចោទប្រកាន់ខាងលើនេះណាស់។
ទន្ទឹមនឹងនេះដែរ លោក Turnell ត្រូវបានចាប់ឃុំខ្លួននៅទីក្រុងយ៉ាំងហ្គោន ក្នុងខែកុម្ភៈ ឆ្នាំ ២០២១ ប៉ុន្មានថ្ងៃបន្ទាប់ពីយោធាបានធ្វើរដ្ឋប្រហារ ហើយត្រូវបានកាត់ទោសឱ្យជាប់ពន្ធនាគាររយៈពេល ៣ ឆ្នាំ ដោយអនុលោមតាមច្បាប់សម្ងាត់ផ្លូវការ។ លោកគឺជាទីប្រឹក្សាជិតស្និទ្ធរបស់មេដឹកនាំប្រឆាំង គឺលោកស្រី អ៊ុងសាន ស៊ូជី ដែលលោកស្រីត្រូវបានកាត់ទោសឱ្យជាប់ពន្ធនាគារជាង ២០ ឆ្នាំលើបទចោទប្រកាន់ជាច្រើន។
នៅពេលនោះ រដ្ឋាភិបាលអូស្ត្រាលីបានច្រានចោលសេចក្តីសម្រេចរបស់តុលាការ ក្នុងសំណុំរឿងរបស់លោក Turnell ដោយកត់សម្គាល់ថា ពលរដ្ឋរបស់ខ្លួនម្នាក់នេះ ត្រូវបានកាត់ទោសនៅក្នុងតុលាការយោធាបិទជិតមួយ។
រីឯអ្នកផលិតឯកសារលោក Toru Kobuta អាយុ ២៦ ឆ្នាំ ត្រូវបានចាប់ខ្លួន កាលពីខែកក្កដា នៅជិតក្រុមមនុស្ស កំពុងប្រមូលផ្តុំគ្នាប្រឆាំងរដ្ឋាភិបាល នៅទីក្រុងយ៉ាំងហ្គោន។ លោកត្រូវបានកាត់ទោសឱ្យជាប់ពន្ធនាគាររយៈពេល ១០ ឆ្នាំពីបទបះបោរ និងពីបទបំពានច្បាប់ទំនាក់ទំនងអេឡិចត្រូនិក។ យោងតាមអង្គការអ្នកកាសែតគ្មានព្រំដែន បានឱ្យដឹងថា អ្នកកាសែតយ៉ាងតិច ៦៨ នាក់ ត្រូវបានឃុំខ្លួន នៅក្នុងប្រទេសមីយ៉ាន់ម៉ា មុនពេលការលើកលែងទោសនៅថ្ងៃនេះ កើតឡើង។
លោក Kobuta ដែលបានមកដល់ប្រទេសមីយ៉ាន់ម៉ាដំបូង ក្នុងខែកក្កដា មានគោលបំណងថតរឿងភាពយន្តឯកសារអំពីខ្សែជីវិតពលរដ្ឋមីយ៉ាន់ម៉ា។ នេះបើយោងតាមសម្ដីមិត្តភក្តិរបស់លោក ដែលបានប្រាប់អ្នកសារព័ត៌មាន កាលពីដើមឆ្នាំនេះ។
យោងតាមគេហទំព័រ Film Freeway ផលិតករភាពយន្តលោក Kubota បានចាប់ផ្តើមអាជីពរបស់គាត់ នៅពេលដែលគាត់បានជួបជនភៀសខ្លួនរ៉ូហ៊ីងយ៉ា នៅក្នុងប្រទេសជប៉ុន ក្នុងឆ្នាំ ២០១៤ ហើយក្រោយមកបានផលិតខ្សែភាពយន្តជាច្រើនអំពីជនភៀសខ្លួន និងបញ្ហាជនជាតិ ក្នុងប្រទេសមីយ៉ាន់ម៉ាផ្ទាល់។
គួររំលេចផងដែរថា យោធាមីយ៉ាន់ម៉ា ត្រូវបានអង្គការអន្តរជាតិ និងក្នុងស្រុក ចោទប្រកាន់ពីបទរំលោភសិទ្ធិមនុស្សយ៉ាងធ្ងន់ធ្ងរ ចាប់តាំងពីបានឡើងកាន់អំណាចមក។ យោងតាមក្រុមអ្នកឃ្លាំមើលសមាគមជំនួយ សម្រាប់អ្នកទោសនយោបាយ មនុស្សជាង ២ ៤០០ នាក់ ត្រូវបានសម្លាប់ដោយយោធាមីយ៉ាន់ម៉ា ចាប់តាំងពីរដ្ឋប្រហារ កាលពីដើមឆ្នាំ ២០២១៕
វីដេអូ៖