.jpg)
ខ្លាឃ្មុំផេនដា Tuan Tuan ដែលចិនប្រគល់ឱ្យតៃវ៉ាន់ក្នុងឆ្នាំ ២០០៨ នៅសួនសត្វតៃប៉ិ បានស្លាប់កាលពីថ្ងៃទី ១៩ វិច្ឆិកា ឆ្នាំ ២០២២ ។ AFP
សត្វខ្លាឃ្មុំផេនដាដែលប្រទេសចិនបានផ្តល់ជាកាដូជូនកោះតៃវ៉ាន់កាលពី ១៤ ឆ្នាំមុនជានិមិត្តរូបនៃទំនាក់ទំនងដ៏កក់ក្តៅរវាងភាគីទាំង ២ បានបាត់បង់ជីវិតហើយ កាលពីថ្ងៃទី ១៩ ខែវិច្ឆិកា ឆ្នាំ ២០២២ បន្ទាប់ពីបានឈឺប្រកាច់អស់ជាច្រើនថ្ងៃ។ នេះបើយោងតាមការលើកឡើងរបស់អ្នកថែទាំនៅក្នុងសួនសត្វទីក្រុងតៃប៉ិ។
ខ្លាឃ្មុំដែលបានស្លាប់នេះមានឈ្មោះថាទួន ទួន (Tuan Tuan) និងខ្លាឃ្មុំដែលជាដៃគូឈ្មោះថា យួន យួន (Yuan Yuan) នៅមានជីវិតនៅឡើយ។ ខ្លាឃ្មុំផេនដាទាំង ២ ត្រូវបានទីក្រុងប៉េកាំងប្រគល់ជូនជាកាដូកាទូតដល់តៃវ៉ាន់នៅចុងឆ្នាំ ២០០៨ ដែលជាពេលដែលទំនាក់ទំនងរវាងភាគីទាំង ២ នៅមានភាពស្និទ្ធស្នាលនៅឡើយ។
ប្រទេសចិនតែងតែចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន ហើយបានប្តេជ្ញាថា នៅថ្ងៃណាមួយនាពេលខាងមុខ នឹងនាំយកកោះស្វយ័តប្រជាធិបតេយ្យមួយនេះ មកបង្រួបបង្រួមជាមួយចិនដីគោកវិញហើយប្រសិនបើកាលៈទេសៈបង្ខំ ចិនក៏បានគំរាមថានឹងប្រើប្រាស់កម្លាំងយោធាទៀតផង។
ដោយឡែកឧទ្យានសួនសត្វបានលើកឡើងនៅក្នុងសេចក្តីថ្លែងការណ៍ខ្លីមួយថា៖ «ក្រុមគ្រូពេទ្យរបស់យើងបានបញ្ជាក់ ថា បេះដូងរបស់ ទួន ទួនបានឈប់លោតនៅម៉ោងប្រមាណជា ៥ និង ៤៨ នាទីល្ងាច»។
មន្ត្រីប្រចាំការនៅក្នុងសួនសត្វនោះបាននិយាយថា ៖ «ខ្លាឃ្មុំផេនដាមួយនេះត្រូវបានចាក់ថ្នាំសន្លប់យ៉ាងយូរ ដើម្បីស្កែនធ្វើកោសល្យវិច័យតាមកុំព្យូទ័រនៅព្រឹកថ្ងៃសៅរ៍ ហើយក្រុមការងារបានសម្រេចឱ្យទួន ទួនបន្តគេងទៀត បន្ទាប់ពីលទ្ធផលបង្ហាញថាស្ថានភាពរបស់គាត់គឺមិនអាចព្យាបាលបានហើយគាត់មិនអាចរស់នៅបានរឹងមាំដូចដើមនោះទេ»។
អ្នកនាំពាក្យលោក Eric Tsao បាននិយាយថា៖ «វាពិតជាឈឺចាប់ និងប្រថុយប្រថានខ្លាំងណាស់សម្រាប់ ទួន ទួនក្នុងការសង្គ្រោះគាត់ពីការប្រើថ្នាំសន្លប់»។ ក្រុមគ្រូពេទ្យសត្វបានកត់សម្គាល់ឃើញថា ក្នុងវ័យ ១៨ ឆ្នាំរបស់ ទួន ទួនគាត់បានធ្លាក់ខ្លួនឈឺក្នុងខែសីហា នៅពេលដែលគាត់ចាប់ផ្តើមប្រកាច់ ហើយរាងកាយហាក់ដូចជាចុះខ្សោយខ្លាំង និងងងុយដេកកាន់តែខ្លាំង។ ជាលទ្ធផលនៃការស្កែនវេជ្ជសាស្ត្រ បានបង្ហាញថាគាត់មានដំបៅខួរក្បាល។
កាលពីខែមុនក្រុមការងារកន្លែងសួនសត្វបានសង្ស័យថាទួន ទួនមានដុះដុំសាច់ក្នុងខួរក្បាល ដូច្នេះហើយគាត់ក៏ត្រូវបានផ្លាស់ប្តូរទៅកាន់កន្លែងថែទាំបន្ទាប់មក ការប្រកាច់បានកើតឡើងប៉ុន្មានថ្ងៃមុននេះកាន់តែញឹកញាប់ជាងមុន បើទោះបីជាបានចាក់ថ្នាំហើយក្ដី ក៏មិនអាចសម្រាលរោគសញ្ញានេះបានដែរ។
ចំណែកឯនៅលើបណ្ដាញសង្គមឯណោះវិញ អ្នកតាមដានបានបង្ហាញការកាន់ទុក្ខចំពោះការស្លាប់របស់ ទួន ទួន ខណៈដែលអភិបាលក្រុងតៃប៉ិ លោក Ko Wen-je បានថ្លែងអំណរគុណដល់ខ្លាឃ្មុំផេនដាមួយនេះសម្រាប់ការនាំមកនូវសុភមង្គលដល់ប្រជាជនតៃវ៉ាន់ និងធ្វើឱ្យសួនសត្វតៃប៉ិកាន់តែអស្ចារ្យ។
សូមរំឭកថា គូស្នេហ៍ខ្លាឃ្មុំផេនដាទាំង ២ ប្រសិនបើគេយកឈ្មោះគាត់ដាក់រួមបញ្ចូលគ្នា នោះមានន័យថា«ការរួបរួម»។ ពួកគេទាំង២ បានក្លាយជានិមិត្តរូបនៅកោះតៃវ៉ាន់ ចាប់តាំងពីឆ្នាំ ២០០៨ មក។ គួរដឹងដែរថា ខ្លាឃ្មុំភេទញី យួនយួន បានផ្តល់កំណើតដល់កូនភ្លោះញី ២ ក្បាលបន្ថែមទៀតហើយ។
ប្រទេសចិនបានប្រើប្រាស់ ការទូតខ្លាឃ្មុំផេនដា ជាយូរយារណាស់មកហើយ។ អំណោយ ទួនទួន និង យួនយួន គឺជាកាដូមួយដែលត្រូវបានគេមើលឃើញថាជាការគាំទ្រដល់តំណែងប្រធានាធិបតីចិនលោក Ma Ying-jeouនាពេលនោះ។ កន្លងមកទីក្រុងប៉េកាំងផ្តល់កម្ចី ឬប្រវាស់ខ្លាឃ្មុំផេនដាទៅឱ្យសួនសត្វនៅបរទេសហើយ បន្ទាប់ពីផ្ដល់កំណើតដល់កូនថ្មី ប្រទេសនោះត្រូវប្រគល់កូនក្នុងរយៈពេល ២ ទៅ ៣ ឆ្នាំត្រឡប់ទៅចិនវិញ ដើម្បីបានចូលរួមក្នុងកម្មវិធីបង្កាត់ពូជរបស់ចិន។
ប៉ុន្តែសម្រាប់ករណីតៃវ៉ាន់វិញជាករណីលើកលែងដោយចិនមិនបានយកកូន ឬចៅរបស់ខ្លាឃ្មុំផេនដាទៅវិញនោះទេ ដោយបានចាត់ទុកថានេះជាសំណងទៅលើការវាយលុករយៈពេលដ៏ខ្លីរបស់ប្រទេសចិនដែលបានកើតឡើងនៅចុងទសវត្សរ៍ឆ្នាំ ២០០០ ។ ទោះជាយ៉ាងណា ទំនាក់ទំនងរវាងចិននិងតៃវ៉ាន់បានធ្លាក់ចុះខ្លាំងចាប់តាំងពីឆ្នាំ ២០១៦ ដោយទីក្រុងប៉េកាំងបានកាត់ផ្តាច់ទំនាក់ទំនងផ្លូវការ និងមិនត្រឹមតែប៉ុណ្ណោះ ដំណើរទស្សនកិច្ចរបស់រដ្ឋាភិបាលរវាងភាគីទាំង ២ ក៏ត្រូវបានលុបចោលដូចគ្នា៕
