អ្នកកាសែតដែលត្រូវរបបសឹកភូមាចាប់ដាក់ពន្ធនាគារ ជំរុញឱ្យជប៉ុនដាក់សម្ពាធលើភូមា។ អ្នកកាសែតជប៉ុនម្នាក់នោះ បានអំពាវនាវឱ្យទីក្រុងតូក្យូដាក់សម្ពាធបន្ថែមទៀតលើរបបយោធាភូមា និងទទួលយកជនភៀសខ្លួន ដែលភៀសខ្លួនចេញពីប្រទេសនេះ។
លោក Toru Kubota បានជាប់ក្នុងមន្ទីរឃុំឃាំងរយៈពេល ៣ ខែកន្លះ បន្ទាប់ពីត្រូវចាប់ខ្លួននៅជិតការប្រមូលផ្តុំប្រឆាំងរដ្ឋាភិបាលនាទីក្រុងយ៉ាំងហ្គោន ក្នុងខែកក្កដា។ ខណៈមនុស្សរាប់ពាន់នាក់ ត្រូវបានចាប់ដាក់ពន្ធនាគារ ក្នុងអំឡុងពេលមានការបង្ក្រាបបង្ហូរឈាមបំបាក់បាតុករ នៅក្នុងប្រទេសមីយ៉ាន់ម៉ា ចាប់តាំងពីរដ្ឋប្រហារយោធា ក្នុងខែកុម្ភៈ ឆ្នាំ ២០២១។
លោក Kubota វ័យ ២៦ ឆ្នាំ ត្រូវបានកាត់ទោសឱ្យរស់នៅក្នុងគុក ៧ ឆ្នាំ សម្រាប់ការថតហេតុការណ៍ បាតុកម្មប្រឆាំងនឹងរដ្ឋប្រហារ។ តុលាការរបបសឹកក៏បានកាត់ទោសលើបទចោទមួយទៀត ដោយសម្រេចដាក់គុក រូបលោករយៈពេល ៣ ឆ្នាំ ពាក់ព័ន្ធរំលោភលើច្បាប់អន្តោប្រវេសន៍របស់ប្រទេសមីយ៉ាន់ម៉ា។
គាត់ត្រូវបានដោះលែង កាលពីថ្ងៃទី ១៨ ខែវិច្ឆិកា រួមជាមួយអ្នកទោសរាប់ពាន់នាក់ផ្សេងទៀត ក្នុងនោះរួមទាំងអតីតឯកអគ្គរដ្ឋទូតអង់គ្លេសលោកស្រី Vicky Bowman និងសេដ្ឋវិទូអូស្ត្រាលី លោក Sean Turnell ដែលធ្លាប់កាន់តួនាទីជាទីប្រឹក្សាមេដឹកនាំលោកស្រី Aung San Suu Kyi។
លោក Kubota បានជំរុញឱ្យប្រទេសជប៉ុន ដែលជាម្ចាស់ជំនួយ និងអ្នកវិនិយោគធំ នៅភូមាចាត់វិធានការយ៉ាងសកម្ម ចំពោះការរំលោភសិទ្ធិមនុស្ស។ លោកបាននិយាយនៅក្នុងទីក្រុងតូក្យូ កាលពីថ្ងៃចន្ទថា៖ «ប្រទេសជប៉ុនគួរតែ ពិនិត្យយ៉ាងតឹងរ៉ឹងថា តើជំនួយទាំងនេះត្រូវបានប្រើប្រាស់ ដោយយោធា ហូរទៅកាន់យោធា និងថា តើមូលនិធិទាំងនេះត្រូវប្រើប្រាស់ ដើម្បីសម្លាប់មនុស្សដែរ ឬទេ»។
ប្រទេសជប៉ុន បានប្រកាសបន្ទាប់ពីរដ្ឋប្រហារថា ខ្លួននឹងបញ្ឈប់គម្រោងជំនួយថ្មីទាំងអស់ ទោះបីជាកម្មវិធី ដែលមានស្រាប់មិនត្រូវបានប៉ះពាល់ក៏ដោយ។ ក្រសួងការពារជាតិជប៉ុន បាននិយាយកាលពីខែកញ្ញាថា ខ្លួនកំពុងបញ្ចប់កម្មវិធីដ៏ចម្រូងចម្រាស ក្នុងការបណ្តុះបណ្តាលសមាជិកនៃយោធាមីយ៉ាន់ម៉ា។
អ្នកកាសែតជប៉ុន លោក គូបូតា ក៏បានជំរុញឱ្យទីក្រុងតូក្យូទទួលយកជនភៀសខ្លួនពីមីយ៉ាន់ម៉ាបន្ថែមទៀតដោយនិយាយថា៖ «អ្វីដែលយើងត្រូវគិត គឺរបៀបការពារមនុស្សទាំងនោះ ដែលរត់ចេញពីការគ្រប់គ្រងបែបផ្តាច់ការ»។
លោកបានពណ៌នាលក្ខខណ្ឌ ក្នុងអំឡុងពេលឃុំខ្លួនដំបូងរបស់លោកថា ជា «ឋាននរក»។ ប៉ុន្តែលោកបាននិយាយថា ការដោះលែងលោកនៅក្នុងការលើកលែងទោស ចំពោះអ្នកទោសជិត ៦ ពាន់នាក់នោះ ហាក់ដូចជា «ឧបករណ៍ឃោសនា»។
លោក Kubota បានប្រាប់ទៀតថា៖ «ការពិតមនុស្សប្រហែល ១២ ០០០ នាក់ នៅភូមាកំពុងជាប់ឃុំឃាំង ដោយគ្មានហេតុផល»៕