.jpg)
បុរសម្នាក់ត្រូវបានចាប់ខ្លួន ខណៈមនុស្សកំពុងប្រមូលផ្តុំគ្នានៅតាមដងផ្លូវក្នុងទីក្រុងសៀងហៃ កាលពីថ្ងៃទី ២៧ ខែវិច្ឆិកា ឆ្នាំ ២០២២ ជាកន្លែងដែលការតវ៉ាប្រឆាំងនឹងគោលនយោបាយហ្សេរ៉ូកូវីដរបស់ចិនបានកើតឡើង។ AFP
អាជ្ញាធរចិនបានចាប់ផ្តើមការស៊ើបអង្កេតទៅលើក្រុមមនុស្សមួយចំនួនដែលបានប្រមូលផ្តុំគ្នាធ្វើបាតុកម្មប្រឆាំងនឹងយន្តការទប់ស្កាត់ការរីករាលដាលនៃជំងឺកូវីដ ១៩ កាលពីថ្ងៃចុងសប្តាហ៍ នេះបើយោងតាមពលរដ្ឋចិនមួយចំនួនដែលបានចូលរួមបាតុកម្មនៅទីក្រុងប៉េកាំងបានប្រាប់សារព័ត៌មាន Reuters ខណៈដែលប៉ូលិសនៅតែត្រូវបានដាក់ពង្រាយតាមដងផ្លូវក្នុងទីក្រុង។
បាតុករ ២ នាក់បានប្រាប់ទីភា្នក់ងារ ព័ត៌មាន Reuters ថា មានអ្នកហៅទូរស័ព្ទទៅកាន់ពួកគេដោយបានអះអាងថាជាមន្ត្រីប៉ូលិសក្រុងប៉េកាំងដោយបានសុំឱ្យពួកគេរាយការណ៍ទៅស្ថានីយប៉ូលិសកាលពីថ្ងៃអង្គារ ទី ២៩ ខែវិច្ឆិកាតាមរយៈការសរសេរបញ្ជាក់អំពីសកម្មភាពរបស់ពួកគេនៅយប់ថ្ងៃអាទិត្យជាលាយល័ក្ខអក្សរ។ សិស្សម្នាក់ក៏បានលើកឡើងផងដែរថា ខ្លួនត្រូវបានសួរនាំដោយមហាវិទ្យាល័យថាតើរូបគេបានធ្វើដំណើរទៅក្នុងតំបន់ដែលមានការតវ៉ាកើតឡើងដែរឬ ទេនិងបានឱ្យសរសេររៀបរាប់ជាលាយល័ក្ខអក្សរដូចគ្នាផងដែរ។
ពលរដ្ឋចិនម្នាក់ទៀតដែលបានឃើញការតវ៉ានៅទីក្រុងប៉េកាំងបានបដិសេធមិនបង្ហាញអត្តសញ្ញាណរបស់ខ្លួន ហើយបានលើកឡើងថា៖«យើងទាំងអស់គ្នាកំពុងលុបប្រវត្តិការជជែកគ្នាក្នុងឆាត (Chat) ទាំងអស់សង្ឃឹម»។ បុគ្គលដដែលនេះបានឱ្យដឹងថាប៉ូលិសបានសាកសួរថាតើពួកគេទទួលបានព័ត៌មានអំពីការតវ៉ាដោយវិធីណានិងអ្វីជាហេតុផលជំរុញពួកគេឱ្យទៅចូលរួម។
គេមិនច្បាស់នោះទេថាតើអាជ្ញាធរអាចកំណត់អត្តសញ្ញាណមនុស្សដែលពួកគេចង់សួរអំពីការចូលរួមក្នុងការតវ៉ានេះដោយរបៀបណាហើយកាន់តែមិនច្បាស់ទៅទៀតនោះគឺថាតើមានមនុស្សប៉ុន្មាននាក់ដែលអាជ្ញាធរគ្រោងនឹងសាកសួរ។ការិយាល័យសន្តិសុខសាធារណៈរបស់ទីក្រុងប៉េកាំងមិនបានឆ្លើយតបទៅនឹងសំណើសុំការអត្ថាធិប្បាយនោះទេ។ ដោយឡែកអ្នកនាំពាក្យក្រសួងការបរទេសចិនបានលើកឡើងថាសិទ្ធិនិងសេរីភាពត្រូវតែអនុវត្តក្រោមក្របខ័ណ្ឌច្បាប់។
គួរដឹងដែរថា ចលាចលសង្គមដ៏ធំបំផុតរបស់ចិនដីគោកនេះ ជាការតវ៉ាដែលមិនធ្លាប់មានពីមុន ចាប់តាំងពីប្រធានាធិបតីស៊ី ជីនភីងឡើងកាន់អំណាចអស់១ ទសវត្សរ៍មកនេះ។ ចំនួនករណីឆ្លងកូវីដ១៩ ដែលបានកើនឡើងខ្ពស់ជាប្រចាំហើយតំបន់ជាច្រើននៃទីក្រុងមួយចំនួនដែលកំពុងប្រឈមមុខនឹងការបិទខ្ទប់សាជាថ្មី ជាមូលហេតុចម្បងនៃការបាតុកម្មនេះ។ មន្ត្រីសុខាភិបាលចិនបានឱ្យដឹងថាការត្អូញត្អែរអំពីគោលនយោបាយកូវីដ១៩ភាគច្រើនបណ្ដាលមកពីការដែលមិនអាចរស់នៅបត់បែនបានរបស់ប្រជាពលរដ្ឋ។
លោកCheng Youquanបានប្រាប់អ្នកសារព័ត៌មានថា៖«បញ្ហាដែលត្រូវបានគូសបញ្ជាក់ដោយសាធារណជនមិនមែនសំដៅលើការបង្ការនិងគ្រប់គ្រងការរាតត្បាតនៃជំងឺកូវីដ១៩នោះទេប៉ុន្តែផ្តោតលើវិធានការបង្ការជាក់ស្ដែងនិងមធ្យោបាយត្រួតពិនិត្យរបស់អាជ្ញាធរ»។គួររំឭក ផងដែរថា ជំងឺកូវីដ១៩បាននឹងកំពុងរីករាលដាលកាន់តែខ្លាំង បើទោះបីជាប្រទេសចិនព្យាយាមដាក់ខ្លួនឱ្យនៅឯកោពីពិភពលោក និងបានទាមទារឱ្យប្រជាជនរបស់ខ្លួនអនុវត្តតាមវិធានការតឹងរឹុងយ៉ាងណាក៏ដោយ។
ការបិទខ្ទប់បានធ្វើឱ្យសេដ្ឋកិច្ចចិនមានការធ្លាក់ចុះយ៉ាងខ្លាំងបំផុត និងមានការរំខានដល់ខ្សែចង្វាក់ផ្គត់ផ្គង់សកលនិងទីផ្សារហិរញ្ញវត្ថុ។ ភាគហ៊ុនរបស់ចិននិងប្រាក់យន់ (Yuan) បានងើបឡើងវិញនៅពេលអ្នកវិនិយោគបង្ហាញសញ្ញាវិជ្ជមាន ដោយយល់ថាការតវ៉ាប្រឆាំងរបស់ពលរដ្ឋអាចជំរុញឱ្យមានការបន្ធូរបន្ថយការទប់ស្កាត់និងការបន្ធូរបន្ថយបទប្បញ្ញត្តិស្តីពីការរៃអង្គាសប្រាក់របស់អ្នកអភិវឌ្ឍន៍។ជាក់ស្ដែងសន្ទស្សន៍CSI300 Indexរបស់ប្រទេសចិនបានកើនឡើងចំនួន៣%សន្ទស្សន៍Shanghai CompositeIndexបានកើនឡើងចំនួន២,៣%និងសន្ទស្សន៍ Hang Seng Indexរបស់ហុងកុងបានកើនឡើង៥%។ មិនត្រឹមតែប៉ុណ្ណោះ ផែនការជំរុញអត្រាការចាក់វ៉ាក់សាំងបង្ការក្នុងចំណោមមនុស្សវ័យចាស់ក៏បានជួយលើកកម្ពស់និន្នាការនៃទីផ្សារនេះផងដែរ។
យោងតាមវីដេអូនៅលើប្រព័ន្ធផ្សព្វផ្សាយសង្គមមួយរបស់ចិន បានបង្ហាញពីប៉ូលិសរាប់រយនាក់បានដាក់ពង្រាយនៅទីលានដ៏ធំមួយដើម្បីរារាំងមនុស្សពីការប្រមូលផ្តុំគ្នាកាលពីយប់ថ្ងៃចន្ទនៅទីក្រុងហាងចូវ (Hangzhou)ដែលជារដ្ឋធានីនៃខេត្តចឺជាង (Zhejiang)។ វីដេអូមួយទៀតបានបង្ហាញពីហ្វូងមនុស្សកាន់ទូរស័ព្ទដៃព័ទ្ធជុំវិញប៉ូលិសខណៈពេលដែលអ្នកផ្សេងទៀតព្យាយាមទាញអ្នកដែលត្រូវបានចាប់ខ្លួនមកវិញ។ យ៉ាងណាក៏ដោយ ប៉ូលិសក្រុងហាងចូវមិនបានផ្ដល់ការអត្ថាធិប្បាយស្រាយបំភ្លឺនោះទេ។
នៅទីក្រុងសៀងហៃនិងទីក្រុងប៉េកាំងក្រុមប៉ូលិសបានដើរល្បាតតំបន់ដែលក្រុមមនុស្សមួយចំនួននៅលើតេឡេក្រាម (Telegram)បានជជែក និងបបួលគ្នាប្រមូលផ្តុំម្តងទៀត ប៉ុន្តែនៅយប់ថ្ងៃចន្ទប៉ូលិសបានបញ្ជាក់ថាមិនមានការជួបជុំគ្នាកើតឡើងនោះទេ។លោកPhilip Qin រស់នៅទីក្រុងប៉េកាំងអាយុ២២ឆ្នាំបាននិយាយថា«វាពិតជាគួរឱ្យខ្លាចណាស់»ដោយលោកចង់សំដៅទៅលើហ្វូងប៉ូលិសជាច្រើននៅតាមដងផ្លូវ។
ពលរដ្ឋដែលរស់នៅក្នុងតំបន់បានឱ្យដឹងថាប៉ូលិសបាននឹងកំពុងសួរនាំប្រជាជនដែលឆ្លងកាត់តំបន់ទាំងនោះ ដូចជាការពិនិត្យមើលទូរស័ព្ទរបស់ពួកគេដើម្បីដឹងថាតើពួកគេមានប្រើប្រាស់បណ្តាញឯកជននិម្មិត (VPNs) និងកម្មវិធីតេឡេក្រាមដែលត្រូវបានប្រើប្រាស់ដោយក្រុមអ្នកតវ៉ាដែរឬទេ។គួរដឹងដែរថា ការប្រើប្រាស់ប្រព័ន្ធ VPNs ជាការខុសច្បាប់សម្រាប់មនុស្សភាគច្រើននៅក្នុងប្រទេសចិនខណៈដែលកម្មវិធីតេឡេក្រាមត្រូវបានរដ្ឋចិនហាមមិនឱ្យប្រើប្រាស់នោះទេ។រីឯក្រុមអ្នកតវ៉ាខ្លះបានប្រើប្រាស់កម្មវិធីណាត់ជួប (Dating Apps)ដើម្បីគេចវេសពីការតាមដាននិងការត្រួតពិនិត្យរបស់ប៉ូលិស។
កាលពីសប្តាហ៍មុនបាតុកម្មតវ៉ាបានកើតឡើងអំឡុងពេលហេតុការណ៍ភ្លើងឆេះអគារមួយកន្លែងនៅភាគខាងលិចនៃទីក្រុងUrumqi ដោយអាជ្ញាធរបានលើកឡើងថាមានមនុស្សចំនួន១០នាក់បានស្លាប់ដោយសារភ្លើងឆេះនោះ។អ្នកប្រើប្រាស់បណ្ដាញអ៊ីនធឺណិតមួយចំនួនបានលើកឡើងថាវិធានការបិទខ្ទប់កូវីដ១៩ បានរារាំងដល់កិច្ចខិតខំប្រឹងប្រែងជួយសង្គ្រោះមនុស្សនៅក្នុងអគារដែលកំពុងឆាបឆេះ ប៉ុន្តែមន្ត្រីនៅទីនោះបានបដិសេធ។
អ្នកសរសេរប្លុកជាតិនិយមដ៏លេចធ្លោម្នាក់ លោក រ៉ឹនយី ដែលត្រូវជាចៅប្រុសរបស់មេដឹកនាំបក្សកុម្មុយនីស្តចិន លោករ៉ឹន ចុងយី និងអ្នកស្រី យូ លីបានសរសេរថាការតវ៉ាត្រូវបានបង្កឡើងដោយការញុះញង់ពីសំណាក់ឥទ្ធិពលរបស់បរទេស។លោករ៉ឹនបានសរសេរនៅក្នុងប្លុករបស់លោកថា«តើគោលបំណងរបស់ពួកគេគឺជាអ្វី? ទី១ គឺដើម្បីធ្វើឱ្យជម្លោះផ្ទៃក្នុងកាន់តែរីកខ្លាំងឡើង។ទី២ គឺដើម្បីមើលថាតើពួកគេអាចធ្វើឱ្យទៅជាបញ្ហានយោបាយទាំងស្រុងជុំវិញបញ្ហាការទប់ស្កាត់ការរីករាលដាលកូវីដ១៩និងគោលនយោបាយសុខភាពរបស់យើង»។
មិនត្រឹមតែប៉ុណ្ណោះ អាជ្ញាធរក៏បានព្រមានជាច្រើនដងផងដែរថាឥទ្ធិពលកម្លាំងបរទេសកំពុងបង្កគ្រោះថ្នាក់ដល់សន្តិសុខជាតិហើយបានចោទប្រកាន់ពួកគេពីបទញុះញង់ឱ្យមានការតវ៉ាទាមទារលទ្ធិប្រជាធិបតេយ្យកាលពីឆ្នាំ ២០១៩នៅទីក្រុងហុងកុង។ យ៉ាងណាក៏ដោយ ក្រុមមន្ត្រីបាននិយាយថាគោលនយោបាយកូវីដ១៩បានជួយកាត់បន្ថយចំនួនអ្នកស្លាប់រាប់ពាន់នាក់។ហើយអ្នកវិភាគជាច្រើនបានលើកឡើងថាការបន្ធូរបន្ថយគោលនយោបាយរឹងបន្តឹងមុនពេលការបង្កើនអត្រាការចាក់វ៉ាក់សាំងបង្ការអាចនាំឱ្យមានការរីករាលដាលនៃជំងឺនេះកាន់តែខ្លាំងនិងការស្លាប់កាន់តែច្រើន ខណៈមន្ទីរពេទ្យមិនមានគ្រប់គ្រាន់៕
វីដេអូ៖
