.jpg)
អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev ជួបប្រជុំជាមួយសមាជិកក្រុមប្រឹក្សាសន្តិសុខ នៅវិមានក្រឹមឡាំង ក្នុងទីក្រុងម៉ូស្គូ ថ្ងៃទី ១៨ ខែវិច្ឆិកា ឆ្នាំ ២០២២។ AFP
បន្ទាប់ពីការខ្នះខ្នែងជួយកៀរគរជំនួយសម្រាប់ប្រទេសអ៊ុយក្រែន និងការព្រលយពីការទទួលយកប្រទេសអ៊ុយក្រែន ចូលទៅក្នុងអង្គការសន្ធិសញ្ញាអាត្លង់ទិកខាងជើង ហៅកាត់ «NATO) ក្នុងពេលអនាគត មន្ត្រីជាន់ខ្ពស់រុស្ស៊ីបានវាយបកអង្គការណាតូដែលប្រៀបប្រដូចអង្គការប្រដាប់អាវុធអន្តរជាតិមួយនេះជា «អង្គការឧក្រិដ្ឋកម្ម» ដែលតំណាងឱ្យប្រជាជនសរុបមិនដល់ ១២ ភាគរយនៃប្រជាជនក្នុងពិភពលោកផង។
លោក ឌីមីទ្រី មេដវ៉េដេវ (Dmitry Medvedev) អនុប្រធានក្រុមប្រឹក្សាសន្តិសុខរុស្ស៊ី បានអះអាងកាលពីថ្ងៃអង្គារថា ពិភពលោកស៊ីវិល័យមិនត្រូវការអង្គការ NATO ដែលជា «អង្គការឧក្រិដ្ឋកម្ម» ដែលរដ្ឋជាសមាជិកមានត្រឹមតែ ១២ ភាគរយនៃចំនួនប្រជាជនពិភពលោកនោះទេ។
យោងតាមការចេញផ្សាយរបស់ទីភ្នាក់ងារព័ត៌មានរុស្ស៊ី TASS លោក មេដវ៉េដេវ បានសរសេរនៅលើបណ្តាញ Tele gram របស់លោកថា៖ «បណ្តាប្រទេសណាតូមានចំនួនមិនលើសពី ១២ ភាគរយនៃចំនួនប្រជាជននៅលើភពផែនដី។ ពិភពលោកស៊ីវិល័យមិនត្រូវការអង្គការនេះទេ។ វាគួរតែមានវិប្បដិសារីនៅចំពោះមុខមនុស្សជាតិ និងរំលាយខ្លួនឯងនៅលើមូលដ្ឋាននៃអង្គការឧក្រិដ្ឋកម្ម»។
ថ្នាក់ដឹកនាំផ្នែកសន្តិសុខរុស្ស៊ីរូបនេះ បាននិយាយថា អង្គការណាតូ «ងាយធ្វើភ្លេច» នូវអ្វីដែលខ្លួនបានធ្វើនៅទូទាំងពិភពលោក រួមទាំងការរៀបចំរដ្ឋប្រហារ និងផ្តួលរំលំមេដឹកនាំរដ្ឋស្របច្បាប់។
លោក មេដវ៉េដេវ បន្ថែមថា អង្គការ និងភាពជាអ្នកដឹកនាំរបស់ខ្លួន ក៏ហាក់ដូចជាភ្លេចអំពីការស្លាប់ និងរបួសរបស់ជនស៊ីវិលជាច្រើន ដែលបណ្តាលមកពីប្រតិបត្តិការ និងការផ្គត់ផ្គង់អាវុធដល់របបជ្រុលនិយម។
អគ្គលេខាធិការរបស់អង្គការណាតូ លោក Jens Stoltenberg កាលពីថ្ងៃអង្គារ បានបង្ហាញ ការប្តេជ្ញាចិត្តអង្គការប្រដាប់អាវុធមួយនេះដោយទទួលយកប្រទេសអ៊ុយក្រែនចូលជាសមាជិកនៅថ្ងៃណាមួយ ដែលលោកនិយាយថា«ទ្វារបើកចំហរ»។
យោងតាមការផ្សាយរបស់សារព័ត៌មាន AP អ្នកវិភាគមួយចំនួនជឿថាការសន្យាបែបនេះ បានជួយជំរុញឱ្យមានការឈ្លានពានរបស់រុស្ស៊ីកាន់តែខ្លាំងនៅឆ្នាំនេះ។ សម្ព័ន្ធសន្តិសុខដ៏ធំបំផុតរបស់ពិភពលោកក៏បានសន្យាថា នឹងបញ្ជូនជំនួយបន្ថែមទៀតដល់កងកម្លាំងអ៊ុយក្រែនដែលជាប់គាំងក្នុងការប្រយុទ្ធជាមួយកងទ័ពរុស្ស៊ី៕
វីដេអូ៖
