The Phnom Penh Post Search

Search form

Logo of Phnom Penh Post newspaper Phnom Penh Post - អាល្លឺម៉ង់​រំពឹងថា​ នឹង​បញ្ជូន​រថក្រោះ​​ Leopard2​ ឱ្យ​អ៊ុយ​ក្រែ​ន​

អាល្លឺម៉ង់​រំពឹងថា​ នឹង​បញ្ជូន​រថក្រោះ​​ Leopard2​ ឱ្យ​អ៊ុយ​ក្រែ​ន​

Content image - Phnom Penh Post
​ឯកសារ​ពិត​អំពីរ​ថក្រោះ​ប្រយុទ្ធ​ Leopard 2A4 ដែល​ផលិ​ត​ដោ​យ​ប្រ​ទេស​អាល្លឺម៉ង់​។ AFP

អាល្លឺម៉ង់​រំពឹងថា​ នឹង​បញ្ជូន​រថក្រោះ​​ Leopard2​ ឱ្យ​អ៊ុយ​ក្រែ​ន​

​សារព័ត៌មាន​អន​ឡាញ ឌែ ស្ពី​ហ្គែ​ល (Der Spiegel) របស់​អាល្លឺម៉ង់​បាន​រាយការណ៍​ផ្ដាច់មុខ ដោយ​ស្រង់​សម្ដី​ប្រភព​មិន​បញ្ចេញ​ឈ្មោះថា ក្រុង​ប៊ែ​រ​ឡាំង​គ្រោង​នឹង​បញ្ជូន​រថក្រោះ​ទំនើប Leopard 2 ទៅ​អ៊ុយ​ក្រែ​ន ដើម្បី​ជួយ​ពង្រឹង​ការប្រយុទ្ធ​ប្រឆាំងនឹង​ក​ង​ទ័ព​រុស្ស៊ី​។​

​ប្រភព​ថា អធិការបតី​អាល្លឺម៉ង់ អូ​ឡា​ហ្វ សូល បានសម្រេច​ចិត្ត​បញ្ចូល​រថក្រោះ​នេះ បន្ទាប់ពី​មានការ​ជជែក​ដេញដោល​គ្នា​ជាច្រើន​ខែ ខណៈ ប៉ុន្មាន​ថ្ងៃ​ចុងក្រោយ​នេះ​ក្រុង​ប៊ែ​រ​ឡាំង​រង​ការរិះគន់​យ៉ាងធ្ងន់ធ្ងរ ចំពោះ​ការស្ទាក់ស្ទើរ​របស់ខ្លួន​ពី​សម្ព័ន្ធមិត្ត ក្នុង​ប្លុក​ណា​តូ ដែល​ដាក់​សម្ពាធ​លើ​អាល្លឺម៉ង់​ឱ្យ​បញ្ជូន Leopard 2 ទៅ​អ៊ុយ​ក្រែ​ន​។​

​សេចក្ដីរាយការណ៍​ពី​ការសម្រេចចិត្ត​នេះ​ធ្វើឡើង​ភ្លាមៗ បន្ទាប់ពី​មន្ត្រី​សហរដ្ឋអាមេរិក បានបង្ហាញ​កាលពី​ថ្ងៃ​អង្គា​រថា រដ្ឋបាល​បៃ​ដិ​ន កំពុង​រៀបចំ​បញ្ចប់​ផែនការ​បញ្ជូន​រថក្រោះ M1 Abrams ដែល​ផលិត​ដោយ​សហរដ្ឋអាមេរិក​ទៅកាន់​អ៊ុយ​ក្រែ​ន​។ កាលពី​សប្ដាហ៍​មុន​អាល្លឺម៉ង់​បានលើកឡើង​ថា ខ្លួន​មិន​បញ្ជូន​រថក្រោះ​Leopard របស់ខ្លួន​ទៅ​អ៊ុយ​ក្រែ​ន​ឡើយ លុះត្រាតែ​សហរដ្ឋអាមេរិក​យល់ព្រម​ធ្វើ​ដូច្នេះ​ដែរ​។​

​គួរ​កត់សម្គាល់ថា ការបញ្ជូន​រថក្រោះ Leopard 2 ទៅកាន់​អ៊ុយ​ក្រែ​ន នឹង​ផ្តល់ឱ្យ​កងកម្លាំង​របស់​ប្រទេស​នេះ​នូវ​រថក្រោះ​យោធា​ដ៏​ទំនើប និង​ដ៏​មាន​ឥទ្ធិពល ដើម្បី​ប្រឆាំង​ការ​រុលទៅមុខ​របស់​កងទ័ព​រុស្ស៊ី​។ ការផ្លាស់ប្ដូរ​នេះ ក៏​នឹង​ក្លាយ​ជាការ​ប្រឆាំងនឹង​វិមាន​ក្រឹម​ឡាំង ដែល​គេ​មើលឃើញថា បាន​បង្កើន​យុទ្ធនាការ​យោធា ដើម្បី​បំបាក់​អ៊ុយ​ក្រែ​ន ដោយ​ប្រើ​ប្រព័ន្ធ​ប្រយុទ្ធ​បច្ចេកវិទ្យា​ខ្ពស់ ខណៈ​សង្គ្រាម​បន្ត​អូសបន្លាយ​ជិត​រយៈពេល ១ ​ឆ្នាំ​។​

​កន្លងមក​អាល្លឺម៉ង់​បាន​ទទូច​ទប់​ទល់នឹង​ការជំរុញ​របស់​សម្ព័ន្ធ​មិត្ត​ដោយ​លើក ឡើង​ថា ការបញ្ជូន​រថក្រោះ​រប​ស់​ខ្លួន​ទៅ​អ៊ុយ​ក្រែ​ន នឹង​បង្ក​ទាំង​ផល​វិជ្ជមាន និង​អវិជ្ជមាន​សម្រាប់​ខ្លួន​។ យ៉ាងណាមិញ កាលពី​ថ្ងៃអាទិត្យ រដ្ឋមន្ត្រីការបរទេស​អាល្លឺម៉ង់ លោកស្រី អ៊ែន​ណា​លេ​ណា ប៊ែ​រ​បក់ខ៍ បាន​ថ្លែងថា រដ្ឋាភិបាល​អាល្លឺម៉ង់​នឹងមិន​ជំទាស់​ទេ ប្រសិនបើ​ប៉ូឡូញ​ស្នើសុំ​បញ្ជូន​រថក្រោះ Leopard 2 ទៅកាន់​អ៊ុយ​ក្រែ​ន ហើយ​កាលពី​ថ្ងៃ​អង្គារ ប៉ូឡូញ ក៏​ដាក់សំណើ​នេះ​ជា​ផ្លូវការ​។​

​ចំណែកឯ​ប្រធានាធិបតី​អ៊ុយ​ក្រែ​ន លោក វ៉ូ​ឡូ​ឌី​មៀរ ហ្សេ​ឡេ​ន​ស្គី បាន​ទទូច​សុំ​រថក្រោះ​ម្ដង​ហើយ​ម្ដងទៀត ហើយ​ស្នើឱ្យ​បណ្តា​ប្រទេស​នានា​បញ្ឈប់​ការឈ្លោះប្រកែក​គ្នា​លើ​បញ្ហា​នេះ​។ ជាមួយគ្នា​នោះ​មន្ត្រីជាន់ខ្ពស់​អ៊ុយ​ក្រែ​ន​ផ្សេងទៀត​អះអាងថា ការពន្យារពេល​បញ្ជូន​រថក្រោះ​ទំនើប​ឱ្យ​អ៊ុយ​ក្រែ​ន កំពុង​សម្លាប់​ប្រជាជន​អ៊ុយ​ក្រែ​ន ខណៈ​រុស្ស៊ី​បង្កើន​ភាព​តានតឹង​នៅ​សមរភូមិ​។​

​រុស្ស៊ី​ឯនោះ​វិញ ដូច​សព្វ​រាល់ដង បាន​ព្រមាន​ពី​ការផ្គត់ផ្គង់​អាវុធ​ឱ្យ​អ៊ុយ​ក្រែ​ន ហើយ​ថែមទាំង​គំរាមកំហែង​ដល់​អាល្លឺម៉ង់​។

​នៅពេល​ត្រូវបាន​សួរ​ក្នុង​សន្និសីទ​សារព័ត៌មាន​ប្រចាំថ្ងៃ​អំពី​ប្រតិកម្ម​របស់​រុស្ស៊ី ប្រសិន បើ​ទីក្រុង​ប៊ែ​រ​ឡាំង​យល់ព្រម​បញ្ជូន​រថក្រោះ​ឱ្យ​អ៊ុយ​ក្រែ​ន អ្នកនាំពាក្យ​វិមាន​ក្រឹម​ឡាំង លោក ឌ​មី​ទ្រី ប៉េ​ស្កូវ បាន​ថ្លែងថា ទំនាក់ទំនង រវាង​ប្រទេស​ទាំង​ ២ ស្ថិតក្នុង​កម្រិត​ទាប​រួចទៅហើយ​។

​លោក​បន្ថែមថា បច្ចុប្បន្ននេះ​មិនមាន​ការសន្ទនា​ធំៗ​ជាមួយ​អាល្លឺម៉ង់ ឬ​ជាមួយ​សហភាព​អឺរ៉ុប ក៏ដូចជា​ប្រទេស​ណា​តូ​ផ្សេងទៀត​ទេ​៕

អត្ថបទគួរចាប់អារម្មណ៍