​រយៈ​ពេល​ជិត​ ១ ​ឆ្នាំ​ ដែលរុស្ស៊ីដក​ខ្លួន​ចេញ​ពី​កិច្ច​ព្រមព្រៀង​សន្តិភាព​ជាមួយ​ជប៉ុន​ភាគី​រុស្ស៊ី​​បាន​​ឱ្យ​ដឹង​​នៅ​ថ្ងៃ​អាទិត្យ​​ថា ​ខ្លួន​នឹង​មិន​ធ្វើ​កិច្ច​ចរចា​ប្រចាំឆ្នាំ​ជាមួយ​ជប៉ុន​លើ​ការ​បន្ត​កិច្ច​ព្រម​ព្រៀង​ដែល​អនុញ្ញាត​ឱ្យ​អ្នក​នេសាទ​ជប៉ុន​ធ្វើ​ប្រតិបត្តិ​ការ​នៅ​ជិតកោះ​ដែល​មាន​ជម្លោះ។

ភាគី​រុស្ស៊ី​ បាន​និយាយ​ថា ​​ជប៉ុន​បាន​ចាត់​វិធានការ​ប្រឆាំង​នឹង​រុស្ស៊ី ដែល​លើក​ទ័ព​​ចូល​លុក​លុយ​ប្រទេស​អ៊ុយក្រែន។ ​

កោះ​ដែល​ស្ថិត​នៅភាគ​ខាង​ជើង​នៃ​កោះ​ហុកកៃ​ដូរ​បស់​ប្រទេស​ជប៉ុន​ត្រូវបាន​គេ​ស្គាល់​នៅ​ក្នុង​ប្រទេស​រុស្ស៊ី​ថា​ជា​កោះ គូរីល (Kuril) ​និង​នៅ​ក្នុង​ប្រទេស​ជប៉ុន​ជា​ដែន​ដី​ភាគ​ខាង​ជើង ​ហើយ​​​បាន​ក្លាយ​ជា​ឫសគល់​នៃ​ភាពតាន​តឹង​ជា​ច្រើន​ទសវត្សរ៍​រវាង​ប្រទេស​ជិតខាង​ទាំង​២ ​នៅ​តំបន់​អាស៊ី​ខាង​កើត​នេះ​។

​ដោយ​បាន​ដក​ស្រង់​ពី​ក្រសួង​ការបរទេស​រុស្ស៊ី RIA ​ដែល​ជា​ទីភ្នាក់ងារ​ ព័ត៌មាន​រដ្ឋ​រុស្ស៊ី​ បាន​រាយការណ៍​ថា៖​«នៅ​ក្នុង​បរិបទ​នៃ​វិធាន​ការ​ប្រឆាំង​រុស្ស៊ី​ដែល​ធ្វើ​ឡើង​ដោយ​រដ្ឋា​ភិបាល​ជប៉ុន ... ភាគី​រុស្ស៊ី​បាន​ជូន​ដំណឹង​ដល់​ទីក្រុង​តូក្យូ​ថា ខ្លួន​មិន​អាច​យល់ព្រម​លើការ​រៀបចំ​ការ​ពិគ្រោះ​យោបល់​អន្តរ​រដ្ឋាភិបាល​ស្តី​ពី​ការ​អនុវត្ត​កិច្ច​ព្រមព្រៀង​នេះ​ទេ»​។

ប្រទេស​ជប៉ុន​ ដែល​ជា​សម្ព័ន្ធ​មិត្ត​ដ៏​សំខាន់​របស់​អាមេរិក​បាន​ដាក់​ទណ្ឌកម្ម​លើ​បុគ្គល ​និង​អង្គការ​រុស្ស៊ី​រាប់សិប​នាក់​ភ្លាម​ៗ​ បន្ទាប់​ពី​រុស្ស៊ី​បាន​បើក​ការឈ្លាន​ពាន​របស់​ខ្លួន​លើ​អ៊ុយ​ក្រែន​កាល​ពីថ្ងៃ​ទី២៤​ខែ​កុម្ភៈ​ឆ្នាំមុន។

​កាល​​ពី​ថ្ងៃ​​សុក្រ​កន្លង​ទៅ​នេះ ជ​ប៉ុន​បាន​​រឹត​បន្តឹង​​ទណ្ឌកម្ម​​លើ​​រុស្ស៊ី​​ជា​ការ​ឆ្លើយ​​តប​នឹង​ការ​វាយ​​ប្រហារ​​ផ្លូវ​អាកាស​របស់ រុស្ស៊ី​​លើ​ទីក្រុង​ជា​ច្រើន​របស់​ប្រទេស​អ៊ុយក្រែន។

​​យោង​សេចក្តី​រាយការណ៍​របស់​ទីភ្នាក់ងារ​ព័ត៌មានរ៉យទ័រ​របស់​អង់គ្លេស ​ប្រទេស​រុស្ស៊ី​កាល​ពី​ខែ​មិថុនា​បាន​ផ្អាក​កិច្ច​ព្រមព្រៀង​ឆ្នាំ១៩៩៨​ ដែល​អនុញ្ញាត​ឱ្យ​ទូក​ជប៉ុន​ចូល​នេសាទ​នៅ​ជិត​កោះ​ដែល​មាន​ជម្លោះ​​ ហើយ​ប្រធាន​ខុទ្ទកាល័យ​របស់​ជប៉ុន​កាល​ពីថ្ងៃ​ចន្ទ​បាន​ប្រាប់​សន្និសីទ​សារព័ត៌មាន​ថា​ជប៉ុន​នឹង​ទាមទារ​ឱ្យ​រុស្ស៊ី​ចូលរួម​ក្នុង​កិច្ចចរចា​ប្រចាំ​ឆ្នាំ ដូច្នេះ​ប្រតិបត្តិការ​នេសាទ​នៅ​ឆ្នាំ​នេះ​អាច​ចាប់​ផ្តើម។

ប៉ុន្តែ​​ក្រសួង​​ក្រសួង​ការបរទេស​រុស្ស៊ី​ ​បាន​​និយាយ​ថា ​​នឹង​មិន​មាន​ភាព​ប្រសើរ​ឡើង​ក្នុង​ទំនាក់​​ទំនង​រវាង​ពួក​គេ​ទាំង​២ ​ឡើយ លុះ​ត្រា​តែ​ជប៉ុន​​បង្ហាញនូវ​«ការ​គោរព»។

ទី​ភ្នាក់ងារ​​ព័ត៌មាន​ RIA​ បាន​ឱ្យ​ដឹង​ថា៖​«ដើម្បី​ត្រឡប់​ទៅ​ការ​សន្ទនា​ធម្មតា​វិញ អ្នកជិត​ ​ជប៉ុន​​គួរតែ​​បង្ហាញ​​ការគោរព​​​​ជា​ដំបូង​​ចំពោះ​ប្រទេស​របស់​យើង ដែល​ចង់​ធ្វើ​ឱ្យ​​ទំនាក់ទំនង​ទ្វេ​ភាគី​​ប្រសើរ​ឡើង»។

រុស្ស៊ី​ និង​ជប៉ុន​​បាន​បន្ត​មើល​មុខ​គ្នា​មិន​ត្រង់​ចាប់​តាំង​ពី​បញ្ចប់​សង្គ្រាម​លោក​លើក​ទី២​មកម្ល៉េះ​។ ​​អរិភាព​នៃ​​​ប្រទេស​មហា​​​អំណាច​យោធា​និង​សេដ្ឋកិច្ច​​ទាំងពីរ​ ដោយ​សារតែ​ការ​ប្រឈម​មុខ​ដាក់​គ្នា​លើ​ប្រជុំកោះ​គូរីល​នោះ​ ដែល​ត្រូវ​បាន​រឹបអូស​ដោយ​សហភាព​សូវៀត នៅ​ចុង​បញ្ចប់​នៃ​សង្រ្គាម៕

វីដេអូ៖