.jpg)
មេដឹកនាំកូរ៉េខាងជើងលោក គីម ជុងអ៊ុន។ AFP
កូរ៉េខាងជើងប្រហារជីវិតមនុស្សដោយសារគ្រឿងញៀន និងការបង្ហាញចេតនាគាំទ្រកូរ៉េខាងត្បូង ព្រមទាំងសកម្មភាពជំនឿសាសនាផង។ នេះបើតាមការផ្សាយរបស់ទីភ្នាក់ងារព័ត៌មានរ៉យទ័រដែលដកស្រង់របាយការណ៍ពីក្រសួងបង្រួបបង្រួមរបស់កូរ៉េខាងត្បូង។
នៅចុងខែមីនានេះ ក្រសួងបង្រួបបង្រួមរបស់កូរ៉េខាងត្បូង ចេញរបាយការណ៍កម្រាស់ ៤៥០ ទំព័រ ស្តីពីសក្ខីកម្មដែលប្រមូលបាននៅចន្លោះឆ្នាំ ២០១៧ ដល់ឆ្នាំ ២០២២ ពីជនជាតិកូរ៉េខាងជើងជាង ៥០០ នាក់ ដែលបានរត់ចោលស្រុកចូលទៅកូរ៉េខាងត្បូង។របាយការណ៍នោះបានបង្ហាញ «សិទ្ធិរស់រានមានជីវិតរបស់ពលរដ្ឋកូរ៉េខាងជើងហាក់ដូចជាត្រូវបានគំរាមកំហែងយ៉ាងខ្លាំង»។
របាយការណ៍បន្តថា៖ «ការកាត់ទោសត្រូវបានអនុវត្តជាទូទៅចំពោះឧក្រិដ្ឋកម្មគ្រឿងញៀន ការចែកចាយវីដេអូនានាដែលផ្សាយដោយកូរ៉េខាងត្បូង និងសកម្មភាពសាសនានិងអបិយជំនឿ»។
ទីភ្នាក់ងារ Reuters មិនអាចផ្ទៀងផ្ទាត់ដោយឯករាជ្យនូវការរកឃើញរបស់រដ្ឋាភិបាលកូរ៉េខាងត្បូងនោះទេ ប៉ុន្តែពួក គេស្របតាមការស៊ើបអង្កេតរបស់អង្គការសហប្រជាជាតិ និងរបាយការណ៍ពីអង្គការមិនមែនរដ្ឋាភិបាល។ ប្រទេសកូរ៉េខាងជើងបានច្រានចោលចំពោះរិះគន់ទាំងអស់នេះ។
របាយការណ៍របស់កូរ៉េខាងត្បូងបានផ្តល់ព័ត៌មានលម្អិតអំពីការរំលោភសិទ្ធិដែលរីករាលដាលនៅក្នុងសហគមន៍ ជំរុំពន្ធនាគារ និងកន្លែងផ្សេងទៀត រួមទាំងការប្រហារជីវិតជាសាធារណៈ ការធ្វើទារុណកម្ម និងការចាប់ចងតាមអំពើចិត្ត។
កូរ៉េខាងត្បូងបាននិយាយថា ការស្លាប់ និងការធ្វើទារុណកម្មកើតឡើងជាទៀងទាត់នៅក្នុងមន្ទីរឃុំឃាំង ហើយមនុស្សមួយចំនួនត្រូវបានប្រហារជីវិតភ្លាមៗ បន្ទាប់ពីត្រូវបានចាប់ខ្លួនពេលដែលអ្នកទាំងនោះព្យាយាមឆ្លងព្រំដែន។
ប្រធានាធិបតីកូរ៉េខាងត្បូង Yoon Suk-yeol បាននិយាយថា របាយការណ៍នេះគួរតែជូនដំណឹងដល់សហគមន៍អន្តរ ជាតិអំពីការរំលោភបំពានដ៏អាក្រក់របស់កូរ៉េខាងជើងទៅលើពលរដ្ឋ។
លោកនិយាយថា កូរ៉េខាងជើងមិនសមទទួលបានជំនួយសេដ្ឋកិច្ចសូម្បីតែ ១ កាក់ ១ សេន ស្របពេលដែលប្រទេសនេះនៅមានមហិច្ឆតានុយក្លេអ៊ែរ។
ប្រធានាធិបតីកូរ៉េខាងត្បូង Yoon Suk-yeol សព្វថ្ងៃខុសប្លែកពីអ្នកកាន់តំណែងអាណត្តិមុនដោយសារគាត់តែងបញ្ចេញវោហារស័ព្ទ ខ្លាំងៗទៅកាន់ប្រទេសកូរ៉េខាងជើង។ផ្ទុយពីប្រធានាធិបតីអាណត្តិមុនដែលមានជំហរទន់ភ្លន់ចំពោះកូរ៉េខាងជើង ព្រមទាំងព្យាយាមធ្វើឱ្យប្រសើរឡើងនូវទំនាក់ទំនងជាមួយមេដឹកនាំលោក Kim Jong Un។
.
ក្រសួងបង្រួបបង្រួមរបស់កូរ៉េខាងត្បូងបង្ហាញថា ប្រជាជនកូរ៉េខាងជើងជិត ៣៤ ០០០ នាក់បានតាំងទីលំនៅក្នុងប្រទេសកូរ៉េខាងត្បូង ប៉ុន្តែចំនួនអ្នករត់ចោលស្រុកបានធ្លាក់ចុះយ៉ាងខ្លាំងដោយសារកូរ៉េខាងជើងបាន រឹតបន្តឹងសន្តិសុខតាមព្រំដែនកាន់តែតឹងរ៉ឹង។ទិន្នន័យរបស់ក្រសួងបានបង្ហាញថា ពលរដ្ឋកូរ៉េខាងជើង៦៣នាក់បានរត់ឆ្លងព្រំដែនចូលមកកូរ៉េខាងត្បូងកាលពីឆ្នាំ ២០២១។ ចំណែកនៅឆ្នាំ ២០២២ មានពលរដ្ឋកូរេខាងជើង ៦៧ នាក់ រត់ឆ្លងព្រំដែនចូលមកសុំសិទ្ធិរស់នៅក្នុងកូរ៉េខាងត្បូង៕
