ប្រទេសថៃៈ ខេត្តឈៀងម៉ៃ ប្រទេសថៃដែលជាតំបន់ទេសចរណ៍ដ៏ពេញនិយមមួយនៅអាស៊ីផងនោះ បានរងការគំរាមកំហែងដោយសារអាកាសធាតុអាក្រក់នៅពេលថ្មីៗនេះ។ ផ្សែងអ័ព្ទបណ្ដាលមកពីភ្លើងឆេះព្រៃ និងកម្រិតធូលីពុល PM2.5 បានគ្របដណ្ដប់ភូមិស្រុកមួយចំនួននៃខេត្តឈៀងម៉ៃ។
រដ្ឋបាលខេត្តឈៀងម៉ៃបានប្រកាសដាក់ភូមិចំនួន ៣ នៃស្រុក Muang និង Hang Dong ថា ជាតំបន់គ្រោះថ្នាក់ព្រោះតែធូលីពុល PM2.5 កើនឡើងខ្ពស់ហួសកម្រិតសុវត្ថិភាព។
សារព័ត៌មាន thaipbsworld បានចេញផ្សាយដោយស្រង់លិខិតរបស់អភិបាលរងខេត្តឈៀងម៉ៃ លោកChatchawarl Panya ដែលសម្រេចដាក់ ភូមិ ១ ក្នុងស្រុក Hang Don និងភូមិចំនួន ២ ទៀតក្នុងស្រុក Muang នៃខេត្តនេះទៅជាតំបន់គ្រោះថ្នាក់។
តាមច្បាប់ស្តីពីការបង្ការ និងកាត់បន្ថយគ្រោះមហន្តរាយសាធារណៈនៅថៃរដ្ឋាភិបាល និងភ្នាក់ងាររដ្ឋាភិបាលមូលដ្ឋាន និងផ្នែកពាក់ព័ន្ធទាំងអស់ត្រូវផ្តល់ជំនួយជួយដល់ប្រជាពលរដ្ឋនៅក្នុងភូមិចំនួន ៣ ខែ។
ឈៀងម៉ៃ ត្រូវបានគ្របដណ្ដប់ដោយធូលីពុល PM2.5 ម្តងទៀតនៅថ្ងៃសៅរ៍ ទី ១ ខែមេសា ដោយតំបន់ខ្លះនៃខេត្តនេះមានកម្រិត PM2.5 រហូត ៣៤១ មីក្រូម៉ែត្រ។
ទីភ្នាក់ងារអភិវឌ្ឍន៍បច្ចេកវិទ្យាអវកាស Geo-Informatics (GISTDA) បានរាយការណ៍ពីចំណុចដែលរលកកម្តៅកើនឡើងខ្លាំងក្នុងខេត្តមួយចំនួននៃប្រទេសថៃដែលរួមមាននៅខេត្តឈៀងម៉ៃ និងឈៀងរ៉ៃ។
កាលពីថ្ងៃសុក្រទី ៣១ ខែមីនា ទីភ្នាក់ងារអភិវឌ្ឍន៍បច្ចេកវិទ្យាអវកាស Geo Informatics (GISTDA) បានរាយការណ៍ថា មានទីតាំងកើតមានរលកកម្តៅចំនួន ៥០៨ នៅឈៀងម៉ៃ និងចំណុចទីតាំងកើតមានរលកកម្តៅចំនួន ៣៧៩ នៅឈៀងរ៉ៃ។
អាជ្ញាធរពាក់ព័ន្ធនៃប្រទេសថៃបានជួបប្រជុំគ្នាកាលពីថ្ងៃសៅរ៍ ដើម្បីព្យាយាមរកមធ្យោបាយដោះស្រាយបញ្ហាអ័ព្ទ ប៉ុន្តែចំណាត់ការជាក់ស្ដែងនៅមិនប្រកាសនៅឡើយ។
ផ្នែកខ្លះទៀតនៃខេត្តឈៀងម៉ៃបានជួបបញ្ហាភ្លើងឆេះព្រៃក្នុងនោះស្រុក Mae Sai ក្នុងខេត្ត Chiang Rai ត្រូវបានគ្របដណ្តប់ដោយអ័ព្ទពីភ្លើងឆេះព្រៃអស់រយៈពេលជាង ១ សប្តាហ៍មកហើយនាំឱ្យកម្រិតធូលីពុល PM2.5 ជាមធ្យមកើនឡើងដល់ ៣០៩ មីក្រូម៉ែត្រ ហើយចំនួននេះត្រូវបានចាត់ទុកថាជា ការគំរាមកំហែងដល់សុខភាព។
កាសែតថៃបានជួបសម្ភាសអាជីវករនៅផ្សារ នៃស្រុក Mae Sai ខេត្តឈៀងម៉ៃដែលបានអះអាងថា បញ្ហាអ័ព្ទ (អាកាសធាតុ) បានជំរុញឱ្យភ្ញៀវទេសចរចាកចេញពីតំបន់នេះ ដោយមិនដឹងថាពេលណានឹងបានប្រសើរឡើងឡើយ។
ប្រតិបត្តិករទេសចរណ៍នៅស្រុកឈៀងសាន ខេត្តឈៀងរ៉ៃ បាននិយាយថា មានភ្ញៀវប្រហែល ២០% បានលុបចោលសំបុត្រដែលពួកគេបានកក់សម្រាប់ដំណើរកម្សាន្តតាមដងទន្លេមេគង្គ៕