.jpg)
ប្រធានាធិបតីឥណ្ឌូនេស៊ី លោក Joko Widodo បានបើកការដ្ឋានលើខ្សែរថភ្លើងល្បឿនលឿនជាមួយប្រទេសចិន កាលពីឆ្នាំមុន។ រូបថត AFP
ឥណ្ឌូនេស៊ីរំពឹងថា នឹងបញ្ចប់ការចរចាជាមួយប្រទេសចិន នៅពេលដ៏ខ្លីខាងមុខនេះ ដើម្បីទទួលបានប្រាក់កម្ចីបន្ថែមចំនួន ៥៦០ លានដុល្លារអាមេរិក យកទៅអនុវត្តគម្រោងរថភ្លើងល្បឿនលឿន។ នេះបើតាមរដ្ឋមន្ត្រីជាន់ខ្ពស់ឥណ្ឌូនេស៊ីដែលថ្លែងប្រាប់អ្នកកាសែតនៅថ្ងៃទី ១០ ខែមេសា។
គម្រោងរថភ្លើងល្បឿនលឿននេះ នឹងតភ្ជាប់រដ្ឋធានីហ្សាកាតាទៅកាន់មជ្ឈមណ្ឌលវាយនភណ្ឌ Bandung។
ប្រទេសឥណ្ឌូនេស៊ីស្វែងរកប្រាក់កម្ចីថ្មីពីធនាគារអភិវឌ្ឍន៍ចិនដើម្បីបង្គ្រប់លើការចំណាយប្រមាណជាង ១ ពាន់ ២ រយលានដុល្លារ។
មន្ត្រីឥណ្ឌូនេស៊ីបាននិយាយថា ការចំណាយសរុបដែលឥណ្ឌូនេស៊ីទទួលបានពីចិនតាមរយៈគំនិតផ្តួចផ្តើមខ្សែក្រវាត់ និងផ្លូវ (BRI) បានកើនឡើងដល់ជាង ៧ពាន់លានដុល្លារអាមេរិក។
ទេសរដ្ឋមន្ត្រីឥណ្ឌូនេស៊ីលោក Luhut Pandjaitan បានលើកឡើងកាលពីសប្ដាហ៍មុនថា ប្រទេសចិន បានកាត់បន្ថយអត្រាការប្រាក់លើប្រាក់កម្ចីបន្ថែមពី៤%មកនៅត្រឹម៣,៤%។លោកថា ឥណ្ឌូនេស៊ីចង់ឱ្យចិនបញ្ចុះអត្រាការប្រាក់មកនៅត្រឹម២%វិញ។
កាលពីសប្ដាហ៍មុនលោក Luhut និយាយក្នុងសនិ្នសីទកាសែតមួយថា ៖«ចិនបានយល់ព្រម (ចុះការប្រាក់) ក្រោម៤%ភាគរយ ប៉ុន្តែយើងចង់បានទាបជាងនេះ(២%)។កាលពីឆ្នាំ២០១៧ ធនាគារអភិវឌ្ឍន៍ចិន បានផ្តល់កម្ចី ឱ្យសម្ព័ន្ធក្រុមហ៊ុនឥណ្ឌូនេស៊ី និងក្រុមហ៊ុនចិនដែលសាងសង់ផ្លូវរថភ្លើងប្រមាណជាង៤, ៥៥ ប៊ីលានដុល្លារដោយមានអត្រាការប្រាក់ ២ ភាគរយហើយរយៈពេលកម្ចី៤០ឆ្នាំ។
រដ្ឋលេខាធិការក្រសួងកិច្ចការសមុទ្រនិងសម្របសម្រួលការវិនិយោគឥណ្ឌូនេស៊ីលោក Septian Hario Seto បាននិយាយថា ការចរចាក៏នឹងបន្ត ដោយ ឥណ្ឌូនេស៊ីចង់បានប្រាក់កម្ចីថ្មីនេះស្រដៀងនឹងលក្ខខណ្ឌកាលពីឆ្នាំ ២០១៧ ដែលមានរយៈពេលអនុគ្រោះពី១០ទៅ១៥ឆ្នាំ។
លោកបន្ថែមថា ប្រទេសចិនចង់ឱ្យរដ្ឋាភិបាលឥណ្ឌូនេស៊ីធានាប្រាក់កម្ចីហើយមានក្រុមហ៊ុនរដ្ឋមួយនៅពីក្រោយគម្រោងនេះ ខណៈដែលទីក្រុងហ្សាការតាពេញចិត្តក្នុងការតែងតាំងក្រុមហ៊ុនឯកជនជាអ្នកធ្វើការលើគម្រោងនេះ។
ទាក់ទងនឹងការប្រើប្រាស់កម្ចីពីចិននេះប្រទេសឥណ្ឌូនេស៊ីចង់ឱ្យផ្នែកឯកជនទទួលធ្វើការងារនេះដោយផ្អែកលើកមូលដ្ឋានអាជីវកម្មខណៈដែលប្រទេសជាច្រើនបង្ហាញក្ដីបារម្ភពីអន្ទាក់បំណុលរបស់ប៉េកាំង។
ទោះជាយ៉ាងណាក្ដី រដ្ឋាភិបាលឥណ្ឌូនេស៊ីបានបន្ថែមប្រាក់ដែលបានពីថវិកាជាតិប្រមាណជាង២១៤ លានដុល្លារអាមេរិករួចទៅហើយចូលទៅក្នុងគម្រោងសាងសង់នេះ ព្រោះតែការចំណាយកើនឡើងច្រើនជាងការព្យាករណ៍ទុក។
លោក Luhut បាននិយាយថា ផ្លូវរថភ្លើងនេះត្រូវបានគេរំពឹងថានឹងដំណើរការពាណិជ្ជកម្មនៅខែសីហាខាងមុខ៕
