ជាទូទៅគេតែងសង្កេតឃើញមានករណីបុគ្គលខ្លះបានលួចថតរូបអ្នកដទៃរួចយកមកផ្សព្វផ្សាយសាធារណៈទាំងម្ចាស់រូបមិនបានដឹងខ្លួន ប៉ុន្តែតាមច្បាប់ការធ្វើដោយគ្មានការអនុញ្ញាតពីម្ចាស់រូបបែបនេះ គឺត្រូវប្រឈមមុខនឹងផ្លូវច្បាប់។
ចង់ដឹងថា តើទង្វើបែបនេះត្រូវប្រឈមនឹងផ្លូវច្បាប់យ៉ាងណានោះ ភ្នំពេញ ប៉ុស្ដិ៍ បានសុំការពន្យល់ពីលោកមេធាវី លី កុសល ដែលមានការិយាល័យបម្រើការនៅផ្ទះលេខ ៤៥Eo ផ្លូវលេខ ៩ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ដែលមានខ្លឹមសារដូចខាងក្រោម៖
ឧបមាថាលោក (ក) បានចូលទទួលទានអាហារក្នុងហាងមួយហើយគាត់បានឃើញនារីម្នាក់ ក៏ថតរូបនារីនោះដោយគេមិនដឹងខ្លួន តើទង្វើរបស់លោក (ក) បែបនេះត្រឹមត្រូវឬទេ?
បញ្ហានេះម្ចាស់រូបថតមានសិទ្ធិខាងរូបភាពដែលជាផ្នែកមួយនៃសិទ្ធិបុគ្គលដែលទទួលបានការការពារដោយច្បាប់ ដូច្នេះទង្វើរបស់លោក (ក) ធ្វើបែបនេះមិនត្រឹមត្រូវទេ ប្រសិនបើការថតនោះពុំបានសុំការអនុញ្ញាតពីនារីនោះ។
ចុះបើឧបមាថា លោក (ក) បានយករូបនារីនោះទៅចែកចាយបន្តទៀត តើនារីនោះអាចប្តឹង លោក (ក) បានទេព្រោះថា នាងមិនបានអនុញ្ញាតផងនោះ?
ចុះបើលោក (ក) ថតរូបអ្នកសិល្បៈល្បីឈ្មោះម្នាក់ ខណៈលោក (ក) ឃើញតាមផ្លូវ តែបុគ្គលម្នាក់នោះមិនដឹងខ្លួនទេ ហេតុដែលលោក (ក) ថតរូបបុគ្គលនោះ ដោយសារគាត់គិតថាជាបុគ្គលល្បីឈ្មោះ។ តើករណីបែបនេះយ៉ាងម៉េចដែរ?
ករណីនេះលោក (ក) គឺបានបំពាន និងរំលោភលើសិទ្ធិខាងរូបភាពអាចនឹងត្រូវទទួលទោសខាងរដ្ឋប្បវេណីផង និងខាងព្រហ្មទណ្ឌផង។
យោងតាមក្រមរដ្ឋប្បវេណីក្នុងករណីមានការថត ឬផ្សព្វផ្សាយរូបភាពដោយគ្មានការព្រមព្រៀងពីម្ចាស់រូប ម្ចាស់រូបមានសិទ្ធិ៖
-ទាមទារឱ្យបញ្ឈប់ (មាត្រា ១១)៖
ដូចជាពេលឃើញគេលើកម៉ាស៊ីនថតចង់ថត សាមីខ្លួនអាចហាមឃាត់មិនឱ្យថត។
-ទាមទារឱ្យដកចេញនូវលទ្ធផលនៃសកម្មភាពរំលោភ (មាត្រា ១២)៖ ប្រសិនបើរូបភាពត្រូវបានថតរួចទៅហើយ សាមីខ្លួនអាចទាមទារឱ្យលុបរូបនេះចេញពីម៉ាស៊ីនថតវិញ។ ប្រសិនបើរូបថតនេះត្រូវបានយកទៅចុះផ្សាយរួចហើយ (ដូចជា ចុះផ្សាយនៅលើទំព័រវេបសាយជាដើម) ម្ចាស់រូបអាចទាមទារឱ្យដករូបនេះចេញវិញ។
-ទាមទារសំណងការខូចខាត (មាត្រា ១៣)៖ ប្រសិនបើការថតរូប ឬការផ្សព្វផ្សាយរូបភាពនេះបានបង្កការខូចខាតណាមួយ ម្ចាស់រូបអាចទាមទារសំណងខូចខាតពីអ្នកប្រព្រឹត្តល្មើសបាន។ សិទ្ធិទាមទារសំណងខូចខាតនេះ អាចអនុវត្តព្រមគ្នាជាមួយសិទ្ធិទី ២ ខាងលើ មានន័យថា ម្ចាស់រូបអាចទាមទារឱ្យបញ្ឈប់ការចុះផ្សាយរូបភាពផង ហើយអាចទាមទារឱ្យសងការខូចខាតផង។
+ជាគោលការណ៍គឺត្រូវតែមានការព្រមព្រៀងពីម្ចាស់រូបជាមុនសិនទាំងការថតរូប និងការយករូបថតទៅផ្សព្វផ្សាយ ព្រោះថាការព្រមព្រៀងឱ្យថត មិនមែនមានន័យថា ឱ្យយករូបថតនេះទៅផ្សព្វផ្សាយទេ។
ការព្រមព្រៀងឱ្យថត ឬឱ្យចុះផ្សាយរូបថត អាចជាការព្រមព្រៀងដោយជាក់ច្បាស់ (ម្ចាស់រូបប្រាប់អ្នកថតថា ខ្លួនអនុញ្ញាតឱ្យថតរូប ឬយករូបថតទៅផ្សព្វផ្សាយ) ឬដោយតុណ្ហី (ម្ចាស់រូបដឹងដែរថា គេថត តែមិនជំទាស់ ឬដឹងដែរថា គេយករូបទៅចុះផ្សាយតែមិនជំទាស់ គឺមានន័យស្មើនឹងយល់ព្រមឱ្យគេថតរូប ឬឱ្យគេយករូបថតទៅចុះផ្សាយ)។
ក៏ប៉ុន្តែអ្នកថត គួរតែស្វែងរកការព្រមព្រៀងឱ្យបានជាក់ច្បាស់ពីម្ចាស់រូបប្រសើរជាងការព្រមព្រៀងដោយតុណ្ហី ជាពិសេសបើចង់យករូបថតគេទៅផ្សព្វផ្សាយ ពីព្រោះថា បើគ្មានការព្រមព្រៀងដោយជាក់ច្បាស់ជាមុនទេ ម្ចាស់រូបមិនត្រឹមតែអាចទាមទារឱ្យដករូបនេះចេញវិញទេ ប៉ុន្តែថែមទាំងអាចទាមទារសំណងជំងឺចិត្តទៀតផង យោងតាមក្រមរដ្ឋប្បវេណីមាត្រា ១៣ ហើយអ្នកថតក៏អាចនឹងទទួលទោសជាប់ពន្ធនាគារ និងការពិន័យ តាមមាត្រា ៣០២ នៃក្រមព្រហ្មទណ្ឌ។ (សូមរង់ចាំអានវគ្គបន្ដនៅសប្ដាហ៍ក្រោយ)