.jpg)
លោក មេធាវី លី កុសល ពេលកំពុងបំពេញការងារកន្លងមក។ រូបថត សហការី
កាលពីថ្ងៃចន្ទសប្ដាហ៍មុន ភ្នំពេញ ប៉ុស្ដិ៍ បានផ្សព្វផ្សាយមួយវគ្គរួចហើយពីការប្រឈមមុខនឹងផ្លូវច្បាប់ ចំពោះករណីលួចថតរូបអ្នកដទៃយកមកផ្សព្វផ្សាយដោយគ្មានការអនុញ្ញាត តាមរយៈការពន្យល់ពីលោក មេធាវី លី កុសល ដែលមានការិយាល័យបម្រើការនៅផ្ទះលេខ ៤៥Eo ផ្លូវលេខ ៩ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យរាជធានីភ្នំពេញ។ ដោយឡែកសម្រាប់វគ្គនេះ លោកបានពន្យល់អំពីថា តើការថតរូបអ្នកដទៃបាន ឬមិនបានត្រូវផ្អែកលើកត្តាអ្វីខ្លះ តាមរយៈសំណួរដូចខាងក្រោម៖
តើក្នុងលក្ខខណ្ឌបែបណាដែលតម្រូវឱ្យថតរូបអ្នកដទៃបាន និងលក្ខខណ្ឌបែបណាដែលមិនត្រូវថត?
ការថតរូប ឬចុះផ្សាយរូបថតក្រុមមនុស្ស មិនចាំបាច់មានការព្រមព្រៀងពីម្ចាស់រូបនោះទេ ប្រសិនបើក្នុងរូបថតនោះ គេមិនអាចមើលដឹងថា ជារូបរបស់អ្នកណាច្បាស់លាស់។
តាមការពិត ទោះបីថតរូបមនុស្សច្រើនគ្នាជាក្រុមក៏ដោយ ឬថតមនុស្សម្នាក់ឯងក៏ដោយ ឱ្យតែមនុស្សក្នុងរូបថត គេមិនអាចមើលស្គាល់ទេ គឺមិនមានការប៉ះពាល់ដល់សិទ្ធិខាងរូបភាពទេ។ ដូច្នេះ គេមិនចាំបាច់សុំការព្រមព្រៀងពីម្ចាស់រូបទេ ក្រៅពីលក្ខខណ្ឌទាំងនេះគ្រប់ការថតរូបអ្នកដទៃត្រូវតែមានការអនុញ្ញាត ឬការព្រមព្រៀងជាមុនសិន។
ករណីស្រដៀងគ្នានេះដែរឧទាហរណ៍ថា នគរបាលចាប់ជនណាម្នាក់ បន្ទាប់ពីសួរចម្លើយ ជននោះបានសារភាពពីការប្រព្រឹត្តរបស់ខ្លួន។ បន្ទាប់មកនគរបាលតម្រូវឱ្យបង្ហាញមុខ ហើយគេថតរូបជនម្នាក់នោះមិនបានបិទបាំងមុខ (ការ៉ូព្រាលលើផ្ទៃមុខ) ទេ តែវត្ថុតាងត្រូវគេថតព្រាលៗមិនឱ្យឃើញច្បាស់វិញ។ តើការថតមិនឱ្យគេមើលស្គាល់វត្ថុតាងបែបនេះជាការខុសឆ្គង ឬយ៉ាងម៉េចដែរ?
ជាគោលការណ៍ គ្មានជនណាម្នាក់ត្រូវបានសន្មតជាមុនថា មានទោសនោះទេ បើទោះបីជាជននោះសារភាពនៅចំពោះសមត្ថកិច្ចនគរបាលក៏ដោយ ដរាបណាមិនទាន់មានសាលក្រម ឬសាលដីកាស្ថាពរពីតុលាការ ដូច្នេះបើពួកគាត់មិនទាន់មានទោស ពុំគួរគប្បីបង្ហាញមុខគាត់ ដោយចំហ ដោយមិនមានការបិទបាំងដែលអាចធ្វើឱ្យប៉ះពាល់ដល់សិទ្ធិក្រៅបេតិកភណ្ឌរបស់ពួកគាត់។
ពាក់ព័ន្ធនឹងការបិទបាំងមុខ ឬមិនបានបិទបាំងមុខចំពោះជនសង្ស័យដែលត្រូវបានឃាត់ខ្លួននោះ ច្បាប់មិនបានកំណត់ឱ្យជាក់លាក់នោះទេ តែវាជាបញ្ហាក្រមសីលធម៌វិជ្ជាជីវៈ ចំពោះអ្នកដែលផ្សព្វផ្សាយ ដែលគប្បីគួរតែគោរព ប៉ុន្តែប្រសិនបើជាជនសង្ស័យ ដែលត្រូវបានឃាត់ខ្លួននោះជាអនីតិជន យោងតាមមាត្រា ២៣ នៃច្បាប់ស្តីពីយុត្តិធម៌អនីតិជនបានការពារពួកគាត់ ដោយមិនឱ្យមន្ត្រីនគរបាលយុត្តិធម៌ដាក់បង្ហាញមុខជាជួរឡើយ ក្នុងករណីដែលគ្មានការយល់ព្រម ដោយមានការពិគ្រោះយោបល់ជាមួយមេធាវីអ្នកតំណាងដែលច្បាប់បានកំណត់។
ដោយឡែក ចំពោះវត្ថុតាងត្រូវគេថតព្រាលៗមិនឱ្យឃើញច្បាស់គឺមិនមានកំហុសនោះទេ ព្រោះការបង្ហាញវត្ថុតាងច្បាស់អាចប៉ះពាល់ដល់ការសម្ងាត់នៃការស៊ើបអង្កេតដូចដែលមានចែងក្នុងមាត្រា ៨៣ នៃក្រមនីតិវិធីព្រហ្មទណ្ឌ៕
