ក្រុងបាងកក៖ អស់ពីមឹកហោរាឈ្មោះ ប៉ូល តែល្បីទស្សន៍ទាយលទ្ធផលនៃការប្រកួត FIFA World Cup កាលពីជាង ១០ ឆ្នាំមុន ប្រទេសថៃ មានសត្វដែលគេជឿថាអាចទាយត្រូវលទ្ធផលបាល់យ៉ាងឆុត ៤ ប្រកួត ហើយសម្រាប់រដូវកាល Euro 2020 ស្នងសត្វមឹកប៉ូល ដែលបានស្លាប់នៅអាល្លឺម៉ង់កាលពីឆ្នាំ ២០១០។
សត្វជាហោរាទាយបាល់មានឈ្មោះថា «ប៊យ» ជាតោពណ៌ស អាយុ៥ឆ្នាំ ដែលរស់នៅសួនសត្វភាគឦសានប្រទេសថៃ។ សត្វតោមួយក្បាលនេះបានទស្សន៍ទាយលទ្ធផលបាល់ដោយតោងត្របាក់ដុំសាច់ ដែលគេព្យួរក្បែរទង់ជ័យក្រុមប្រកួតរួចចងនឹងខ្សែលួសក្នុងបរិវេណសួនសត្វ។
ការទស្សន៍ទាយរបស់តោថៃ ធ្វើឱ្យគេនឹកដល់មឹកប៉ូល នៅអាងចិញ្ចឹមសត្វទឹកប្រៃប្រទេសអាល្លឺម៉ង់ ដោយវាធ្លាប់ព្យាករណ៍លទ្ធផលឆុតរហូតដល់ទៅ ៨ប្រកួតក្នុងព្រឹត្តិការណ៍វើលខាប់ឆ្នាំ ២០១០។
តោសនេះបានទទួលជោគជ័យ ៤ ដង ហើយពីការទស្សន៍ទាយលទ្ធផលកន្លងមកគឺ៖ បារាំងឈ្នះអាល្លឺម៉ង់ ១-០ កាលពីថ្ងៃទី ១៦ អង់គ្លេសស៊ីក្រូអាស៊ី ១-០ កាលពីថ្ងៃទី ១៣ និងហូឡង់ស៊ីអ៊ុយក្រែន ៣-២ ថ្ងៃទី ១៤ និងក្រុមព័រទុយហ្គាល់ដឹកនាំដោយ គ្រីស្ទីណូ រ៉ូណាល់ដូ ផ្ដួលហុងគ្រី ៣-០ កាលពីថ្ងៃទី ១៥ ខែមិថុនា កន្លងទៅនេះ។
ការទស្សន៍ទាយដែលធ្វើឱ្យហោរាជើង ៤ តោសនៅថៃអាប់មុខនោះគឺ ការប្រកួតស្មើរវាងអេស្ប៉ាញ និងស៊ុយអែត ដែលពុំមានគ្រាប់បាល់ចូលទី។
Obkaew Janpatun មន្ត្រីនៅសួនសត្វ Kaen Zoo បានប្រាប់ទីភ្នាក់ងារ AFP ថា៖ «តោយើងកន្លងមកក៏ធ្លាប់ធ្វើការទស្សន៍ទាយលទ្ធផល English Premier League ប៉ុន្តែលទ្ធផលមិនត្រូវទេ»។
មន្ត្រីសួនសត្វរូបនេះបញ្ជាក់ទៀតថា៖ «ទើបតែមួយរយៈចុងក្រោយនេះទេ តោ ប៊យ ចាប់ផ្ដើមទាយត្រូវៗតែម្ដង»៕ AFP/HR