.jpg)
នាវាកម្សាន្តប្រណីតនៅឆ្នេរឌូបៃ ម៉ារីណា កាលពីថ្ងៃទី ១០ ខែមិថុនាឆ្នាំ ២០២១។ AFP
ក្រុងឌូបៃ៖ ទីក្រុងឌូបៃនៃដែនដីអារ៉ាបរួម ទទួលបានកេរ្តិ៍ឈ្មោះល្បីខ្លាំងជាពិភព ផ្តល់ការកម្សាន្តបែបប្រណីតដល់សេដ្ឋីសម្បូរប្រាក់ ដែលហ៊ានចំណាយធំលើការសប្បាយលើនាវាឯកជន ចំពេលមានការរីករាលដាលនៃជំងឺកូវីដ Covid-19។
ជនជាតិអារ៉ាប៊ីសាអូឌីតវ័យ ៣៦ឆ្នាំ អ្នកនាង Nada Naeem ដែលរស់នៅទីក្រុងឌូបៃបាននិយាយថា៖ «នាវាកម្សាន្តកាន់តែតែផ្ដល់ភាពឯកជន ខណៈយើងនៅតែជាមួយគ្រួសារ និងមិត្តភក្តិតែប៉ុណ្ណោះ ហើយវាជាការដើរលេងដ៏ប្រសើរ និងសុវត្ថិភាពបំផុតក្នុងពេលមានជំងឺរាតត្បាត»។
នាវាកម្សាន្តឯកជនរាប់សិបគ្រឿងត្រូវបានគេមើលឃើញសំចតជារៀងរាល់ថ្ងៃនៅផ្លូវទឹកតភ្ជាប់ទៅកាន់ឆ្នេរសមុទ្រ និងបណ្ដាកោះនានា ខណៈរាប់សិបគ្រឿងទៀតបណ្ដែតខ្លួនលើផ្ទៃទឹកខៀវស្រងាត់ចាំងឆ្លុះអគារកញ្ចក់ដ៏ស្កឹមស្កៃលូតខ្ពស់ៗកប់ពពក។
ជាអ្នកដំណើរហ៊ានជះប្រាក់កម្សាន្តលើនាវាប្រណីតមួយរូប អ្នកនាង Naeem បាននិយាយថា៖ «បានដើរលេងបែបនេះ ដូចជាមានអារម្មណ៍ថា យើងអាចដកដង្ហើមបានខ្លះ»។
បន្ទប់ទទួលភ្ញៀវនៃនាវាកម្សាន្តឯកជនមួយគ្រឿង នៅក្នុងពិព័រណ៍នៅក្រុងឌូបៃកាលពីឆ្នាំ ២០១៨។ AFP
ជាអ្នកមានជីវភាពធូរធាមួយរូបដែរ អ្នកនាង Naeem បានបន្ថែមថា នាងមិនបានចាកចេញពីទីក្រុងឌូបៃទាល់តែសោះ ចាប់តាំងពីមានការរីករាលនៃវីរុសកូរ៉ូណាតាំងពីឆ្នាំមុន។
បទពិសោធកម្សាន្តលើនាវាឯកជននេះ ត្រូវបាននាងចាត់ទុកថា៖ «វាដូចជាយើងបានធ្វើដំណើរទៅក្រៅប្រទេសអ៊ីចឹងដែរ»។
ជាទិសដៅដែលគ្រោងនឹងបើកទ្វារស្វាគមន៍ភ្ញៀវទេសចរជាថ្មីនៅខែកក្កដាខាងមុខនេះ ជីវិតពលរដ្ឋរស់នៅតំបន់ឈូងសមុទ្រអារ៉ាប់រួមអេមីរ៉ាត បានវិលត្រឡប់ស្ទើរតែដូចសភាពធម្មតា ដោយភោជនីយដ្ឋាន សណ្ឋាគារ និងឆ្នេរសមុទ្របានបើកស្វាគមន៍សាធារណជនវិញ។
សម្រាប់អ្នកដែលមានលទ្ធភាពចាយវាយថ្លៃជួលទូកប្រណីតនេះ ពួកគេយល់ថា វាជាការចំណាយដ៏មានសុវត្ថិភាព។
បន្ថែមពីលើថ្លៃនាវាកម្សាន្ត ភ្ញៀវទេសចរហោប៉ៅធ្ងន់ក៏អាចចំណាយលើការជិះស្គីទឹក និងម៉ូតូទឹកដ៏រំជើបរំជួល។
លោក Mohammed al-Sayyed អ្នកគ្រប់គ្រងក្រុមហ៊ុននាវាកម្សាន្ត Royal Star Yachts បានឱ្យដឹងថា៖ «នៅពេលដែលអាជ្ញាធរបន្ធូរបន្ថយវិធានការរឹតបន្តឹង ប្រជាជនចូលចិត្តធ្វើអ្វី ដែលមានសុវត្ថិភាពសម្រាប់ក្រុមគ្រួសារពួកគេ»។
ក្រុមហ៊ុនមានបណ្ដុំនាវាប្រណីតៗ ដែលរួមបញ្ចូលទូកទេសចរណ៍ប្រវែង ៤២ម៉ែត្រ អាចផ្ទុកអ្នកដំណើរបាន ៨០ នាក់ពេញ ប្រសិនបើពួកគេមានលទ្ធភាពចំណាយ ៤៩០០ដុល្លារ សម្រាប់ដំណើរកម្សាន្តត្រឹមរយៈពេល ៣ម៉ោង។
លោក Sayyed ដែលមានបទពិសោធនៅក្នុងឧស្សាហកម្មនាវាកម្សាន្តជាង៨ឆ្នាំ បាននិយាយថា៖ ប្រជាជនចង់ធ្វើដំណើរលើនាវាឯកជន។ ពោលគឺពួកគេចង់សម្រាកលម្ហែកាយ»។
ជម្រើសនាវាដែលមានតម្លៃថោកជាងនេះ គឺប្រភេទដឹកភ្ញៀវបាន ៦៥ នាក់ ជាមួយតម្លៃ ១ ២២៥ ដុល្លារសម្រាប់រយៈពេល ៣ ម៉ោង។
សម្រាប់អ្នកដែលមានលទ្ធភាពចាយវាយថ្លៃជួលទូកប្រណីតនេះ ពួកគេយល់ថា វាជាការចំណាយដ៏មានសុវត្ថិភាព។ AFP
យ៉ាងណាមិញ ការចំណាយមិនបញ្ឈប់ត្រឹមហ្នឹងទេ។ ការចេញទៅក្រៅឯនាយសាគរ ភ្ញៀវទាំងអស់ចាំបាច់ត្រូវត្រៀមលុយក្រាស់លើម្ហូបអាហារ ឬភេសជ្ជៈឱ្យសក្ដិសមនឹងទីតាំងកម្សាន្តដ៏ប្រណីត។
បន្ថែមពីលើថ្លៃនាវាកម្សាន្ត ភ្ញៀវទេសចរហោប៉ៅធ្ងន់ក៏អាចចំណាយលើការជិះស្គីទឹក និងម៉ូតូទឹកដ៏រំជើបរំជួល។
ជាភ្ញៀវម្នាក់លើនាវា ជនជាតិប៉ាឡេស្ទីន Jeelan Herz ដែលបានរស់នៅក្នុងប្រទេសអារ៉ាប់រួមជាង ៣០ឆ្នាំបាននិយាយថា៖ ការធ្វើដំណើរលើទូកគឺសាមញ្ញ និងសុវត្ថិភាព។ វាហាក់បីដូចជាយើងនៅខាងក្រៅ ហើយខណ្ឌចែកឆ្ងាយពីមនុស្សប្លែកមុខ។ ពោលគឺអ្នករួមទូកជាមួយយើងសុទ្ធសឹងតែមនុស្សយើងទុកចិត្ត ជាមិត្តភ័ក្ដិជិតដិត និងក្រុមគ្រួសារសាច់ញាតិយើងតែប៉ុណ្ណោះ»។
អ្នកទេសចររូបនេះបានបន្តថា៖ «នាវាឯកជនក៏ជាអ្វីដែលយើងអាចរីករាយជាមួយកូនៗដោយសុវត្ថិភាព ជាមួយទេសភាពកណ្ដាលសមុទ្រ ចូលរួមលេងកីឡាលើទឹក និងងូតទឹកដ៏ខៀវថ្លា មិនខ្វល់ពីវត្តមាននរណាឡើយ»៕ AFP/HR
ទីក្រុងឌូបៃសម្បូរនាវាកម្សាន្តប្រណីតសម្រាប់អ្នកហ៊ានជះប្រាក់សប្បាយបែបឯកជន។ AFP
