.jpg)
ជ្រូកអាយុថ្លៃអាចរស់រានមានជីវិត ៣៦ថ្ងៃ ក្រោមគំនរបាក់បែកពីការរញ្ជួយដីដ៏ខ្លាំងក្លាមួយកាលពីឆ្នាំ ២០០៨ បានស្លាប់នៅអាយុ ១៤ឆ្នាំ។
ក្រុងស៊ាងហៃ៖ សត្វជ្រូក ១ ក្បាលដែលបានក្លាយជានិមិត្តរូបដ៏មិននឹកស្មានដល់ នៅប្រទេសចិនបន្ទាប់ពីវាអាយុថ្លៃ អាចរស់រានមានជីវិត ៣៦ ថ្ងៃ ក្រោមគំនរបាក់បែកពីការរញ្ជួយដីដ៏ខ្លាំងក្លាមួយកាលពីឆ្នាំ ២០០៨ ទីបំផុតបានស្លាប់នៅអាយុ ១៤ ឆ្នាំ។
ការស្លាប់របស់ជ្រូកអាយុថ្លៃកាលពីសប្ដាហ៍មុនបានបង្កឱ្យពលរដ្ឋចិនមួយចំនួនមាន អារម្មណ៍រំជួលចិត្តជាខ្លាំង។
«ហ្សូជៀនចៀង» ឬ «ជ្រូកដ៏រឹងមាំ» គឺជាឈ្មោះដែលមហាជនដាក់ឱ្យសត្វជ្រូកអាយុថ្លៃមួយនេះ ក្រោយពីភាពល្បីខ្ទរខ្ទារ ដោយសារតែវាអាចបន្តដង្ហើមក្រោមគំនរបាក់បែកជាង ១ ខែ ពីគ្រោះរញ្ជួយដីកម្រិត ៧,៩ រិកទ័រ នៅខេត្តស៊ីឈួន ភាគនិរតីប្រទេសកាលពីថ្ងៃទី ១២ ខែ ឧសភា ឆ្នាំ ២០០៨។
បាតុភូតរញ្ជួយដីគ្រានោះបានធ្វើឱ្យមនុស្សជិត ៩ ម៉ឺននាក់ បានស្លាប់បាត់បង់ជីវិត និងបាត់ខ្លួន។
ឈ្មោះដែលមហាជនដាក់ឱ្យសត្វជ្រូកអាយុថ្លៃម១ក្បាលនេះគឺ «ហ្សូជៀនចៀង» ឬ«ជ្រូកដ៏រឹងមាំ»។ AFP
យ៉ាងណាមិញ រឿងរ៉ាវអព្ភូតហេតុរបស់សត្វជ្រូក ដែលពឹងផ្អែកលើថង់ធ្យូង និងទឹកភ្លៀងត្រូវបានស្ងើចសរសើរវាថាជានិមិត្តរូបនៃឆន្ទៈតស៊ូក្នុងការរស់រានមានជីវិត។
រំឭកពីហេតុការណ៍គ្រានោះ សាក្សីបាននិយាយថាជ្រូក "ហ្សូជៀនចៀង" បានស្រកទម្ងន់យ៉ាងខ្លាំងនៅពេលដែលវាត្រូវបានទាញចេញពីគំនរថ្មបាក់បែក រហូតវាមានទ្រង់ទ្រា”ស្គមស្ទើរតែដូចសត្វពពែទៅហើយ។
សារមន្ទីរក្នុងតំបន់មួយនៅជិតទីក្រុងឆេងឌូ បានទិញជ្រូកដ៏ល្បីល្បាញ១ក្បាលនេះក្នុងតម្លៃ ៣ ០០៨ យ័ន (ប្រមាណ ៤៥០ ដុល្លារ) និងទុកវាជាសត្វនិមិត្តរូប ទាក់ទាញភ្ញៀវទេសចរ រហូតដល់វាអស់ជីវិតតាមធម្មជាតិ។
សារមន្ទីរក្នុងតំបន់មួយនៅជិតទីក្រុងឆេងឌូ បានទិញជ្រូកដ៏ល្បីល្បាញ១ក្បាលនេះក្នុងតម្លៃ៤៥០ ដុល្លារ ដើម្បីទាក់ទាញទេសចរ។
សារមន្ទីរបាននិយាយនៅលើបណ្តាញសង្គម Weibo របស់ខ្លួន ថា៖ «ក្រោយគ្រោះមហន្តរាយ សត្វជ្រូកនេះបានរស់រានរហូតដល់ចាស់ទ្រុឌទ្រោមអស់អាយុសង្ខាកាលពីយប់ថ្ងៃពុធ (សប្ដាហ៍មុន)»។
យោងតាមកាសែត The Global Times ដោយដកស្រង់សម្ដីអ្នកជំនាញបង្កាត់ពូជជ្រូក បើធៀបនឹងអាយុរបស់មនុស្សវិញ ជ្រូកនោះមានអាយុរស់រានបានដល់ ១០០ ឆ្នាំ ហើយមុននឹងវាផុតដង្ហើម។
ការបង្ហោះវីដេអូពីជ្រូកក្លាហាននេះក្នុងបណ្ដាញសង្គមចិន Weibo ក្រោមចំណងជើងថា «ជ្រូកដ៏រឹងមាំបានស្លាប់ហើយ» បានទាក់ទាញការចូលមើលជិត ៣០០ លាននាក់ នៅនៅរយៈពេល២៤ម៉ោងក្រោយការស្លាប់របស់វា ដោយមហាជនបានចាត់ ទុកវាថាជា «ជ្រូកដ៏ល្បីបំផុតនៅក្នុងប្រវត្តិសាស្ត្រ»៕ AFP/HR
មនុស្សម្នាចោមរោមមើលជ្រូក «ហ្សូជៀនចៀង» ឬ«ជ្រូកដ៏រឹងមាំ» ដែលនៅក្រោមគំនរថ្មជាង ១ខែតែមិនស្លាប់។
