ក្រុងស៊ាងហៃ៖ ព្រះកេសរលោងស្រោចដោយញើស ព្រះតេជគុណ ហ្ស៊ី ស៊ាង (Zhi Xiang) សំឡឹងមើលទៅសត្វឆ្កែដែលទទឹករោមជោគដោយសារភ្លៀងបង្អុរខ្លាំង ហើយបានមានសង្ឃដីកាយ៉ាងទន់ភ្លន់ទៅកាន់សត្វជើងបួននោះថា៖ «អត្មាសុំកាត់រោមឯងហើយណា»។
សត្វឆ្កែស្រមូវ ១ ក្បាលនេះ ស្ថិតនៅក្នុងចំណោមសត្វឆ្កែអនាថាជាច្រើនក្បាល ដែលត្រូវបានប៉ូលិសប្រមូលពីគ្រប់ច្រកល្ហកតាមដងផ្លូវក្នុងទីក្រុងសៀងហៃ និងដាក់ក្នុងទ្រុងដែកទុកចោលនៅតំបន់ជះក្លិនស្អុយ។
កូនឆ្កែជាង ២០ ក្បាល បានមកដល់ដៃព្រះតេជគុណ ហ្ស៊ី ដោយលោកនឹងជួយអន្តរាគមន៍មើលថែ មុននឹងបញ្ជូនទៅទីកន្លែងដ៏ប្រសើរ ស្វែងរកម្ចាស់ថ្មីឱ្យសត្វអនាថា ឬបន្តរក្សាទុកនៅវត្តអារាមរបស់លោក។
ព្រះសង្ឃពុទ្ធសាសនាអង្គនេះបានព្យាយាមផ្តល់ឱ្យសត្វឆ្កែទាំងនេះនូវជីវិតថ្មី ដោយលោកបានសង្គ្រោះ ចិញ្ចឹម និងថែទាំសត្វ ៨ ០០០ ក្បាលរួចហើយ។
ឆ្កែប្រមាណ ២០០-៣០០ ក្បាល បានវាសនាហោះទៅនៅជាមួយម្ចាស់ថ្មីឯទឹកដីអឺរ៉ុប និងអាមេរិកខាងជើងឯណោះ។
ព្រះតេជគុណវ័យ ៥១ វស្សាដែលលះបង់ស្បង់ចីវរព្រះសង្ឃមួយគ្រា រួចគ្រងឈុតកម្មករពណ៌ទឹកក្រូចពេលធ្វើការថែទាំ ផ្ដល់ចំណីសត្វតាមទម្លាប់នោះ បានមានសង្ឃដីកាថា៖ «អត្មាត្រូវតែជួយសង្គ្រោះពួកវា ពីព្រោះប្រសិនបើអត្មាមិនធ្វើដូច្នោះទេ ពួកវាមុខជានឹងស្លាប់មិនខាន»។
ជំនឿ និងឧប្បនិស្ស័យរបស់ព្រះតេជគុណ ហ្ស៊ី បានធ្វើឱ្យព្រះអង្គជួយសង្គ្រោះសត្វអនាថា ដែលភាគច្រើនជាសត្វឆ្កែ។
តែក្នុងចំណោមនោះ ក៏មានសត្វឆ្មា និងសត្វចិញ្ចឹមផ្សេងទៀតដែរចាប់តាំងពីលោកចាប់ផ្ដើមកិច្ចការនេះនៅក្នុងឆ្នាំ ១៩៩៤ ដោយគ្រានោះព្រះតេជគុណចាប់ផ្តើមព្យាបាលសត្វឆ្មាត្រូវឡានបុកលើផ្លូវ។
ព្រះតេជគុណមានសង្ឃដីកាថា៖ «ពេលអត្មាចាប់ផ្ដើមកិច្ចការសង្គ្រោះសត្វដំបូង នៅពេលនោះមានសត្វដែលវង្វេងបាត់តិចតួច ត្រូវបានអត្មាយកមកថែទាំ ប៉ុន្តែពេលនេះចំនួនមានការផ្លាស់ប្តូរគួរឱ្យកត់សម្គាល់ក្នុងរយៈពេល ៤ ឬ ៥ ឆ្នាំចុងក្រោយ»។
ពលរដ្ឋចិនដែលមានកំណើនទ្រព្យសម្បត្តិច្រើនសន្ធឹក ហើយទីផ្សារសត្វចិញ្ចឹមក៏រីកលូតលាស់ខ្លាំង ប៉ុន្តែមនុស្សមួយចំនួនបោះបង់ចោលសម្លាញ់ជើង ៤ នៅពេលដែលពួកគេនឿយណាយមិនចង់មើលថែទាំពួកវាទៀត។
ព្រះតេជគុណ ហ្ស៊ី មានសង្ឃដីកាថា៖ «នេះមិនមែនបណ្តាលមកពីមនុស្សដែលមិនចូលចិត្តសត្វឆ្កែនោះទេ ប៉ុន្តែដោយការស្រឡាញ់របស់ពួកគេពុំមានភ្ជាប់នូវចំណេះដឹងថែរក្សាសត្វឱ្យបានត្រឹមត្រូវ»។
ការបង្កាត់ពូជក្នុងចំណោមសត្វអនាថាក៏ធ្វើឱ្យចំនួនសត្វគ្មានម្ចាស់កើនឡើងខ្លាំងផងដែរ។
ប្រព័ន្ធផ្សព្វផ្សាយរដ្ឋបាននិយាយនៅក្នុងឆ្នាំ ២០១៩ ថាមានសត្វអនាថាបាត់ចំនួន ៥០ លានក្បាល នៅក្នុងប្រទេសចិន ដោយចំនួននេះគឺកើនឡើងទ្វេដងជារៀងរាល់ឆ្នាំ។
សត្វឆ្កែ និងជំនឿព្រះពុទ្ធសាសនា
ដោយមានជំនួយពីអ្នកស្ម័គ្រចិត្ត និងកម្លាំងពលកម្មតិចតួច ព្រះតេជគុណ ហ្ស៊ី បានរក្សាទុកឆ្កែរាប់រយក្បាលនៅឯអារាម បាវអេន ដោយនៅបរិវេណខាងមុខមានវត្តមានព្រះសង្ឃពុទ្ធសាសនា និងបដិមាព្រះពណ៌មាសឆ្អិនឆ្អៅក្រោមបរិយាកាសស្ងប់ស្ងាត់ រីឯនៅបរិវេណខាងក្រោយពោរពេញដោយទ្រុងសត្វចិញ្ចឹមដ៏លាន់ឮយ៉ាងទ្រហឹង។
អារាមដែលនៅតែជាកន្លែងសក្ការៈបូជាក៏មានបន្ទប់មួយដែលផ្ទុកទៅដោយសត្វឆ្មាចំនួន ២០០ ក្បាល សត្វមាន់ ក្ងាន និងក្ងោកផងដែរ។
ខ្យល់អាកាសនៅបរិវេណក្រោយអារាមគឺជាការលាយបញ្ចូលគ្នារវាងក្លិនសត្វ និងផ្សែងអុជ។
ព្រះតេជគុណ ហ្ស៊ី ភាគច្រើនរក្សាទុកសត្វឆ្កែមានជំងឺដើម្បីមើលថែពួកវា ខណៈឆ្កែដែលមានសុខភាពធម្មតាត្រូវបានបញ្ជូនទៅរស់នៅទីកន្លែងធំទូលាយផ្សេងទៀត និងឆ្កែខ្លះមានសំណាងបានរកឃើញផ្ទះថ្មីនិងម្ចាស់ថ្មី។
ជាអកុសលឆ្កែប្រមាណ ៣០ ភាគរយដែលព្រះតេជគុណបានសង្គ្រោះ ពុំអាចមានជីវិតនៅរស់ ដោយសារតែជំងឺធ្ងន់ធ្ងរ។
ការកើនឡើងឥតឈប់ឈរនៃចំនួនសត្វត្រូវបានសង្គ្រោះ បានក្លាយជាសម្ពាធហិរញ្ញវត្ថុដ៏ធ្ងន់សម្រាប់ ព្រះតេជគុណ ហ្ស៊ី។
ព្រះសង្ឃដែលក្រោកពីសិងម៉ោង ៤ ទៀបភ្លឺជារៀងរាល់ថ្ងៃ អង្គនេះបានខ្ចីប្រាក់ពីឪពុកម្តាយនិងព្រះសង្ឃដទៃទៀត បន្ថែមពីលើមូលនិធិជំនួយសប្បុរសធម៌។
ព្រះតេជគុណ ហ្ស៊ី បានប៉ាន់ប្រមាណថា ការចំណាយប្រចាំឆ្នាំគឺប្រហែល ១២លានយ័ន (២ លានដុល្លារ) ដោយលោកត្រូវការចំណីឆ្កែប្រមាណ ៦០តោនជារៀងរាល់ខែ។
ព្រះតេជគុណមានសង្ឃដីកាថា៖ «បញ្ហាគឺអត្មាមិនអាចខ្ចីប្រាក់ទៀតទេឥឡូវនេះ»។
លាទាំងទឹកភ្នែក
ចាប់តាំងពីឆ្នាំ ២០១៩ ព្រះតេជគុណ ហ្ស៊ី បានបញ្ជូនសត្វឆ្កែអនាថាមួយចំនួនឱ្យទៅម្ចាស់ថ្មីនៅបរទេស។
ក្រុមអ្នកស្ម័គ្រចិត្ត ដែលអាចនិយាយភាសាអង់គ្លេសបានប្រើប្រព័ន្ធផ្សព្វផ្សាយសង្គម ដើម្បីទទួលបានការចាប់អារម្មណ៍ពីសំណាក់អន្តរជាតិ។
មកទល់ពេលនេះមានឆ្កែប្រមាណ ៣០០ ក្បាល ត្រូវបានម្ចាស់ថ្មីនៅសហរដ្ឋអាមេរិក កាណាដា និងបណ្តាប្រទេសអឺរ៉ុបជាច្រើនរួមទាំងប្រទេសអាល្លឺម៉ង់ ទទួលពួកវាយកទៅចិញ្ចឹមថែទាំ។
ព្រះតេជគុណ ហ្ស៊ី មានការនឹកនាដល់ឆ្កែមានសំណាងទាំងនោះ ដែលពួកវាចាប់ផ្ដើមពីជីវិតវេទនាស្ទើរងាប់នៅលើដងផ្លូវ រហូតដល់ថ្ងៃពួកវាឡើងយន្តហោះ ធ្វើឱ្យលោកស្រក់ទឹកភ្នែក។
លោកបាននិយាយថា៖ «អត្មាគិតថាពួកគេសប្បាយរីករាយណាស់ ដូច្នេះអត្មាមានអារម្មណ៍ថា វាពិតជាមានតម្លៃណាស់ ហើយជាការពិតណាស់ អត្មាពិតជានឹកពួកវាណាស់»។
កាលពីព្រឹកថ្ងៃសៅរ៍សប្ដាហ៍កន្លងទៅនេះ ព្រះតេជគុណ ហ្ស៊ី បានស្ថិតនៅឯអាកាសយានដ្ឋានអន្តរជាតិក្រុងសៀងហៃ ដើម្បីនាំយកឆ្កែមួយក្បាលជូនអ្នកដំណើរ ដែលបានស្ម័គ្រចិត្តយកវាទៅផ្ទះថ្មីនៅទីក្រុងសៀថល សហរដ្ឋអាមេរិក។
គ្រងសម្លៀកបំពាក់សង្ឃ ព្រះតេជគុណ ហ្ស៊ី បានកាន់ឆ្កែតូចមួយ រហូតដល់នាទីចុងក្រោយដែលត្រូវប្រគល់ទៅម្ចាស់ថ្មី នៅអាកាសយានដ្ឋាន ជាមួយនឹងពាក្យដ៏ស្រណោះស្រណោកថា «លាហើយ!» ។
ជូតទឹកភ្នែកនៅពេលស្ត្រីនាំឆ្កែនោះទៅកាន់ច្រកអ្នកដំណើរ ព្រះតេជគុណមានសង្ឃដីកាថា៖ «អត្មាមានក្តីសុបិន្តថា នៅថ្ងៃណាមួយពេលអត្មាមានពេលទំនេរ អត្មាចង់ទៅបរទេស ទៅលេងពួកវា ហើយថតរូបជាមួយសត្វឆ្កែទាំងអស់ដែលអត្មាបានជួយសង្គ្រោះ។ ដូច្នេះនៅពេលអត្មាចាស់ហើយមិនអាចដើរបាន អត្មាមានរូបថតទាំងនោះទុកគ្រាន់មើលជាអនុស្សាវរីយ៍»៕ AFP/HR