.jpg)
ការវិភាគបានរកឃើញថា ត្បូងដែលប្រជាជនសម្រុកទៅជីក គឺជាត្បូងក្វាត ពុំសូវមានតម្លៃនោះទេ។ AFP
ក្រុងចូហាន់ណេសប៊ើក៖ ត្បូងអាថ៌កំបាំងដែលបានធ្វើមនុស្សម្នាប្រញាប់ប្រញាល់លើកទ័ពទៅជីកកកាយនៅតំបន់ជើងភ្នំឯខេត្ត KwaZulu-Natal អាហ្វ្រិកខាងត្បូងកាលពីសប្ដាហ៍មុន ត្រូវបានរដ្ឋាភិបាល ចេញសេចក្ដីប្រកាសថា វាជារ៉ែត្បូងក្វាតតម្លៃថោកប៉ុណ្ណោះ។
មនុស្សរាប់ពាន់នាក់បានប្រមូលផ្តុំគ្នានៅភូមិជាយក្រុងក្វាហ្លាដធី ចម្ងាយជាង ៣០០ គីឡូម៉ែត្រភាគអាគ្នេយ៍នៃទីក្រុងចូហាន់ណេសប៊ើក បន្ទាប់ពីលេចឮដំណឹងពីអ្នកឃ្វាល គោម្នាក់ បានប្រទះឃើញ ដុំថ្មប៉ុន្មានភ្លឺដូចពេជ្រ។
ព័ត៌មាននៃការរកឃើញនេះបានសាយភាយយ៉ាងឆាប់រហ័ស បង្កឱ្យមនុស្សម្នាឯទៀតមានការប្រញាប់ប្រញាល់ទៅទីនោះផ្សងសំណាង ទាំងរដ្ឋាភិបាលបានចេញសេចក្ដីព្រមានថា ដុំថ្មទាំងនោះអាចជាវត្ថុគ្មានតម្លៃក៏ដោយ។
ភាពចលាចលនៃពលរដ្ឋផ្អើលមកជីកកំណប់នេះ បានជំរុញឱ្យរដ្ឋាភិបាលបញ្ជូនអ្នកជំនាញភូគព្ភសាស្ត្រ និងអ្នកជំនាញខាងរ៉ែ មកវិភាគស្វែងរកការពិត។
កាលពីសប្ដាហ៍មុន ប្រជាជននាំគ្នាលើកទ័ពទៅជីករកត្បូង ដោយរំពឹងថាវាជាពេជ្រមានតម្លៃ។ AFP
លទ្ធផលជាក់ស្ដែងបានកម្ទេចក្ដីសុបិនពលរដ្ឋក្រីក្រខំងើបមកជីកកកាយដោយក្ដីរំពឹងថា វានឹងអាចកែប្រែជីវភាពពួកគេបាន។
សេចក្តីថ្លែងការណ៍របស់រដ្ឋាភិបាលក្នុងតំបន់បាននិយាយថា៖ «ការវិភាគបានបង្ហាញយ៉ាងច្បាស់ថាថ្មដែលបានរកឃើញនៅតំបន់នោះមិនមែនជាពេជ្រនោះទេ»។
តាមពិតអ្វីដែលត្រូវបានរកឃើញគឺជាត្បូងក្វាត ដែលមានតម្លៃទាបខ្លាំង បើប្រៀបនឹងពេជ្រ។
របាយការណ៍បាននិយាយថា កន្លែងនោះមានចម្ងាយជាង ៣០០ គីឡូម៉ែត្រភាគអាគ្នេយ៍ទីក្រុងចូហានណេសបឺក ជាទីតាំងក្បែរបន្ទុះភ្នំភ្លើង ហើយវាមិនមែនស្ថិតនៅក្នុងតំបន់កកើតពេជ្រនោះទេ។
ទន្ទឹមនឹងនេះដែររដ្ឋាភិបាលបានអំពាវនាវជាថ្មីម្តងទៀតឱ្យប្រជាជនមកផ្សងវាសនាជីករកត្បូង ចាកចេញពីតំបន់នេះដោយលើកឡើងពីហានិភ័យនៃជំងឺឆ្លង និងការរេចរឹលនៃបរិស្ថាន៕ AFP
ការវិភាគបានរកឃើញថា ត្បូងដែលប្រជាជនសម្រុកទៅជីក គឺជាត្បូងក្វាត ពុំសូវមានតម្លៃនោះទេ។ AFP
