ភ្នំពេញ៖ នាពេលថ្មីៗនេះ បង្កើតភាពភ្ញាក់ផ្អើលខ្លាំងពេញបណ្តាញសង្គម ដោយឃើញតារាចម្រៀងប្រុសកំលោះមានរូបសង្ហា មុខកាត់កូនចៅចិន លោក អេឡិច ច័ន្ទត្រា បង្ហោះរូបភាពសិ្នទ្ធស្នាលនឹងស្រីស្អាតម្នាក់ក្នុងឈុតប៊ីគីនី នៅអាងហែលទឹក។
បណ្តុំរូបភាពក្នុងឈុតពណ៌ស រវាងតារាចម្រៀងប្រុសអង្គុយលើកៅអីក្បែរអាងហែលទឹក ខណៈនារីរូបស្រស់ស្លៀកឈុតប៊ីគីនីអង្គុយលើស្មា តារាប្រុសរូបសង្ហាលោក អេឡិច ច័ន្ទត្រា បង្ហើរសារយ៉ាងខ្លីថា៖ «Birthday Girl! Neth Chariya!»។
ក្រោយពីបង្ហោះរូបទាំងនោះមក ក៏ធ្វើឱ្យភ្ញាក់ផ្អើលមហាជនជាអ្នកគាំទ្រតាមបណ្តាញសង្គម ដោយបានលើកឡើងថា៖ «អ៊ីយ៉ា!តារាចម្រៀងប្រុស អេឡិច ច័ន្ទត្រា កំពុងតែមានចេតនាចង់បង្ហាញមុខម្ចាស់ស្នេហ៍ខ្លួនទេដឹង?»។
តារាប្រុសឆ្នើមផ្នែកមនោសញ្ចេតនា លោក អេឡិច ច័ន្ទត្រា អតីតជាម្ចាស់ពាន Apsara Award ឆ្នាំ២០១៣ ដែលមានទ្រព្យស្តុកបានរៀបចំធ្វើពិធីឡើងផ្ទះវីឡាកូនកាត់ថ្មីសន្លាង ហៅសុទ្ធតែក្រុមអ្នកសិល្បៈចម្រុះចូលរួមយ៉ាងច្រើនកុះករអញ្ជើញភ្ញៀវចូលរួម ៥០ តុ កាលពីឆ្នាំ ២០១៨ ទិញក្នុងតម្លៃជិតកន្លះលានដុល្លារ ដែលមានទីតាំងស្ថិតនៅបុរីប៉េងហួតបឹងស្នោរ ក្នុងខណ្ឌច្បារអំពៅ ក៏បានបញ្ជាក់ពីរូបភាពទាំងនោះដែរ។
តារាចម្រៀងប្រុស អតីតដៃគូចម្រៀងស័ក្តិសមឥតខ្ចោះ របស់តារាចម្រៀងសិចស៊ី ឆ័យលី ដាឡែន លោក អេឡិច ច័ន្ទត្រា បំភ្លឺថា៖ «អូ!តាមពិតទៅរូបនោះ ខ្ញុំថតជាមួយមិត្តភក្តិសិល្បៈ ដែលជាអតីតពិធីការិនីទូរទស្សន៍ឈ្មោះ នេត សុចរិយា ហើយគាត់ជាមិត្តភ័ក្តិស្និទ្ធស្នាលខ្ញុំយូរមកហើយ នៅថ្ងៃខួបកំណើតរបស់គាត់។ គាត់ទើបតែផ្អាកការងារសិល្បៈនារយៈពេលប្រមាណបួនប្រាំឆ្នាំចុងក្រោយនេះ ដោយសារគាត់ងាកមកធ្វើជំនួញរកស៊ីវិញ»។
តារាចម្រៀងលោក អេឡិច ច័ន្ទត្រា ក៏បន្តឲ្យដឹងទៀតថា៖ «យើងគ្រាន់តែមិត្តភក្តិស្និទ្ធស្នាល ដែលបានរាប់អានគ្នាតាំងពីយូរមកតែប៉ុណ្ណោះ មិនមានអ្វីលើសនេះទេ!»។
គួររំឮកដែរថា តារាសម្ដែង និងអតីតពិធីការិនីទូរទស្សន៍ប៉ុស្តិ៍លេខ៣ (TV3) នេត សុចរិយា ធ្លាប់លេចឮនូវព័ត៌មានថា មានទំនាក់ទំនង ជាមួយនឹងបុរសជាថៅកែក្រុមហ៊ុនស្រានាំមកពីប្រទេសសិង្ហបុរី មានឈ្មោះ ណេសិន ហ្គាន ដែលជាកូនកាត់ ម៉ាឡេស៊ី អូស្ត្រាលី និងសិង្ហបុរី កាលពីឆ្នាំ២០១៥ ហើយក៏មានមុខពីអាជីពសិល្បៈតាំងពីពេលនោះមកដែរដល់បច្ចុប្បន្ន៕