ក្រុងឡុងដ៍៖ ការផ្សព្វផ្សាយរូបិយបណ្ណឌីជីថល Cryptocurrency ជាពិសេសពីសំណាក់អ្នកមានឥទ្ធិពលលើបណ្ដាញសង្គម គួរតែប្រឈមមុខច្បាប់ ដោយតាមប្រធានអ្នកឃ្លាំមើលហេរញ្ញវត្ថុចក្រភពអង់គ្លេស ដែលលើកយកការបង្ហោះពាណិជ្ជកមុ្មចុងក្រោយដោយ គីម កាដាសៀន។
រូបិយបណ្ណ និងវត្ថុឌីជីថល បានទាក់ទាញចំណាប់អារម្មណ៍អ្នកវិនិយោគងុបនឹងសិល្បៈដោយយល់ថាជាលំដាប់វណ្ណៈខ្ពស់ តែប្រឈមការប្រថុយខាតបង់ និងបោកបញ្ឆោតខ្ពស់ផងដែរ។
ឆាលី រ់ាន់ឌេល ប្រធានអាជ្ញាធរប្រព្រឹត្ដិកម្មហេរញ្ញវត្ថុរបស់ចក្រភពអង់គ្លេស (FCA) បានឱ្យដឹងកាលពីថ្ងៃចន្ទថា៖ «ពេលយើងពឹងអាស្រ័យកាន់តែទៅលើអនឡាញ យើងមិនអាចបណ្ដោយឱ្យជំនួញអនឡាញគ្រប់គ្រងសព្វបែបយ៉ាងនោះទេ។ គួរតែមានច្បាប់ការពារអ្នកជំនួញពីទង្វើបោកប្រាស និងក្លែងបន្លំ»។
កាដាសៀន បានធ្វើការផ្សព្វផ្សាយវត្ថុឌីជីថល Ethereum Max កាលពីខែមិថុនា លើគណនីអ៊ីនស្ដាក្រាម ដែលមានអ្នកគាំទ្ររហូតដល់ជាង ២០០ លាននាក់។
លោក រ៉ាន់ឌេល បានសង្កាត់ធ្ងន់ថា វត្ថុឌីជីថល Ethereum Max មិនពាក់ព័ន្ធនឹង Ethereum ដែលជារូបិយបណ្ណឌីជីថលល្បីល្បាញលំដាប់ទី២ ក្នុងលោក បន្ទាប់ពី bitcoin នោះទេ។
លោកបាននិយាយថា៖ «ពេលគាត់ត្រូវបានជួលឱ្យបញ្ចុះបញ្ចូលអ្នកគាំទ្រលើអ៊ីនស្ដាក្រាម ២៥០ លាននាក់ ជួញដូរវត្ថុឌីជីថល ដោយការចូលរួមជាមួយសហគម Ethereum Max វាអាចការផ្សព្វផ្សាយផ្នែកហេរញ្ញវត្ថុទៅដល់អតិថិជនដ៏ច្រើនបំផុតក្នុងប្រវត្ដិសាស្ដ្រ»។
លោកបានកត់សម្គាល់ថា ការបង្ហោះនោះត្រូវបានចាត់ទុកការផ្សព្វផ្សាយពាណិជ្ជកម្មស្ថិតក្រោមបទបញ្ញត្ដិរបស់អ៊ីនស្ដាក្រាម។
លោកបានបន្ដថា៖ «ប៉ុន្ដែគាត់មិនចាំបាច់ត្រូវលាតត្រដាងថា Ethereum Max កុំច្រឡំ Ethereum ជាវត្ថុឌីជីថលសម្រាប់ការជួញដូរ ដែលបង្កើតឡើងទើបបានមួយខែដោយក្រុមអ្នកអភិវឌ្ឍអត់ស្គាល់អត្ដសញ្ញាណ»៕ AFP/HR