.jpg)
ផលិតករ ហ៊ុយ យ៉ាឡេង សម្ដែងជាតួអង្គឪពុកពិការជើងលះបង់ស៊ីក្លូ និងឈាមដើម្បីកូន។ រូបថត សហការី
ក្រុងឡុងប៊ិច: ដោយមានកំពូលតារាហូលីវូដ អ្នកនាង អេនជើលីណា ជោលី ជាទូតសុច្ឆន្ទៈជួយផ្សព្វផ្សាយទៅកាន់ពិភពលោក មហោស្រពភាពយន្តទីក្រុងកម្ពុជា (Cambodia Town Film Festival ឬ CTFF) ឆ្នាំ ២០២១ នៅក្រុងឡុងប៊ិច រដ្ឋកាលីហ្វ័រនីញ៉ា សហរដ្ឋអាមេរិក បានវិលមកជាថ្មី ដោយនាំយកខ្សែភាពយន្តខ្មែរល្បីៗច្រើនទម្រង់ មកចាក់បញ្ចាំង ចាប់ពីថ្ងៃទី ២៤ ដល់ ២៦ ខែ កញ្ញា ឆ្នាំ ២០២១ ខាងមុខនេះ។
យោងតាមវេបសាយរបស់មហោស្រព ក្រៅពីការបញ្ចាំងភាពយន្ត កម្មវិធីដទៃទៀតរួមមានការពិភាក្សាជាមួយអ្នកដឹកនាំរឿង ផលិតករ អ្នកនិពន្ធ និងសិល្បករសម្ដែង ដើម្បីផ្ដល់ឱកាសដល់អ្នកផលិតភាពយន្តជំនាន់ក្រោយ ឬសិស្សនិស្សិតអាចស្រូបយកនូវបទ-ពិសោធក្នុងវិស័យនេះ។
ក្នុងចំណោមភាពយន្តខ្នាតធំជាច្រើន រឿងខ្សែជីវិតរបស់អ្នកប្រកបមុខរបរធាក់ស៊ីក្លូ រឿង «ដើម្បីកូន» ដែលមានចំណងជើងភាសាអង់គ្លេសថា «Fathers» ត្រូវបានផលិតយ៉ាងសម្រិតសម្រាំងពីផលិតករល្បីឈ្មោះលោក ហ៊ុយ យ៉ាឡេង ត្រូវបានជ្រើសរើសទៅបញ្ចាំងនៅទឹកដីអាមេរិកលើកដំបូង។
លោក ហ៊ុយ យ៉ាឡេង ជាស្ថាបនិកនៃផលិតកម្មកថា ជ័យ និងជាអ្នកផលិតខ្សែភាពយន្តស្តែងពីជីវិតអ្នកធាក់ស៊ីក្លូ បានសរសេរនៅលើបណ្ដាញសង្គមរបស់លោកថា៖ «សូមចូលរួមគាំទ្រផង រីករាយដែលភាពយន្ត ដើម្បីកូនបានជាប់ក្នុងមហោស្រព Cambodia Town Film Festival នាឆ្នាំនេះ និងជម្រាបសួរបងប្អូននៅអាមេរិក ពិសេសអ្នកឡុងប៊ិច។ ភាពយន្តរឿង «ដើម្បីកូន» របស់ខ្ញុំនឹងបញ្ចាំង នៅថ្ងៃអាទិត្យ ទី ២៦ ខែកញ្ញា»។
ខ្សែភាពយន្តខ្លីរឿង California Dreaming សម្ដែងដោយកញ្ញា រ៉េត សារីតា។ សហការី
គួររំឭកផងដែរថា កុនរឿង «ដើម្បីកូន» ដែលរំលេចពីការ-លះបង់តស៊ូរបស់ឪពុកពិការជើងដែលត្រូវលក់ទាំងស៊ីក្លូ និងឈាម ដើម្បីព្យាបាលជំងឺរបស់កូន នេះក៏ធ្លាប់ត្រូវបានជ្រើសរើសឱ្យតំណាងកម្ពុជា ដើម្បីទៅចូលរួមប្រកួតប្រជែងក្នុងពានរង្វាន់ «ខ្សែភាពយន្តអន្តរជាតិល្អបំផុត» ក្នុងកម្មវិធីប្រគល់ពានរង្វាន់អូស្ការលើកទី៩៣ នៅអាមេរិកផងដែរ។
បង្កើតឡើងនៅឆ្នាំ ២០១៣ ដោយសហស្ថាបនិកលោក ប្រាជ្ញ លី (Prach Ly) និងអ្នកនាង ខេលី សូ (Caylee So) ដែលបច្ចុប្បន្នក៏ជានា-យកដឹកនាំមហោស្រព កម្មវិធីនេះមានគោលបំណងចម្បងផ្ដោតទៅលើភាពចម្រុះនៃបទពិសោធរបស់កម្ពុជាតាមរយៈសិល្បៈនៃការផលិតភាពយន្ត។
ដោយជ្រើសរើសយកខ្សែភាពយន្តដែលឆ្លុះបញ្ចាំងពីគ្រួសារ ការផ្លាស់ទីលំនៅទំនាស់នយោបាយ យុត្តិធម៌ ប្រពៃណី និងមានបញ្ហាប្រឈមនានា មហោស្រពនឹងផ្ដល់នូវចំណេះដឹងស៊ីជម្រៅពីគុណតម្លៃក្នុងនាមជាកម្ពុជា ដើម្បីជំរុញការសន្ទនានៅក្នុងកម្រិតអន្តរជាតិ។
ក្រៅពីមានបណ្ដុំខ្សែភាពយន្តឆ្នើមពីកម្ពុជា មហោស្រពភាពយន្តទីក្រុងកម្ពុជា ក៏បានជ្រើសរើសនូវភាពយន្តបែបឯកសារ ភាពយន្តខ្លី ភាពយន្តផលិតដោយសិស្សនិស្សិត និងភាពយន្តគំនូរជីវចល ជាស្នាដៃមកពីបណ្ដាប្រទេសជុំវិញពិភពលោកផងដែរ។
ចំពោះប្រភេទភាពយន្តឯកសារក្នុងចំណោមនោះមានរឿង «មរតក» ដែលត្រូវបានជ្រើសរើសសម្រាប់ចាក់បញ្ចាំងនៅក្នុងមហោស្រពភាពយន្តទីក្រុងកម្ពុជាឆ្នាំ ២០២១។
ការផ្សព្វផ្សាយដោយទំព័រហ្វេសប៊ុកមជ្ឈមណ្ឌលធនធានសោតទស្សន៍បុប្ផាណា បានឱ្យដឹងថា៖ «ភាពយន្តនេះដឹកនាំដោយ លោក សួស សុណាន់, កញ្ញា សាត ស្រីតូច, និង លោក ពៅ ធាង នៅក្នុងគម្រោង «ការអភិរក្សសត្វដំរី និងបទពិសោធរបស់ជនជាតិដើមភាគតិចនៅកម្ពុជា»។ ព័ត៌មានបន្ថែមពីមហោស្រពភាពយន្តទីក្រុងកម្ពុជា សូមចូលទៅកាន់វេបសាយ http://www.cambodiatownfilmfestival.com/៕
