.jpg)
តារាភាពយន្តចិន ណាយ វិន បង្ហាញរូបភាពមុន និងក្រោយវះកាត់កែសម្ផស្ស។ AFP
ក្រុងប៉េកាំង៖ បារម្ភពីរូបរាងរបស់ខ្លួនដែលអាចប៉ះពាល់ដល់ឱកាសជោគវាសនាក្នុងសង្គមដ៏ប្រកួតប្រជែងរបស់ចិន លោក សៀ ស៊ូរ៉ុង បានសម្រេចចិត្ដធ្វើការវះកាត់កែទម្រង់ច្រមុះរបស់លោក។ យុវជនរូបនេះជាបុគ្គលម្នាក់ចំណោមរាប់លាននាក់ដែលជ្រើសរើសសេវាកែសម្ផស្ស។
អ្នកស្រាវជ្រាវវ័យ ២៧ឆ្នាំរូបនេះ ចង់ឱ្យការប្រើប្រាស់មុខកាំបិតកែច្នៃរូបរាងពី «យុវជនមុខគ្មានហុងស៊ុយ» ទៅជាអ្វីដែលលោកគិតថានឹងបង្កើនយីអ៊ុនសម្រាប់ជីវិត។
សម្ផស្សស្ដង់ដារក្នុងប្រទេសចិនអាចទាមទារភាពប្រាកដប្រជា ចាប់ពីសម្ពាធលើសម្បុរស្បែក កែភ្នែក និងច្រមុះ រហូតដល់ «ភាពរលើបរលោងនៃស្បែក» ជាអ្វីដែលត្រូវបានហៅថា យុវជនសង្ហាសម័យថ្មី។
អ្នកស្រាវជ្រាវវិទ្យាសាស្ត្រ លោក សៀ ស៊ូរ៉ុង ជាមួយគំនូរស្នាមកន្លែងត្រូវកែកុនមុខក្រោមផ្លែកាំបិត។ AFP
លោក សៀ បានពន្យល់ប្រាប់ថា៖ «ខ្ញុំមានអារម្មណ៍ថា ខ្ញុំគួរតែមានស្បែកហ្មត់រលោងនៅវ័យនេះ តែខ្ញុំស្ទើរតែមានដល់មនុស្សវ័យកណ្ដាលទៅហើយ»។
ទីភ្នាក់ងារ AFP បានជួបលោក សៀ ក្នុងក្រុងប៉េកាំង ខណៈលោកត្រៀមខ្លួនទទួលការវះកាត់ជួសជុលរូបរាង។ លោកបានចំណាយប្រាក់ ៤ម៉ឺនយ័ន (ជាង ៦០០០ដុល្លារ) លើការកែកុនទម្រង់មុខកាលពីដើមឆ្នាំ។
លោកបាននិយាយថា៖ «ខ្ញុំធំដឹងក្ដីមកនៅទីជនបទ ដោយមុខមាត់ខ្ញុំមានភាពស្រអាប់ ហើយសម្បុរស្បែកមិនស្រស់ថ្លាទេ។ ខ្ញុំគិតថា រូបរាងខ្ញុំគឺយ៉ាប់តែម្ដងជាទូទៅ។ ខ្ញុំតែងតែមានអារម្មណ៍អាប់ឱនណាស់»។
គ្រូពេទ្យឯកទេសផ្នែកសម្ផស្សបង្ហាញការស្គេនមុខ និងជម្រើសព្យាបាលស្បែកមុខនៅក្រុងប៉េកាំង។ AFP
យុវជនបញ្ញវន្តកាន់តែច្រើនក្នុងសង្គមចិន ជ្រើសរើសសោភណ្ឌវិទ្យា និងការវះកាត់ជាថ្នូរនឹងហុងស៊ុយក្នុងជីវិត។
យោងតាម iResearch បានបង្ហាញថា បុគ្គលក្រុមហ៊ុនជាបុរសប្រមាណ ១៧ភាគរយក្នុងប្រទេសចិន បានទទួលការវះកាត់កែសម្ផស្ស ហើយបុរសភាគច្រើនបានជួសជុលរូបរាងនៅអាយុមុនឈានដល់វ័យ ៣០ឆ្នាំ។
iResearchបន្ដថា ឧស្សាហកម្មវះកាត់កែសម្ផស្សនៅចិនពេលនេះ មានតម្លៃ ១៩៧ពាន់លានយ័ន (៣០ពាន់លានដុល្លារ) កើនពី ៦៤,៨ពាន់លានយ័ន ក្នុងឆ្នាំ២០១៥៕ AFP/HR
អ្នកស្រាវជ្រាវវិទ្យាសាស្ត្រ លោក សៀ ស៊ូរ៉ុង សម្រាកនៅពេទ្យក្រោយវះកាត់កែសម្ផស្ស។ AFP
