ក្រុងហែលស៊ីនគី៖ សំឡេងស្រែកច្រៀងខ្ញាវខ្ញារបស់កុមារតូចៗនឹងឮនៅតាមសាលារៀនវិញក្នុងទីក្រុងរបស់ហ្វាំងឡង់ ចាប់ពីថ្ងៃចន្ទនេះ ក្រោយមានការលើកបម្រាមការច្រៀងក្នុងថ្នាក់រៀនដើម្បីទប់ស្កាត់ការរីករាលជំងឺឆ្លងសកល។
អ៊ូទី សាលូ ប្រធានមន្ទីរអបរំទទួលបន្ទុកថ្នាក់បឋមសិក្សា ក្នុងក្រុងហែលស៊ីនគី បានប្រាប់ AFP ថា៖ «កុមារអាចច្រៀងវិញបានហើយ។ ប៉ុន្ដែពួកគេមិនទាន់អាចកាន់ដៃគ្នាដូចមុនឡើយ។ ពួកគេនឹងត្រូវរក្សាគម្លាតសុវត្ថិភាពដដែល»។
តាំងពីរដូវរងាឆ្នាំមុន សិស្សសាលាតូចៗក្នុងទីក្រុងហែលស៊ីនគី ត្រូវបញ្ចេញសំឡេងរហ៊ឺមក្នុងបំពង់កជាជាងការស្រែកច្រៀងចម្រៀង «រីករាយថ្ងៃកំណើត» ដល់មិត្ដរួមថ្នាក់។ មេរៀនតន្ដ្រីនៅតែមិនត្រូវបានអនុញ្ញាតឱ្យមានចម្រៀង ក្រោយពីអាជ្ញាធរសុខាភិបាលព្រមានថា ការអនុវត្ដបែបនេះអាចបង្កការរីករាលដាលជំងឺកូវីដ ១៩។
ស្ថិតក្រោមគោលការណ៍ណែនាំថ្មីៗដែលត្រូវបានផ្សព្វផ្សាយតាមបណ្ដាសាលារៀន ការស្រែកច្រៀងគួរតែធ្វើឡើងនៅចុងម៉ោង។ នេះបើយោងតាមកាសែត Helsingin Sanomat។
ថ្នាក់រៀនគួរតែមានខ្យល់ចេញចូលល្អហើយកុមារអាយុលើសពី ១២ ឆ្នាំគួរតែពាក់ម៉ាស។
អ្នកគ្រូទទួលបន្ទុកបង្ហាត់មេរៀនតន្ដ្រីទិតតាឡាមផេឡាបានប្រាប់កាសែតនេះកាលពីខែសីហា ពេលគ្រូបង្រៀនតន្ដ្រីជាច្រើនបានដាក់ញ្ញត្ដិបញ្ឈប់បម្រាមនេះថា តន្ដ្រីគឺជាមធ្យោបាយបង្រៀនកុមារតាមធម្មជាតិ។
ការរិះគន់វិធានការសុខាភិបាលបានគូសបញ្ជាក់ថាទីក្រុងនានាផ្សេងទៀត អនុញ្ញាតឱ្យកុមារច្រៀងដោយតម្រូវឱ្យពួកគេរក្សាគម្លាតសុវត្ថិភាពហើយការច្រៀងនៅតាមបារ៍ និងហាងខារាអូខេក្នុងក្រុងហែលស៊ីនគីត្រូវបានអនុញ្ញាតតាំងពីខែមិថុនា។
ហ្វាំងឡង់បានកត់ត្រាអ្នកឆ្លងវីរុសកូរ៉ូណាជាង ១៣៦ ០០០ នាក់ និងសម្លាប់ជាង ១ ០០០ នាក់ ក្នុងចំណោមប្រជាជនសរុប ៥,៥ លាននាក់ ហើយស្ថិតក្នុងចំណោមអត្រាទាបនៅតំបន់អឺរ៉ុប។
នាយករដ្ឋមន្ដ្រីហ្វាំងឡង់ សាន់ណាម៉ារីនបានថ្លែងថា បម្រាមរឹតបន្ដឹងទប់ស្កាត់ជំងឺកូវីដចុងក្រោយនឹងត្រូវបានដកចេញ ពេលដែលកុមារអាយុចាប់ពី ១២ ឆ្នាំប្រមាណ ៨០ ភាគរយបានចាក់វ៉ាក់សាំងគ្រប់ដូស ជាតួលេខត្រូវបានរំពឹងថា នឹងអាចដល់ក្នុងពាក់កណ្ដាលខែតុលានេះ៕ AFP/HR