.jpg)
រូបតំណាង៖ ក្នុងចំណោមសត្វកង់គូរូ ១៤ ក្បាល ដែលស្លាប់ មាន២ក្បាលជាកូនតូចរបស់វា។ AFP
ក្រុងស៊ីដនី៖ ក្មេងជំទង់ ២ នាក់ ត្រូវបានចោទប្រកាន់កាលពីថ្ងៃអង្គារពីបទវាយប្រហារដែលបានធ្វើឱ្យសត្វកង់ហ្គូរូ ១៤ ក្បាល ងាប់នៅឆ្នេរសមុទ្រភាគខាងកើតប្រទេសអូស្ត្រាលី ក្នុងទង្វើមួយដែលគេហៅថា «សោកនាដកម្ម និងភាពសាហាវឥតមេត្តា» ដោយក្រុមអ្នកជួយសង្គ្រោះសត្វ។
ប៉ូលីសបាននិយាយថា ក្មេងប្រុសអាយុ ១៧ ឆ្នាំ ទាំង ២ នាក់ ត្រូវបានចាប់ខ្លួនបន្ទាប់ពីអ្នកស្រុកបានរកឃើញសត្វកង់ហ្គូរូពណ៌ប្រផេះភាគខាងកើត ដែលបានស្លាប់រួមទាំងកូនកង់គូរូ ២ក្បាល នៅជិតឆ្នេរ Batemans ចម្ងាយធ្វើដំណើរប្រហែល ៤ ម៉ោងខាងត្បូងទីក្រុងស៊ីដនីកាលពីព្រឹកថ្ងៃសៅរ៍។
អង្គការជួយសង្គ្រោះសត្វព្រៃ WIRES បាននិយាយនៅលើហ្វេសប៊ុកថា៖ «វាជាទង្វើសោកនាដកម្ម និងសាហាវគ្មានមេត្តា ដែលបានបន្សល់ទុកនូវស្លាកស្នាម ដែលមិនអាចលុបចោលបាន ចំពោះអ្នកស្ម័គ្រចិត្តនៅ មីសសៅស៍ធីស ដែលបានចូលរួមនៅកន្លែងកើតហេតុក៏ដូចជាប្រជាជនក្នុងតំបន់» ។
កូនកង់គូរូញីដែលរួចជីវិតពីការវាយប្រហាររបស់ក្មេងចំទង់ ២ នាក់ ត្រូវបានសង្គ្រោះ។ AFP
ប៉ូលីសបាននិយាយថា ពួកគេបានរកឃើញសត្វងាប់នៅតាមតំបន់ ២ ដាច់ដោយឡែកពីគ្នាក្បែរទីក្រុងឆ្នេរសមុទ្រ។
សមាជិកម្នាក់នៃសាធារណជនបានរកឃើញ កូនកង់គូរូមួយក្បាល ដែលនៅរស់ ដែលត្រូវបានគេដាក់រហស្សនាមថា «ក្តីសង្ឃឹម» ដោយក្រុមអ្នកជួយសង្គ្រោះ។
អ្នកស្រី ចានែល រ៉េណេ ប្រធាន Mid South Coast WIRES បានប្រាប់ទូរទស្សន៍ ABC ថា៖ «គួរឱ្យភ្ញាក់ផ្អើលដែលវា [កូនកង់គូរូញី] អាចជាសះស្បើយមានជីវិត សឹងមិនគួរឱ្យជឿ»។
អ្នកស្រីរំឭកប្រាប់ថា៖ «នៅពេលវាមកដល់ទីនេះ វាពិតជាមិនសមនឹងនៅមានជីវិតទេ»។
យើងបានចំណាយពេលប្រហែលពីរម៉ោង ដើម្បីធ្វើឱ្យវាមានកម្ដៅហើយ ដើម្បីមើលសញ្ញាសង្ឃឹមណាមួយ ដែលថាវានឹងទំនងអាចរស់រានមានជីវិត។
ក្មេងប្រុសទាំង ២ នឹងត្រូវប្រឈមមុខនឹងតុលាការកុមារនៅថ្ងៃទី ២២ ខែវិច្ឆិកា ដោយចោទប្រកាន់ពីបទវាយដំ និងសម្លាប់សត្វដោយឥតគិតពិចារណា៕ AFP/HR
រូបតំណាង៖ ក្នុងចំណោមសត្វកង់គូរូ ១៤ក្បាលដែលស្លាប់ មាន២ក្បាលជាកូនតូចរបស់វា។ AFP
