ក្រុងញូវយ៉ក: ស៊ុបភើមែន (Superman) ម្នាក់លង់ស្នេហ៍នារីអ្នកយកព័ត៌មាន ហើយតដល់ជំនាន់កូនប្រុសរបស់លោកក៏ដូចគ្នា ទោះបីជាចំណងស្នេហ៍ជំនាន់ក្រោយនេះ គឺជាស្នេហារវាងវីរបុរស និងបុរសម្នាក់ទៀតឈ្មោះថា ចេ (Jay)។
DC Comics បានប្រកាសកាលពីថ្ងៃចន្ទថា ស៊ុបភើមែនថ្មីដែលជាកូនប្រុសរបស់ ក្លាក ខេនត៍ និង ល្វីស ឡេន នឹងមានទំនាក់ទំនងស្នេហាជាមួយមិត្តប្រុសរបស់ខ្លួន។
ចូន ខេនត៍ និងអ្នកកាសែតវ័យក្មេង ចេ ណាកាមូរ៉ា បានបង្កើតមិត្តភាពនៅក្នុងរឿងមួយរួចទៅហើយ ដែលបានចេញផ្សាយនៅខែសីហា។ អ្នកបោះពុម្ពផ្សាយបាននិយាយថា ពួកគេនឹងមានឈុតថើបគ្នានៅក្នុងសៀវភៅរឿងរូបភាព ដែលនឹងត្រូវចេញផ្សាយនៅខែក្រោយដោយហៅ ស៊ុបភើមែន ចូន ថា ជាអ្នកស្រឡាញ់ភេទដូចគ្នា។
DC Comics បាននិយាយថា៖ «បន្ទាប់ពីឈុតឆាកដែលស៊ុបភើមែន រលាកទាំងផ្លូវចិត្ត និងរាងកាយពីការព្យាយាមជួយសង្គ្រោះមនុស្សគ្រប់គ្នា អ្នកកាសែត ចេ នៅទីនោះ ដើម្បីមើលថែវីរបុរសជាទីស្រឡាញ់របស់ខ្លួន»។
អ្នកបោះពុម្ពផ្សាយបាននិយាយក្នុងសេចក្តីប្រកាសព័ត៌មានថា រឿងថ្មីនេះនឹងសម្ពោធនៅថ្ងៃទី ៩ ខែវិច្ឆិកា។
លោក ថម ថេល័រ ដែលសរសេរស៊េរីនេះបាននិយាយថា៖ «សព្វថ្ងៃនេះមនុស្សកាន់តែច្រើនអាចមើលឃើញខ្លួនឯងនៅក្នុងកំពូលវីរបុរស ដែលមានឥទ្ធិពលបំផុតនៅក្នុងសៀវភៅរឿងរូបភាព»។
អ្នកគាំទ្របានប្រើប្រាស់បណ្តាញសង្គមគាំទ្រសាច់រឿងបែបនេះ។
តារាសម្តែង អេនថូនី រ៉េប បានសាទរថា៖ «ដំណឹងពីស៊ុបភើមែន ថ្មីនេះធ្វើឱ្យបេះដូងជាមនុស្សមិនប្រុសសុទ្ធរបស់ខ្ញុំរីករាយដោយដឹងពីផលវិជ្ជមាន ចំពោះក្មេងជំនាន់ក្រោយនាពេលបច្ចុប្បន្ន និងទៅអនាគត»។
សៀវភៅរឿងរូបភាពកាន់តែច្រើនមានមាតិកា LGBTQ ដ៏សម្បូរបែប រួមទាំង តួអង្គវីរបុរសក្នុងសៀវភៅរឿង Marvel Comics៕ AFP/HR