ក្រុងសិង្ហបុរី៖ សិង្ហបុរីបានតេស្ដសាកល្បងរ៉ូបូតល្បាត ដែលមានតួនាទីព្រមានដល់អ្នកបង្ហាញអត្ដចរិតមិនចេះរក្សាសុវត្ថិភាពសង្គម ជាមួយការបំពាក់បច្ចេកវិទ្យាកាមេរ៉ាសុវត្ថិភាព ដែលនាំជាក្ដីកង្វល់ចំពោះសិទ្ធិបុគ្គល។
ចាប់ពីកាមេរ៉ាថតជាច្រើនគ្រាប់រហូតដល់បច្ចេកវិទ្យាស្គាល់ភិនភាគ សិង្ហបុរីបង្កើនការប្រើប្រាស់បច្ចេកវិទ្យាតាមដានពលរដ្ឋរបស់ខ្លួន។ ក្រុមមន្ដ្រីតែងតែបានជំរុញបង្កើត «ប្រជាជាតិវៃឆ្លាតតាមរយៈបច្ចេកវិទ្យាទំនើប» តែក្រុមសកម្មជន បាននិយាយថា សិទ្ធិឯកជនត្រូវបានបំភ្លេច ហើយពលរដ្ឋមិនមានឱកាសគ្រប់គ្រងទិន្នន័យដែលបានកើតឡើងលើខ្លួនឯងឡើយ។
សិង្ហបុរីរងនូវការរិះគន់ចំពោះវិធានការរឹតត្បឹតសិទ្ធិសេរីភាពជនស៊ីវិល ហើយពលរដ្ឋខ្លួនឯងក៏សាំងនឹងការរឹតបន្ដឹងនេះ តែក៏មិនទម្លាប់នឹងបច្ចេកវិទ្យាទំនើបទាំងនេះឡើយ។
ឧបករណ៍សុវត្ថិភាពចុងក្រោយរបស់រដ្ឋាភិបាល គឺជារ៉ូបូតកូនឡាន ជាមួយកាមេរ៉ា ៦ គ្រាប់ ដែលផ្សព្វផ្សាយសារព្រមានដល់មហាជន និងស្វែងរកបុគ្គលមិនចេះរក្សាគម្លាតសុវត្ថិភាព។
ការព្រមាននេះ រួមមាន ការជក់បារីនៅបរិវេណហាមឃាត់ ចតកង់មិនចំទីតាំង និងបំពានច្បាប់រក្សាគម្លាតសុវត្ថិភាពជាដើម។
អំឡុងពេលល្បាត រ៉ូបូត Xavier មួយត្រាច់ចរតាមតំបន់សំណង់លំនៅឋាន និងឈប់នៅមុខក្រុមមនុស្សចាស់មើលពួកគេលេងអុក។
សំឡេងរ៉ូបូត បានបន្លឺឡើង ខណៈកាមេរ៉ានៅលើក្បាលរបស់វាដែលតែងតែរេរកវត្ដមានមនុស្ស ហើយបន្លឺឡើងថា៖ «សូមមេត្ដារក្សាគម្លាតយ៉ាងតិចមួយម៉ែត្រកន្លះពីគ្នា។ សូមជួបជុំគ្នាត្រឹម ៥នាក់បានហើយ»។
អំឡុងពេលសាកល្បង ៣សប្ដាហ៍ក្នុងខែកញ្ញា រ៉ូបូតពីរគ្រឿងត្រូវបានដាក់ល្បាតនៅតាមតំបន់លំនៅឋាន និងមជ្ឈមណ្ឌលផ្សារទំនើប។
លោក ហ្វ្រាន់នី តែវ ជាជំនួយការផ្នែកស្រាវជ្រាវ អាយុ ៣៤ ឆ្នាំ ដែលដើរផ្សារទំនើប បាននិយាយថា៖ «វារំឭកខ្ញុំពីរ៉ូបូតរឿងរ៉ូបូតប៉ូលិស Robocop»។
អ្នកស្រី និយាយថា៖ «ពិភពមនុស្សយន្តប៉ូលិសក្នុងពិភពមនុស្សពោរពេញដោយអយុវត្តិធម៌។ ខ្ញុំមានអារម្មណ៍រារែក មិនសូវយល់បន្ដិចអំពីទស្សនៈនៃការបង្កើតរ៉ូបូតល្បាតនេះ»៕