ភ្នំពេញៈ វត្ថុអនុស្សាវរីយ៍ជាកន្លាស់ភ្ជាប់អាវសមានរចនាជាលេខ ១០០ ក្បាច់ខ្មែរ និងភ្ជាប់ជាមួយព្រះឆាយាលក្ខណ៍ ព្រះករុណាព្រះបាទសម្តេច ព្រះនរោត្តមសីហនុព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋនឹងបោះពុម្ពចំនួន ១ ៥០០ រូប សម្រាប់ជូនអ្នកចូលរួមក្នុងកម្មវិធី «មួយម៉ឺនអាល័យ លើកទី៦» នៅដើមខែក្រោយចំនួន ៣ ថ្ងៃ។
ក្រុមព្រះសុរិយានឹងប្រារព្ធកម្មវិធី «មួយម៉ឺនអាល័យ លើកទី៦» ក្រោមប្រធានបទថា«ថ្វាយព្រះរាជអាល័យនិងរំឭកខួប ១០០ ព្រះវស្សា ព្រះរាជសម្ភព» នៃព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះបិតាសិល្បៈភាពយន្តខ្មែរព្រះបរមរតនកោដ្ឋជាទីគោរពសក្ការៈដ៏ខ្ពង់ខ្ពស់បំផុតចាប់ពីថ្ងៃទី ២ ដល់ទី ៤ ខែវិច្ឆិកា ឆ្នាំ ២០២២ នៅសាលមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) នៅក្នុងបរិវេណនៃសាកលវិទ្យាល័យភូមិន្ទភ្នំពេញរាជធានីភ្នំពេញ ចូលទស្សនាដោយឥតគិតថ្លៃ។
លោក យាង វណ្ឌី ប្រធានក្រុមព្រះសុរិយាបានឱ្យដឹងពីគោលបំណងនិងសកម្មភាពត្រួសៗនៃការរៀបចំកម្មវិធីនេះដោយលោកអះអាងថា ធ្វើឡើងដើម្បីជាការតបស្នងព្រះមហាករុណាទិគុណដ៏ខ្ពង់ខ្ពស់បំផុតថ្វាយព្រះករុណា ព្រះបាទសម្តេចព្រះនរោត្តមសីហនុ ព្រះបិតាសិល្បៈភាពយន្តខ្មែរ។
លោក យាង វណ្ឌី បន្តថា៖ «ពេញ ១ ព្រះជន្មព្រះអង្គ បានលះបង់ដើម្បីតែបម្រើឧត្តមប្រយោជន៍ ជូនព្រះនគរកម្ពុជា ឱ្យទទួលឯករាជ្យជាតិពេញបរិបូរ សុខសន្តិភាព ការអភិវឌ្ឍគ្រប់វិស័យ ក្នុងនោះវិស័យសិល្បៈភាពយន្តខ្មែរ ដែលត្រូវបានប្រសិទ្ធនាមថាសិល្បៈទី៧ នៃកម្ពុជា។ព្រះអង្គគឺជាចលករដ៏សំខាន់បំផុតដែលបានធ្វើឱ្យវិស័យនេះកកើតឡើងមកបានប្រកបដោយភាពល្អឥតខ្ចោះនិងទទួលបានការទំនុកបម្រុងសព្វបែបយ៉ាងរហូតទទួលបានភាពល្បីល្បាញទូទាំងព្រះនគរ និងឆាកអន្តរជាតិដោយបានប្រសិទ្ធនាមថា យុគមាសនៃភាពយន្តខ្មែរ»។
វិស័យភាពយន្តប្រសូតឡើងក្រោមព្រះរាជកិច្ចចាត់ចែងដ៏ខ្ពង់ខ្ពស់ជាទីបំផុតរបស់ព្រះបរមរតនកោដ្ឋព្រះបិតាសិល្បៈភាពយន្ត ស្តេចបានសព្វព្រះរាជហឫទ័យចាត់បញ្ជូនបញ្ញវន្តខ្មែរជាច្រើនរូបទៅសិក្សារៀនសូត្រនៅបរទេស ដើម្បីមកផលិតភាពយន្តខ្មែរ ប្រកបដោយគុណភាពខ្ពស់ បម្រើជូនប្រជានុរាស្ត្រ និងផ្សព្វផ្សាយទៅបរទេស។
លោក យាង វណ្ឌី បន្តឱ្យដឹងថា៖ «ចង់ផ្សព្វផ្សាយភាពយន្តខ្មែរដែលសល់ពីរបបខ្មែរក្រហមឱ្យមហាជននិងយុរជនបានទស្សនា សិក្សាស្វែងយល់ពីបទពិសោធ ជីវភាព ការរស់នៅ សេដ្ឋកិច្ច វប្បធម៌ សិល្បៈ សីលធម៌របស់ប្រជារាស្ត្រតាមរយៈភាពយន្ត»។
កម្មវិធី «មួយម៉ឺនអាល័យ លើកទី៦» នេះគឺជាសកម្មភាពថ្មីចុងក្រោយនៃសមិទ្ធផលស្រាវជ្រាវរបស់ក្រុមព្រះសុរិយា ក្នុងរយៈពេល ១២ ឆ្នាំ ដែលបានចាប់ផ្តើមពីឆ្នាំ ២០១០ មកដល់ឆ្នាំ ២០២២ នេះ។
កម្មវិធីសំខាន់ៗដែលត្រូវបង្ហាញជូនអ្នកចូលរួមទស្សនាកម្សាន្ត ៣ ថ្ងៃនោះ រួមមាន ការបញ្ចាំងភាពយន្តជាព្រះរាជនិពន្ធនិងក្រសាល (សម្តែង) ដោយព្រះបាទសម្តេចព្រះនរោត្តមសីហនុ ព្រះបរមរតនកោដ្ឋ និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ។ ចម្រៀងដែលច្រៀងសរសើរ និងថ្វាយព្រះរាជអាល័យពីសង្គមរាស្ត្រនិយម និងចម្រៀងតែងនិពន្ធថ្មី និងកម្មវិធីបង្សុកូល និងរាប់បាត្រព្រះសង្ឃ ១០០ អង្គ ឧទ្ទិសព្រះមហារាជកុសលថ្វាយ ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ។
ស្នាព្រះហស្ដជាច្រើនព្រះរាជនិពន្ធក្នុងវិស័យភាពយន្ត និងចម្រៀងដោយក្នុងនោះមានខ្សែភាពយន្តចំនួន ៤ រឿង សម្រាប់ចាក់បញ្ចាំងក្នុងកម្មវិធីមួយម៉ឺនអាល័យលើកទី៦ខាងមុខមានរឿង «ព្រៃប្រសិទ្ធិ៍-La ForetEnchantee» ផលិតឆ្នាំ ១៩៦៧, រឿង«ឆាយាលើអង្គរ-Khmer Oldie Movie»ផលិតឆ្នាំ ១៩៦៨, រឿង «សន្ធិប្រកាស-Khmer Movies during 1969s» ផលិតឆ្នាំ ១៩៦៩ និងរឿង «ផ្កាកុលាបនៃភ្នំបូកគោ-Rose de Bokor» ផលិតឆ្នាំ ១៩៦៩។
ឯបទចម្រៀងជាព្រះរាជនិពន្ធនិងតែងថ្មីមានច្រើនបទ ដោយចម្រៀងទាំងនោះជាការនិពន្ធរំឭកពីព្រះតេជៈចេស្តាបារមី ដូចជាបទ «ថ្វាយព្រះអាល័យ» បទ «មហាករុណាទិគុណមិនអាចបំភ្លេចបាន» បទ «នាវាកម្ពុជា» និងបទ «ដួងចន្ទប្រចាំជាតិ»។ បទរំឭកពីឯករាជ្យជាតិ មានបទ «ថ្ងៃ ៩ វិច្ឆិកា» បទ«កម្ពុជាសុខសាន្ត»។ បទរំឭកពីសមិទ្ធផលសង្គម ក្នុងវិស័យឧស្សាហកម្ម ដូចជាបទ «ព្រះបិតាឧស្សាហកម្មជាតិ»។ បទរំឭកពីសមិទ្ធផល នៃហេរដ្ឋារចនាសម្ព័ន្ធជាតិ មានដូចជាបទ «ត្បែងមានជ័យ» បទ«ក្រុងសៀមរាប» និងបទ «ដៃស្ទឹងសំឡូត» ជាដើម។
បទរំឭកពីស្នាព្រះហស្ដទាមទារ ប្រាសាទព្រះវិហារ បទ «១៥ មិថុនា» និងបទ«ព្រះវិហារព្រះវិហារ»។ បទរំឭកពីស្នាព្រះហស្ដការពារបូរណភាពទឹកដី ដូចជាបទ «ជីវិតជាតិយើង» និងបទ«ស្រណោះអូរគ្រាង»។ បទរំឭកពីសមិទ្ធផលសង្គមលើវិស័យកសិកម្ម មានបទ «អនុស្សាវរីយ៍កំពង់គល់» និងបទ «ព្រះបិតាកសិកម្ម»។ បទរំឭកពីសមិទ្ធផលសង្គមក្នុងវិស័យអប់រំ មានបទ «វិទ្យាល័យព្រះបិតាឯករាជ្យជាតិក្រឡាញ់» បទ «ព្រះបិតាសិក្សាធិការជាតិ»។ បទរំឭកពីព្រះរាជសកម្មភាពរួបរួមជាតិ មានបទ «គួរចេះរួបរួមសាមគ្គី» និងបទ«មាគ៌ាអព្យាក្រឹត»។ បទរំឭកពីស្នាព្រះហស្ដក្នុងវិស័យភាពយន្ត មានបទ «ព្រៃប្រសិទ្ធិ៍»។ លើសពីនេះ ចម្រៀងជាព្រះរាជនិពន្ធថ្មីចុងក្រោយ គឺបទ«លាហើយកម្ពុជា» នឹងច្រៀងរៀងរាល់ចុងក្រោយកម្មវិធីទាំង៣ថ្ងៃ។
លោក ប៉ុក បូរក្ស ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ បានសម្តែងក្តីសោមនស្សរីករាយខ្លាំងចំពោះកម្មវិធី «មួយម៉ឺនអាល័យ លើកទី៦» របស់ក្រុមព្រះសុរិយា ដែលគ្រោងរៀបចំនៅខែក្រោយនេះ។
លោកបានថ្លែងថា៖ «ខ្ញុំយល់ថា នេះជាសកម្មភាពដ៏ថ្លាថ្លៃបំផុត ក្នុងកិច្ចខំប្រឹងប្រែង គាស់រំលើង និងរំឭកឡើងវិញ នូវស្នាព្រះហស្ដព្រះករុណាព្រះបាទនរោត្តមសីហនុ ព្រះមហាវីរក្សត្រ ព្រះបរមរតនកោដ្ឋ ជាទីសក្ការៈដ៏ខ្ពង់ខ្ពស់។ ស្របពេលនៃការប្រារព្ធខួប ១០០ ព្រះវស្សាផងនោះ គឺជាឱកាសនៃការរំឭកនូវវីរភាពរបស់ព្រះអង្គក្នុងកិច្ចការពារបូរណភាពទឹក ការទាមទារឯករាជ្យជាតិ និងការដឹកនាំប្រទេសនាសម័យកាលព្រះអង្គក៏ដូចជាបង្ហាញពីភាពរីកចម្រើនលើវិស័យភាពយន្តខ្មែរនៅពេលនោះ»។
លោកបញ្ជាក់ថា ការបង្ហាញនូវស្នាព្រះហស្ដខ្សែភាពយន្តទាំងប៉ុន្មានថ្ងៃប្រារព្ធកម្មវិធីខាងមុខនោះនឹងស្ថិតក្នុងដួងចិត្តកូនខ្មែរគ្រប់រូប និងបណ្តុះស្មារតីឱ្យខិតខំ ថែរក្សាវិស័យភាពយន្តខ្មែរបន្តទៀត ទាំងអតីតកាល និងបច្ចុប្បន្នកាល។
លោក ប៉ូរក្ស បានបន្ថែមថា៖ «ក៏សូមអរគុណដល់ក្រុមព្រះសុរិយាដែលជានិច្ចកាលតែងខិតខំធ្វើសកម្មភាព រំឭកឡើងនូវអនុស្សាវរីយ៍ជាភាពរុងរឿងនៃភាពយន្តខ្មែរក្នុងសម័យអតីតកាល។ ជាពិសេសការបង្ហាញស្នាព្រះហស្ដខ្សែភាពយន្តទាំងប៉ុន្មានរឿងនោះគឺជាការឆ្លុះបញ្ចាំងឱ្យឃើញពីការយកព្រះហឫទ័យទុកដាក់របស់ព្រះបាទសម្តេចព្រះនរោត្តមសីហនុ ព្រះបរមរតនកោដ្ឋ ក្នុងវិស័យភាពយន្ត»។
លោក យាង វណ្ឌី ក៏រំឭកពីកម្មវិធីជាច្រើន ជាសមិទ្ធផលរបស់ក្រុមព្រះសុរិយា សម្រាប់បេសកកម្មស្រាវជ្រាវជាង ១ ទសវត្សរ៍នេះ ដោយមានបេសកកម្មដំបូង តាមរយៈការបង្កើតជាកម្មវិធីទេសចរណ៍ភាពយន្តខ្មែរលើកទី១ និងកម្មវិធីទេសចរណ៍ភាពយន្តខ្មែរលើកទី២។
ខណៈកម្មវិធី «មួយម៉ឺនអាល័យ លើកទី១» ធ្វើនៅខែសីហា ឆ្នាំ ២០១៦ នៅសាលសន្និសីទចតុមុខ ក្រោមអធិបតីសម្តេច នរោត្តម សិរីវុឌ្ឍ ជាឧត្តមប្រឹក្សាផ្ទាល់ព្រះមហាក្សត្រ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងលោក សាយ សំអាល់ រដ្ឋមន្ត្រីក្រសួងបរិស្ថាន។
កម្មវិធី «មួយម៉ឺនអាល័យ លើកទី២» ធ្វើនៅថ្ងៃទី ៣ ដល់ទី ៥ ខែសីហា ឆ្នាំ ២០១៧ នៅសាលសន្និសីទចតុមុខ ដែលបង្ហាញជូនលោកស្រី ឌី សាវ៉េត តារាភាពយន្តខ្មែរផ្ការីកគ្រប់រដូវ។កម្មវិធី «មួយម៉ឺនអាល័យ លើកទី៣» នៅថ្ងៃទី ១៨ ខែវិច្ឆិកា ឆ្នាំ ២០១៧ ធ្វើនៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) ដែលបង្ហាញជូនលោកស្រី ឌី សាវ៉េត តារាភាពយន្តខ្មែរផ្ការីកគ្រប់រដូវ និងលោកស្រី សាក់ ស៊ីស្បោង តារាសម្តែងបែបអន្តរជាតិលើកទី១។ កម្មវិធី «មួយម៉ឺនអាល័យ លើកទី៤»នៅថ្ងៃទី ១៣ ខែវិច្ឆិកា ឆ្នាំ ២០១៨ ធ្វើនៅសាលប្រជុំផ្សារទំនើបអ៊ីអន សែនសុខ ដែលបង្ហាញជូនលោកស្រី ឌី សាវ៉េត តារាភាពយន្តខ្មែរផ្ការីកគ្រប់រដូវ និងលោកស្រី សាក់ ស៊ីស្បោង តារាសម្តែងបែបអន្តរជាតិលើកទី២។
កម្មវិធី «មួយម៉ឺនអាល័យ លើកទី៥» នៅថ្ងៃទី ២២ ដល់ទី ២៤ ខែតុលា ឆ្នាំ ២០១៩ ធ្វើនៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) ដែលបង្ហាញខ្សែភាពយន្តរឿង «កាកី» ជាហ្វីល ទើបទិញពីប្រទេសក្រៅក្រោមអធិបតី សម្តេច ស៊ីសុវត្ថិ ពង្សនារីមុនីពង្ស ជាឧត្តមប្រឹក្សាផ្ទាល់ព្រះមហាក្សត្រនិងលោកស្រី ម៉ែន សំអន ជាឧបនាយករដ្ឋមន្ត្រី។
កាលពីថ្ងៃទី ១៧ ខែកក្កដា ឆ្នាំ ២០២២ ដោយសារក្តីស្រឡាញ់ខ្លាំងលើមរតកវប្បធម៌សិល្បៈភាពយន្ត និងចម្រៀងខ្មែរ នាយុគសម័យមាសមុនរបបខ្មែរក្រហមនោះ ក្រុមព្រះសុរិយាបានបង្ហាញទិន្នន័យនៃការស្រាវជ្រាវរបស់ខ្លួនក្នុងរយៈពេល ១២ ឆ្នាំ មានបទចម្រៀង ៥ ៥២០ បទ និងសិល្បករ-សិល្បការិនី មានសរុបចំនួន ៧២ រូប និង ១០ វង់តន្ត្រី ជាចម្រុះតន្ត្រីបុរាណសម័យខ្មែរ៕