.jpg)
អ្នកចូលរួមមហោស្រពភាពយន្តខ្លី ចតុមុខឆ្នាំ ២០២២។ រូបថត សហការី
ភ្នំពេញៈ មហោស្រពភាពយន្តខ្លីលើកទី១១ បញ្ចប់ដោយភាពជោគជ័យក្នុងរយៈពេល ៤ ថ្ងៃ ហើយខ្សែភាពយន្តខ្លី ក្នុងស្រុករឿង «សំឡេងរាត្រី» បានជាប់ជយលាភីភាពយន្តល្អបំផុតប្រចាំឆ្នាំ ២០២២ ជាមួយប្រាក់រង្វាន់ចំនួន ១ ០០០ ដុល្លារ។ នេះបើតាមការបញ្ជាក់ពីប្រធានមហោស្រពឆ្នាំ ២០២២ កាលពីរាត្រីថ្ងៃទី ២៨ ខែវិច្ឆិកា។
លោក ស៊ុំ ស៊ីថែន ប្រធានមហោស្រពភាពយន្តឆ្នាំនេះ បានប្រាប់ថា ចំនួនទស្សនិកជនចូលមកមើលភាពយន្តខ្លីនៅសាលមហោស្រពចតុមុខ រោងភាពយន្ត Legend និងរោងភាពយន្ត Major Cineplex ដែលមានខ្សែភាពយន្តចាក់បញ្ចាំងសរុបចំនួន ៥៥ រឿង នោះសរុប ៥០០ នាក់។
លោកបញ្ជាក់ថា៖ «ចំនួន ៤ ថ្ងៃ មានអ្នកទស្សនាចំនួន ៥០០ នាក់ និងការផ្សព្វផ្សាយ តាមរយៈបណ្តាញសង្គម ដែលទទួលបានការចូលចិត្ត (Likes) បន្ថែមមាន ១ ៣៤៩ នាក់ អ្នកចាប់អារម្មណ៍ (Reaches) ចំនួន ១៦៣ ៧២៧ នាក់ ដែលគិតពីថ្ងៃទី ៨ ខែមីនា ឆ្នាំ ២០២២ (ថ្ងៃបើកទទួលរឿងប្រកួត) រហូតដល់ថ្ងៃទី ២៨ ខែវិច្ឆិកា ឆ្នាំ ២០២២»។
ភាពយន្តខ្លីកម្ពុជាល្អបំផុតប្រចាំមហោស្រពឆ្នាំនេះ បានទៅលើរឿង «សំឡេងរាត្រី» របស់សមិទ្ធករ សុខ ច័ន្ទរ៉ាដូ និងវ៉ាន់ គង់ហា ដែលទទួលបានប្រាក់រង្វាន់ចំនួន ៤ លានរៀល។ ឯភាពយន្តខ្លីកម្ពុជារឿង «ថ្ងៃរះក្នុងចិត្ត» របស់សមិទ្ធករ សាន ដានិច ជាប់រង្វាន់ឆ្នើមបន្ទាប់ ទទួលបានប្រាក់រង្វាន់ ២ លានរៀល។
ភាពយន្តខ្លីរឿង «កញ្ញាអតិថិជន» របស់សមិទ្ធករ ទី ទេពនិមល ជាប់ពានរង្វាន់ពីទស្សនិកជនក្នុងស្រុក បានប្រាក់ ១,២ លានរៀល ហើយរឿង «ពលី» របស់សមិទ្ធករ ថោង សារ៉េត ជាប់រង្វាន់លើកទឹកចិត្តពីមេប្រយោគ ទទួលបានបណ្ណសរសើរពីកម្មវិធី។
ឯភាពយន្តខ្លីអន្តរជាតិល្អបំផុតវិញ បានលើរឿង «Curupira and the Machine of Destiny» របស់សមិទ្ធករ Janaina Wangner ជាមួយប្រាក់រង្វាន់ ១,២ លានរៀល។ ភាពយន្តខ្លីអន្តរជាតិរឿង «Domar» របស់សមិទ្ធករ Alcibiade Cohen ជាប់រង្វាន់លើកទឹកចិត្តពីមេប្រយោគ ឯភាពយន្តខ្លីអន្តរជាតិរឿង «Lili Alone» របស់សមិទ្ធករ Zou Jing ជាប់ពានរង្វាន់ពីទស្សនិកជន ដោយទទួលបានបណ្ណសរសើរពីកម្មវិធី។
ថ្លែងក្នុងថ្ងៃបិទមហោស្រពភាពយន្តខ្លីនោះដែរ លោក ស៊ុំ ស៊ីថែន បានកត់សម្គាល់ពីចំណុចសំខាន់សម្រាប់កម្មវិធីមហោស្រពភាពយន្តខ្លីឆ្នាំ ២០២២ នេះ មានលក្ខណពិសេសប្លែកជាងលើកមុនៗ មានចំនួន ៦ ចំណុច។ ចំណុចទី១ ជំនាន់ទី១១ នេះ ភាពយន្តខ្លីដែលមានគុណភាព និងទទួលស្គាល់ពីមហោស្រពក្រៅស្រុករួចហើយ ក៏កម្មវិធីនៅតែបើកឱកាសដល់យុវសមិទ្ធករជំនាន់ថ្មី មកពីសាលា PSE មាន ៦ រឿង ដាក់បន្តឆ្នាំនេះ។
ចំណុចទី២ ភាពយន្តឯកសារនៅតែបន្តទទួលទាំងក្នុងស្រុក និងក្រៅស្រុក ជាពិសេសពីគម្រោង ២ គឺ «តោះថតឯកសារនៅកម្ពុជា» កាលពីឆ្នាំ ២០២១ និងឆ្នាំ ២០២២ ថ្មីៗនេះ មានវគ្គ Docu Collab ដែលរៀបចំដោយអង្គការភាពយន្តឈូករ័ត្នបានបណ្តុះបណ្តាលយុវជន ជាជនជាតិដើមភាគតិច ៦ រូប មកពីខេត្តរតនគិរី ក្រចេះ កំពង់ធំ និងពោធិ៍សាត់។
ចំណុចទី៣ កម្មវិធីមហោស្រព នឹងមិនអាចដំណើរការតទៅបានទេ បើគ្មានក្រុមស្ម័គ្រចិត្តដូចរាល់ដង គ្រាន់តែលើកនេះ ហាក់ឃើញមានភាពរអាក់រអួលខ្លះ។
លោក ស៊ុំ ស៊ីថែន សង្កត់ធ្ងន់ថា៖ «ខ្ញុំសូមសរសើរទឹកចិត្តដល់អ្នកស្ម័គ្រចិត្ត ដែលនៅបន្តការងារក្នុងមហោស្រព តាំងពីខែ ៣ មកដល់បច្ចុប្បន្ន (ទី ២៨ វិច្ឆិកា)។ ចំណុចនេះបញ្ជាក់ពីការរក្សានូវចំណាប់អារម្មណ៍ និងការបត់បែន ពីសំណាក់យុវជនខ្មែរ ក្នុងការកសាងចលនារស់រវើកដល់វិស័យភាពយន្ត។ ពិតណាស់ការងារចាត់ចែង និងអន្តរបុគ្គលរបស់ពួកគេ បង្ហាញពីគោលដៅមួយទៀត ក្នុងការរួមចំណែកដល់ធនធានមនុស្សក្នុងស្រុក លើផ្នែកអ្នកដឹកនាំគម្រោងភាពយន្ត ហើយមិនត្រឹមតែអ្នកធ្វើភាពយន្ត ឬសមិទ្ធិករទេ!»។
ចំណុចទី៤ នៅតែមានការអនុញ្ញាត និងគាំទ្រពីក្រសួងវប្បធម៌ និងវិចិត្រសិល្បៈ និងក្រសួងព័ត៌មាន។ ចំណុចទី៥ ដើម្បីធានាដល់ស្ថានភាពហិរញ្ញវត្ថុ និងប្រតិបត្តិការគឺមហោស្រព ក៏ទទួលបានការចូលរួមពីមូលនិធិកុមារកម្ពុជា (CCF) មូលនិធិ Purin Pictures និងអ្នកវិភាគទាន តាមការអំពាវនាវអនឡាញជាច្រើនទៀត។
ចំណុចទី៦ ឆ្នាំនេះកម្មវិធីសម្រេចរើសជយលាភីពីឆ្នាំមុនៗ ដូចជាលោក លី ប៉ូឡែន និងលោកចាប សោមច័ន្ទរិទ្ធិ មកធ្វើជាមេប្រយោគ សម្រាប់ភាពយន្តក្នុងស្រុក ដើម្បីបញ្ជាក់ឱ្យឃើញពីការផ្សារភ្ជាប់ពីជំនាន់មួយទៅជំនាន់មួយ តាមរយៈការឱ្យយោបល់ និងវាយតម្លៃស្ថាបនាទៅវិញទៅមក។
លោក ស៊ុំ ស៊ីថែន លើកឡើងសរុបថា៖ «ចំណុចលេចធ្លោទាំងនេះ នាំមកនូវអារម្មណ៍ពិសេសនៅឆ្នាំ ២០២២ តាមរយៈការផ្តល់ប្រយោជន៍ដល់សហគមន៍ភាពយន្តរបស់យើង។ ទោះពេលខ្លះ មានការយ៉ាប់យឺនយ៉ាងណាក្តី ក៏ស្មារតីស្នូលរបស់យើងនៅមិនប្រែប្រួល ព្រោះខ្ញុំជឿថា គ្រាប់ពូជល្អៗ នឹងត្រូវបានបណ្តុះចេញមកបន្ថែមតាមរយៈមហោស្រពយើងនៅរាល់ឆ្នាំទៅមុខទៀត»។
ចក្ខុវិស័យនេះ កាន់តែក្លាយជាការពិត ខណៈដែលអង្គការ និងក្រុមភាពយន្តឈូករ័ត្ន បន្តពង្រីកសម្ព័ន្ធកិច្ច និងភាពជាដៃគូរបស់ខ្លួនពេញផ្ទៃប្រទេស និងលើឆាកអន្តរជាតិ។
ទោះជាយ៉ាងណា មហោស្រពយើងនៅតែបន្ត ទទួលការចូលរួមជាថវិកាបន្ថែម ដើម្បីទ្រទ្រង់ជំនាន់ទី១២ នៅឆ្នាំ ២០២៣ ឱ្យមានភាពរលូនតាមរយៈគណនី ABA -SUNFLOWER FILM ORGANIZATION-000 804 814៕
