ភ្នំពេញៈការជួយសង្គមអាចធ្វើឡើងបានច្រើនរូបភាព ដោយតិច ឬច្រើនក៏បានផ្ដល់ផលប្រយោជន៍ណាមួយដល់មនុស្ស ១ក្រុមដែរ ដោយឡែក បច្ចុប្បន្ននេះ ការជួយសង្គមភាគច្រើនគឺមាននៅក្នុងការធ្វើអាជីវកម្ម។
ស្របនឹងទឹកចិត្តដែលចង់រួមចំណែកជួយដល់សង្គម សហគ្រាសមួយ ត្រូវបានបង្កើតឡើងដោយផ្ដោតលើការផ្គត់ផ្គង់ទឹកឃ្មុំស្តង់ដា ចេញពីខេត្តប៉ែកឦសាននៃប្រទេសកម្ពុជា។ បើមើល១ជ្រុង គេប្រហែលអាចត្រឹមតែឃើញថានេះជាអាជីវកម្មដែលផ្ដល់ផលចំណេញដល់បុគ្គលផ្ទាល់ ប៉ុន្តែមែនទែនទៅ វាបានជួយរក្សាព្រៃឈើឱ្យគង់វង្សនៅតាមតំបន់អភិរក្សនានាទៀតផង។
សហគ្រាសនេះមានឈ្មោះថា សហគ្រាសសង្គម អ៊ីភីអិល ផូលីនែត (EPL Pollinate) ដែលបង្កើតឡើងនៅក្នុងឆ្នាំ២០១៩។សហគ្រាសមួយនេះមានការចូលរួមពីអ្នកជំនាញជាច្រើនរូបដូចជា អ្នកជំនាញបរិស្ថាន អ្នកជំនាញឃ្មុំ អ្នកជំនាញគ្រប់គ្រងចំណីអាហារនិងអ្នកជំនាញមន្ទីរពិសោធន៍ដែលការចូលរួមនេះដើម្បីធ្វើសកម្មភាពអភិរក្សធនធានធម្មជាតិក៏ដូចជាបង្កើតផលិតផលធម្មជាតិដែរ។
អ្នកស្រី សែម ស្រីតូច ដែលជាសហស្ថាបនិក និងជានាយិកាប្រតិបត្តិស្តីទីនៃសហគ្រាសសង្គមអ៊ីភីអិល ផូលីនែត បានឱ្យដឹងថា សហគ្រាសអ្នកស្រីមានបំណងក្នុងការពង្រឹងការអភិរក្សព្រៃឈើនិងរក្សាស្ថិរភាពចំណីអាហារ តាមរយៈការផលិត និងចែកចាយទឹកឃ្មុំព្រៃដែលមានគុណភាព គោរពតាមស្តង់ដា អនាម័យ។
ម្យ៉ាងទៀតដោយសារតែអ្នកស្រី និងក្រុមការងារបានមើលឃើញពីកង្វះខាតនៃការផ្គត់ផ្គង់ទឹកឃ្មុំ ការផលិតនិងចែកចាយទឹកឃ្មុំគ្មានស្តង់ដា ចរាចរណ៍ទឹកឃ្មុំក្លែងក្លាយនៅលើទីផ្សារ និងការជិតផុតពូជឃ្មុំព្រៃតាមរយៈការប្រមូលផលមិនត្រូវស្តង់ដាជាដើម។
អ្នកស្រី សែម ស្រីតូច បានបញ្ជាក់ថា ៖ «តាមរយៈសកម្មភាពដែលសហគ្រាសយើងបានធ្វើកន្លងមកគឺយើងបានចូលរួមកាត់បន្ថយអត្រាមរណៈពីសំណាក់អ្នកយកឃ្មុំ រក្សាបាននូវដើមឈើព្រៃខ្ពស់ៗ ចូលរួមក្នុងការបង្កើតអាជីវកម្មឃ្មុំទៅដល់ស្ត្រីមេផ្ទះ និងលើកស្ទួយជីវភាពសេដ្ឋកិច្ចគ្រប់ភាគីពាក់ព័ន្ធ»។
នៅក្នុងរយៈពេលប្រមាណជា៣ឆ្នាំមកនេះ ក្រុមហ៊ុនអ្នកស្រីបានសហការជាមួយស្ថាប័នពាក់ព័ន្ធជា ច្រើនដូចជា អង្គការ WWFអង្គការWCFអង្គការពន្លកបៃតង សហគ្រិនខ្មែរ និងអង្គការផ្សេងទៀតនៅក្នុងគម្រោងអភិរក្សព្រៃឈើ ការអភិរក្សឃ្មុំ ក៏ដូចជាការចងក្រងជាសហគមន៍ផងដែរ។
អ្នកស្រីបានបញ្ជាក់ថា៖ «តាមរយៈកិច្ចខិតខំប្រឹងប្រែងទាំងនេះ ជាលទ្ធផលគឺយើងជួយបាន៤៦សហគមន៍ និងប្រជាសហគមន៍៧០០ហើយ បានបង្កើតអាជីវកម្មឃ្មុំទៅដល់ស្ត្រីមេផ្ទះដល់ស្ត្រីចំនួន៦០នាក់ផងដែរ»។
ដើម្បីបន្តឈានទៅទទួលបានគុណភាពស្តង់ដា សហគ្រាសអ្នកស្រីបានបែងចែកជា ៤បេសកកម្ម ក្នុងនោះមានផលិត និងចែកចាយទឹកឃ្មុំព្រៃ,ផ្ដល់សេវាកម្មបច្ចេកទេស,ផ្ដល់សេវាកម្មដំណើរលម្អងនិងការផលិតនូវផលិតផលផ្សេងៗចេញពីទឹកឃ្មុំ។
កន្លងមកក្រុមហ៊ុនមួយនេះទទួលបានការអនុញ្ញាតនិងគាំទ្រពីនាយកដ្ឋានរដ្ឋបាលព្រៃឈើនៃក្រសួងកសិកម្មក្នុងការបន្តគាំពារព្រៃឈើ និងសេដ្ឋកិច្ចប្រជាសហគមន៍នៅតាមតំបន់អភិរក្ស ព្រៃឈើ ជាពិសេសគឺនៅតំបន់ប៉ែកឦសានតែម្ដង។
បើតាមការបញ្ជាក់បន្ថែមពីអ្នកស្រី សែម ស្រីតូច អ្នកស្រីមានការជឿជាក់ចំពោះការបន្តជួយប្រជាសហគមន៍បានកាន់តែច្រើន ដោយហេតុថា សហគ្រាសអ្នកស្រីមានក្រុមបច្ចេកទេសគ្រប់គ្រាន់ ព្រមទាំងមានសមត្ថភាពក្នុងការបង្កើតបច្ចេកទេសថ្មីៗដែលធានាបាននូវការផ្គត់ផ្គង់គ្រប់តម្រូវការនិងទន្ទឹមនឹងនោះ នៅអាចរក្សាបាននូវឃ្មុំព្រៃកុំឱ្យផុតពូជទៀតផង។ ម្យ៉ាងទៀត សហគ្រាសអ្នកស្រីមានទស្សនវិស័យ រឹងមាំ និងច្បាស់លាស់ក្នុងការជួយជាប្រយោជន៍ធំធេងដល់សង្គម។
ជាងនេះទៅទៀត តាមរយៈការសហកាជាមួយអង្គការ WWF ជារឿយៗក្រុមការងារតែងចុះទៅដល់សហគមន៍ផ្ទាល់ដើម្បីបង្រៀនបច្ចេកទេសដល់ប្រជាសហគមន៍បន្ថែមពីលើអ្វីដែលពួកគេមានស្រាប់ ដើម្បីធានានិរន្តរភាពនៃការប្រមូលផលឃ្មុំ និងមានអនាម័យល្អ។
សម្រាប់អ្នកស្រី សែម ស្រីតូច ផ្ទាល់ ព្រមទាំងក្រុមអ្នកបច្ចេកទេសនៃសហគ្រាស មានការសប្បាយចិត្តចំពោះលទ្ធផលនៃការខិតខំប្រឹងប្រែងរបស់ពួកគេប៉ុន្មានឆ្នាំមកនេះនិងប្ដេជ្ញាបន្តដំណើរទៅមុខទៀតក្នុងការរក្សាព្រៃឈើ បង្កើតចំណូលជូនប្រជាសហគមន៍ធ្វើឱ្យទីផ្សារទឹកឃ្មុំមានស្ថិរភាព និងលទ្ធភាពដែលអាចនាំចេញទឹកឃ្មុំទៅក្រៅប្រទេសឱ្យកាន់តែទូលំទូលាយទៀតផង៕