.jpg)
ក្រុមយុវទូតនៃគម្រោងសហគ្រិននារីសកម្ម។ រូបថត សហការី
ភ្នំពេញ: ក្រុមយុវទូតនៃគម្រោងសហគ្រិននារីសកម្ម (WE Act Youth Ambassadors) ត្រៀមរៀបចំវេទិកាយុវជន «WE Light Up Talk» បំណងលើកកម្ពស់ការយល់ដឹង និងផ្តល់លទ្ធភាពដល់យុវជនជាពិសេសក្រុមយុវជនមានពិការភាព អ្នកមកពីសហគមន៍អ្នកស្រឡាញ់ភេទដូចគ្នា និងយុវជនជាជនជាតិដើមភាគតិច ក្នុងការបង្ហាញភាពជាអ្នកដឹកនាំ និងការចូលរួមក្នុងសង្គម។
ក្រោមប្រធានបទ «ភាពជាអ្នកដឹកនាំ និងការចូលរួមរបស់យុវជននៅក្នុងសង្គម» វេទិកា «WE Light Up Talk» នឹងប្រារឰឡើងនៅថ្ងៃទី ២៨ ខែមករា ឆ្នាំ ២០២៣ នៅ The Kampus Building ក្រោមអធិបតីភាពលោក សំហេង បុរស រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា។
«WE Light Up Talk» ជាវេទិកាចែករំលែកបទពិសោធន៍ចម្រុះ និងការផ្សារភ្ជាប់បណ្ដាញយុវជន ដែលបានរៀបចំឡើងក្នុងគោលបំណងផ្ដល់នូវកន្លែងសុវត្ថិភាពដល់យុវជន ជាពិសេស អ្នកមានពិការភាព អ្នកមកពីសហគមន៍ស្រឡាញ់ភេទដូចគ្នា និងជនជាតិដើមភាគតិចដើម្បីចែករំលែកអំពីដំណើរជីវិតរបស់ពួកគេឱ្យបានដឹង និងស្ដាប់ជាសាធារណៈ។
យុវតី ណាន់ ពេជ្រភារី ជាសមាជិក យុវទូតនៃគម្រោងសហគ្រិននារីសកម្ម បានប្រាប់ ភ្នំពេញ ប៉ុស្ដិ៍ថា៖ «យើងមានគោលបំណងលើកទឹកចិត្តយុវជនដែលជាអ្នកចូលរួមក្នុងកម្មវិធី តាមរយៈការចែករំលែកបទពិសោធន៍ពីសំណាក់វាគ្មិនកិត្តិយស និងសកម្មភាពនានាដែលអាចជំរុញឱ្យពួកគាត់ពង្រឹងបន្ថែមនូវភាពជាអ្នកដឹកនាំ និងពេញចិត្តនូវអ្វីដែលគាត់បានជ្រើសរើសសម្រាប់ការរស់នៅ»។
កញ្ញា ពេជ្រភារី ជានិស្សិតឆ្នាំទី៤ នៅវិទ្យាស្ថានភាសាបរទេស (IFL) នៃសាកលវិទ្យាល័យភូមិន្ទភ្នំពេញ (RUPP) មុខជំនាញទំនាក់ទំនងអន្តរជាតិ បានចូលរួមជាមួយនិស្សិតមកពីសាកលវិទ្យាល័យផ្សេងៗទៀតក្នុងនាមជាបុគ្គលិកហាត់ការក្រោមគម្រោងសហគ្រិននារីសកម្ម។
យុវតីចំនួន ៦ នាក់ បានចងក្រង និងបង្កើតជាក្រុមយុវទូតនៃគម្រោងសហគ្រិននារីសកម្ម ក្រោមការដឹកនាំរបស់យុវតី ធន់ រិទ្ធីសុចេន ជាប្រធានក្រុម។
កញ្ញា រិទ្ធី សុចេន ដែលបានបញ្ចប់ការសិក្សាថ្នាក់បរិញ្ញាបត្រ ពីសាកលវិទ្យាល័យកម្ពុជាបានប្រាប់ ភ្នំពេញ ប៉ុស្ដិ៍ថា៖ «យើងចូលរួមយ៉ាងសកម្មក្នុងការបង្កើតនិងអនុវត្តសកម្មភាពនានាដែលបានផ្សារភ្ជាប់ការចូលរួមដោយផ្ទាល់ជាមួយយុវជន និងសហគ្រិនស្ត្រីវ័យក្មេងដើម្បីពង្រីកសំឡេងរបស់ពួកគាត់ក្នុងការស្វែងរកបញ្ហាចម្បងរួមដែលពួកគាត់បានជួបប្រទះរួចលើកឡើងជាសំណើទៅកាន់ស្ថាប័នពាក់ព័ន្ធ ដើម្បីទទួលបាននូវដំណោះស្រាយរួម ១ សម្រាប់បញ្ហានោះ»។
កញ្ញាបន្ដថា៖ «តាមរយៈដំណើរនៃការធ្វើការងារស្ម័គ្រចិត្តជាមួយនឹងគម្រោងរបស់យើងក្រុមយុវទូតមិនត្រឹមតែទទួលបាននូវឱកាសក្នុងការកសាងសមត្ថភាពប៉ុណ្ណោះទេ ពួកគេថែមទាំងទទួលបាននូវការណែនាំក៏ដូចជាការបង្ហាត់បង្រៀនផ្សេងៗ ដើម្បីធានាថា ពួកគេមានសមត្ថភាពគ្រប់គ្រាន់ក្នុងការដឹកនាំនិងអនុវត្តគម្រោង ១ ដែលប្រកបដោយចីរភាពនិងវឌ្ឍនភាព»។
កញ្ញា ពេជ្រភារី បានឱ្យដឹងថា តាមរយៈការចូលរួមក្នុងកម្មវិធីនេះ យុវជននឹងទទួលបានឱកាសបង្កើតបណ្តាញជាមួយក្រុមយុវជនស្វែងយល់អំពីដំណើរជីវិតរបស់វាគ្មិនដែលមកពីសហគមន៍ចម្រុះ និងបង្កើនចំណេះដឹង លើប្រធានបទជុំវិញភាពជាអ្នកដឹកនាំ និងការចូលរួមរបស់យុវជននៅក្នុងសង្គម។
កញ្ញាបានប្រាប់ ភ្នំពេញ ប៉ុស្ដិ៍ថា៖ «នៅពេលដែលយើងមានភាពជាអ្នកដឹកនាំ គឺយើងអាចទទួលស្គាល់ការពិតជាខ្លួនឯង មានភាពក្លាហានក្នុងការសម្រេចចិត្ត និងអាចជួយលើកទឹកចិត្ត និងផ្សារភ្ជាប់យុវជនអ្នកដទៃឱ្យចូលរួមជាមួយគ្នាអភិវឌ្ឍសង្គមប្រកបទៅដោយភាពវិជ្ជមាន និងនិរន្តរភាព»។
វាគ្មិន ៤ នាក់ ជាជនមានពិការភាព ជនជាតិដើមភាគតិច និងអ្នកស្រឡាញ់ភេទដូចគ្នា ដែលនឹងឡើងចែករំលែកបទពិសោធន៍ជីវិតរបស់ពួកគេ មានដូចជា រចំ មុន្នី, តុល ឈួគឹមហេង, ស សាន និងអ៊ុល សាឡាវ។
រចំ មុន្នី ជាក្មេងស្រីជនជាតិដើមភាគតិចមកពីខេត្ដរតនគិរី ដែលបានពុះពារគ្រប់ឧបសគ្គដើម្បីសម្រេចបំណងសិក្សានៅសាកលវិទ្យាល័យ។ ឈួគឹមហេង ជាយុវជនម្នាក់ដែលបានឆ្លងកាត់រឿងរ៉ាវជាច្រើន ជាពិសេស ធ្លាប់រងនូវគំនាបសង្គមច្រើនរាប់មិនអស់តាំងពីការរើសអើងនៅក្នុងសាលា កន្លែងការងារដោយសារ ឈួគឹមហេង ជាបុគ្គលស្រឡាញ់ភេទដូចគ្នា។
ស សាន ជាស្ដ្រីមានពិការភាពតាំងពីកំណើត។ ដំណើរជីវិត និងការរស់នៅរបស់ សាន ពិតជាមានឧបសគ្គច្រើនខុសពីមនុស្សទូទៅ។ តែ សាន មិនដែលបោះបង់ចោលក្ដីស្រមៃ និងទទួលការរស់នៅប្រកបដោយភាពជឿជាក់នៅក្នុងសង្គម។
ចំណែក អ៊ុល សាឡាវ គឺជាយុវជនម្នាក់ដែលមកពីភូមិតូច១នៃតំបន់ជនបទដើម្បីបន្ដការសិក្សាក្នុងរាជធានីភ្នំពេញ បំណងប្រាថ្នាជីវិតមួយប្រកបដោយភាពល្អប្រសើរ។
កម្មវិធីនេះ «WE Light Up Talk» ក្រោមប្រធានបទ «ភាពជាអ្នកដឹកនាំ និងការចូលរួមរបស់យុវជននៅក្នុងសង្គម» ទទួលបានការគាំទ្រពី USAID ក្រោមគម្រោងសហគ្រិននារីសកម្ម WE Act នៃអង្គការផេកកម្ពុជា៕
