ពីឆ្វេងមកស្ដាំ៖ លោក សុខ ឫរិទ្ធី លោក គឹម ពីនន់ និងលោក ហុក សុទ្ធិ ធ្វើជាអធិបតីក្នុងសន្និសីទសារព័ត៌មានពិព័រណ៍សៀវភៅកម្ពុជាលើកទី ១១ នៅសណ្ឋាគារ Sun & Moon ថ្ងៃទី ១១ ខែធ្នូ។ រូបថត ហុង រស្មី
ភ្នំពេញ៖ ពិព័រណ៍សៀវភៅកម្ពុជាលើកទី ១១ ដែលគ្រោងនឹងប្រព្រឹត្តទៅរយៈពេល ៤ ថ្ងៃ ចាប់ពីថ្ងៃទី ១៩ ដល់ថ្ងៃទី ២២ ខែធ្នូ ឆ្នាំ ២០២៤ រំពឹងថានឹងទាក់ទាញអ្នកចូលចិត្តអានសៀវភៅច្រើន។
ក្រោមប្រធានបទ «អ្នកអានជាអ្នករៀនពេញមួយជីវិត» ពិព័រណ៍នេះមានគោលបំណងដើម្បីអបអរសាទរដល់វិស័យតែងនិពន្ធ ខណៈពេលដែលបង្ហាញពីតួនាទីសំខាន់នៃការអានដើម្បីបង្កើនចំនេះដឹងផ្ទាល់ខ្លួន និងវិជ្ជាជីវៈ។
ដោយមានអ្នកចូលរួមជាង ២០ម៉ឺននាក់នៅក្នុងព្រឹត្តិការណ៍កាលពីឆ្នាំមុន ពិព័រណ៍សៀវភៅកម្ពុជាគឺជាព្រឹត្តិការណ៍វប្បធម៌ដ៏សំខាន់មួយ ប៉ុន្តែអ្នករៀបចំកំពុងអំពាវនាវឱ្យមានការចូលរួមកាន់តែកាន់តែច្រើនពីសំណាក់ប្រជាជនវណ្ណៈកណ្ដាល ពោលគឺអ្នកទិញសៀវភៅពិត។
លោក ហុក សុទ្ធិ តំណាងគណៈកម្មការពិព័រណ៍សៀវភៅកម្ពុជា បានឱ្យដឹងថា ពិព័រណ៍សៀវភៅកម្ពុជាឆ្នាំ២០២៤ មានស្ដង់ចំនួន ២៩២ រួមទាំងស្ដង់សម្ភារសិក្សា និងស្ដង់អាហារមួយចំនួន។
លោកបាននិយាយថា៖ «ការចូលរួមពីព្រឹត្ដិការណ៍ឆ្នាំទៅ មានចំនួនជាង ២០ម៉ឺននាក់ ជាចំនួនដ៏ច្រើន ដោយសារពិព័រណ៍នៅកម្ពុជាមិនដែលមានអ្នកចូលរួមច្រើនយ៉ាងដូច្នេះទេ»។
យ៉ាងណាមិញ លោក សុទ្ធិ ទទួលស្គាល់ថា ថ្វីដ្បិតតែពិព័រណ៍សៀវភៅកម្ពុជាមានអ្នកចូលរួមច្រើន ជាពិសេសសិស្ស-និស្សិតយ៉ាងណាក៏ដោយ ក៏ព្រឹត្ដិការណ៍ប្រចាំឆ្នាំនេះនៅខ្វះអ្នកទិញសៀវភៅ។
អ្នកនិពន្ធគាំទ្រអ្នកបោះពុម្ព ដោយលោក ឡឹក ជំនោរ ទៅទិញសៀវភៅនៅស្ដង់របស់អ្នកស្រី សុជាតា កាលពិព័រណ៍សៀវភៅកម្ពុជាលើកទី ១០។ រូបថត ហុង រស្មី
ការចូលរួមពីយុវជន សិស្ស-និស្សិតដ៏ច្រើនមិនទាន់មានឯករាជ្យភាពហិរញ្ញវត្ថុក្នុងការចំណាយលើការទិញសៀវភៅដែលពួកគេចូលចិត្ដ។ ដូច្នេះ លោក សុទ្ធិ អំពាវនាវឱ្យមានការចូលរួមពីអតិថិជនវណ្ណៈកណ្ដាល ដែលមានលទ្ធភាពគ្រប់គ្រាន់ក្នុងការចំណាយប្រាក់ទិញសៀវភៅទាំងសម្រាប់ការអានផ្ទាល់ខ្លួន សម្រាប់កូនចៅ និងការបរិច្ចាគផ្សេងៗ។
លោកបានថ្លែងថា៖ «យើងនៅខ្វះវណ្ណៈកណ្ដាល ដូចជា មន្ដ្រីរាជការ អ្នកចម្ការ ពិសេសអ្នកអាយុចាប់ពី ៤០ឆ្នាំឡើង ដែលមានការងារមាំទាំ មិនទាន់បានចូលរួមកុះករនោះទេ»។
ពិព័រណ៍សៀវភៅកម្ពុជាលើកទី ១០ ឆ្នាំ២០២៣ ត្រូវបានប្រារឰឡើងជាលើកដំបូងនៅកោះពេជ្រ ក្រោយបណ្ណាល័យជាតិមិនអាចផ្ទុកអ្នកចូលរួមដ៏ច្រើនកុះករ។ រូបថត ហុង រស្មី
ពិធីបើកសម្ពោធពិព័រណ៍សៀវភៅកម្ពុជា នឹងមានវត្ដមានលោករដ្ឋមន្ដ្រីក្រសួងអប់រំ យុវជន និងកីឡា ហង់ ជួនណារ៉ុន លោកស្រី ភឿង សកុណា រដ្ឋមន្ដ្រីក្រសួងវប្បធម៌ និងវិចិត្រសិល្បៈ និងលោក ខៀវ កាញារីទ្ធ តំណាងរាស្ដ្រខេត្ដកំពង់ចាម។
លោក គឹម ពីនន់ អនុរដ្ឋលេខាធិការក្រសួងវប្បធម៌ និងវិចិត្រសិល្បៈ បានឱ្យដឹងថា ការរៀបចំពិព័រណ៍សៀវភៅកម្ពុជាមានគោលបំណងធំចំនួន ៥ គឺការផ្សព្វផ្សាយការបោះពុម្ពសៀវភៅគ្រប់ប្រភេទ ទាំងស្នាដៃចាស់ និងស្នាដៃថ្មីដើម្បីឱ្យមានទីផ្សារទាំងក្នុងស្រុក និងក្រៅប្រទេស។
លោកបានថ្លែងក្នុងសន្និសីទកាសែតនៅសណ្ឋាគារ Sun & Moon កាលថ្ងៃទី១១ ខែធ្នូនេះថា៖ «គោលបំណងទីពីរគឺជំរុញប្រជាជនខ្មែរឱ្យមានទម្លាប់អានសៀវភៅ និងជាសារមួយបញ្ជូនទៅកាន់យុវជនឱ្យស្គាល់ពីគុណតម្លៃនៃការអានដើម្បីអភិវឌ្ឍចំណេះដឹង និងបង្កើនគំនិតសម្រាប់ការសិក្សា និងការងារ»។
លោក ពីនន់ បានបន្ដថា គោលបំណងទីបី គឺបង្កើនកម្មវិធីនិទានរឿង និងគំនូររូបភាពផ្សេងៗដល់កុមារដើម្បីបណ្ដុះទឹកចិត្ដកុមារឱ្យស្រឡាញ់ និងចូលចិត្ដសៀវភៅតាំងពីនៅតូចៗ។
ពិព័រណ៍សៀវភៅកម្ពុជាលើកទី ១០ មានអ្នកចូលរួមជាង ២០ម៉ឺននាក់ ជាចំនួនដ៏ច្រើនបំផុត។ រូបថត ហុង រស្មី
លើសពីនេះ ការរៀបចំពិព័រណ៍សៀវភៅកម្ពុជាបានគាំទ្រដល់ឧស្សាហកម្មបោះពុម្ពផ្សាយនៅក្នុងប្រទេសកម្ពុជា និងពិភពលោក ហើយវាជាការលើកទឹកចិត្ដដល់កវីនិពន្ធខ្មែរបន្ដចងក្រងស្នាដៃបន្ថែមទៀត។
ពិព័រណ៍សៀវភៅកម្ពុជា នឹងមានសកម្មភាពចំនួន ៧ ការលក់សៀវភៅបញ្ចុះតម្លៃ វេទិកាបោះពុម្ពផ្សាយតាមប្រព័ន្ធអេឡិចត្រូនិក ការធ្វើបទបង្ហាញអំពីអក្សរសាស្ដ្រ អក្សរសិល្ប៍ និងវិទ្យាសាស្ដ្រ ការនិពន្ធសៀវភៅទៅជាខ្សែភាពយន្ដ និងការអភិវឌ្ឍជំនាញការអានថ្នាក់ដំបូង ការជួបពិភាក្សា និងចែករំលែកបទពិសោធពីអ្នកនិពន្ធល្បីៗ កម្មវិធីអានរឿង និងល្បែងកុមារ ក៏ដូចជាកម្មវិធីប្រគំតន្ដ្រី។
លោក ពីនន់ បានថ្លែងថា៖ «ពិព័រណ៍សៀវភៅកម្ពុជាកាន់តែទាញចិត្ដយុវជនច្រើនឡើងៗ និងបានក្លាយជាព្រឹត្ដិការណ៍វប្បធម៌មួយដ៏សំខាន់ក្នុងការផ្សព្វផ្សាយ និងការជំរុញលើកទឹកចិត្ដឱ្យប្រជាជនខ្មែរមានទម្លាប់ក្នុងការអានសៀវភៅ និងស្គាល់ពីគុណតម្លៃនៃការអាន ដើម្បីអភិវឌ្ឍចំណេះដឹង និងការងារ»៕
