ភ្នំពេញៈ រដ្ឋមន្ត្រីការបរទេសលោក ប្រាក់ សុខុន បានដឹកនាំគណៈប្រតិភូជាន់ខ្ពស់ រាជរដ្ឋាភិបាលទៅចូលរួមកិច្ចប្រជុំរដ្ឋមន្ត្រីការបរទេសពិសេសអាស៊ាន-ចិន និងកិច្ចប្រជុំរដ្ឋមន្ត្រីការបរទេសមេគង្គ - ឡានឆាង លើកទី ៦ នៅថ្ងៃទី ៧ និងទី ៨ ខែមិថុនា នៅទីក្រុងឆុងឈីង ប្រទេសចិន តាមជើងហោះហើរពិសេសរបស់ក្រុមហ៊ុនអាកាសចរណ៍ខេមបូឌាអ៊ែរវ៉េ កាលពីថ្ងៃទី ៦ ខែមិថុនា។
ក្រុមហ៊ុនអាកាសចរណ៍ខេមបូឌាអ៊ែរវ៉េ បានបញ្ជាក់ក្នុងសេចក្តីប្រកាសព័ត៌មាន នៅថ្ងៃទី ៦ ខែមិថុនាថា៖ «នេះជាលើកទី១ ហើយដែលក្រុមហ៊ុនអាកាសចរណ៍ខេមបូឌាអ៊ែរវ៉េ ដឹកប្រតិភូរដ្ឋាភិបាលជាន់ខ្ពស់ទៅកាន់ប្រទេសចិន ក៏ដូចជាលើកទី២ ផងដែរ ដែលក្រុមហ៊ុនអាកាសចរណ៍បានផ្តល់ជើងហោះហើរពិសេស សម្រាប់ឯកឧត្ដមប្រាក់ សុខុននិងគណៈប្រតិភូរបស់លោកបន្ទាប់ពីបានធ្វើដំណើរទៅទីក្រុងហ្សាការតា ប្រទេសឥណ្ឌូនេស៊ី សម្រាប់កិច្ចប្រជុំមេដឹកនាំអាស៊ាន កាលពីខែមេសា ឆ្នាំនេះ»។
សេចក្តីប្រកាសព័ត៌មានបន្តថា ដោយត្រូវបានរដ្ឋាភិបាលប្រគល់តួនាទីសំខាន់បែបនេះជាលើកទី ២ ក្រុមហ៊ុនអាកាសចរណ៍ខេមបូឌាអ៊ែរវ៉េ បានចាប់ផ្តើមការត្រៀមរៀបចំភ្លាមៗ និងបានរៀបចំការប្រជុំពិសេសជាច្រើនដើម្បីពិភាក្សាអំពីកាលវិភាគនៃការហោះហើរ ក៏ដូចជានីតិវិធីយ៉ាងលម្អិតដើម្បីធានាបាននូវប្រតិបត្តិការហោះហើរ «ដោយរលូន»។ «ជើងហោះហើរពិសេសបានហោះចេញពីអាកាសយានដ្ឋានអន្តរជាតិភ្នំពេញនៅថ្ងៃទី ៦ ខែមិថុនា ល្ងាច ហើយបានចុះចតយ៉ាងរលូននៅអាកាសយានដ្ឋានអន្តរជាតិឆុងឈីង ជាំងប៊ី តាមពេលវេលាកំណត់ម៉ោង ១៨: ១០ យប់»។
បច្ចុប្បន្នក្រុមហ៊ុនអាកាសចរណ៍ខេមបូឌាអ៊ែរវ៉េ កំពុងដំណើរការជើងហោះហើរសម្រាប់អ្នកដំណើរជាប្រចាំរវាងភ្នំពេញ និងឆេងទូប្រទេសចិន និងជើងហោះហើរ ដឹកទំនិញជាទៀងទាត់ រវាងភ្នំពេញ និងហ្សិនជិនប្រទេសចិន។
បើតាមសេចក្តីប្រកាសព័ត៌មានដដែល ក្រុមហ៊ុននេះនឹងបើកដំណើរការផ្លូវថ្មីៗបន្ថែមទៀត រវាងកម្ពុជា និងចិន ក៏ដូចជាផ្លូវរវាងប្រទេសចិន និងអាស៊ាន ដើម្បីភ្ជាប់ទីក្រុងទាំងនេះ ហើយក្នុងពេលតែមួយ ដើម្បីចូលរួមចំណែកក្នុងការស្តារសេដ្ឋកិច្ចនៅក្នុងតំបន់។
លោកស្រី សុខ រ៉ាវី ប្រធានផ្នែកទីផ្សារ និងម៉ាកយីហោរបស់ក្រុមហ៊ុន Cambodia Airways ប្រាប់ភ្នំពេញប៉ុស្តិ៍នៅថ្ងៃទី ៦ ខែមិថុនាថា៖ «នេះគឺជាការជឿជាក់មួយ សម្រាប់ខាងក្រុមហ៊ុនយើងលើការផ្តល់សេវាកម្ម ព្រោះអីឃើញថា ពីរបីជើងហើយ ដែលឯកឧត្តម ប្រាក់ សុខុន គាត់បានអញ្ជើញទៅស្រុកក្រៅដោយប្រើប្រាស់សេវាកម្មរបស់ខាងយើង»។
យោងតាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃទី ៤ ខែមិថុនា បានឱ្យដឹងថា លោក ប្រាក់ សុខុន នឹងមានជំនួបទ្វេភាគីជាមួយទីប្រឹក្សារដ្ឋចិន លោក វ៉ាង យី ហើយនៅចុងបញ្ចប់នៃជំនួបនេះលោករដ្ឋមន្ត្រីការបរទេសទាំង ២ នឹងធ្វើជាអធិបតីក្នុងពិធីចុះហត្ថលេខា លើឯកសារចំនួន ២ គឺអនុស្សរណៈយោគយល់គ្នា ស្តីពីកិច្ចសហប្រតិបត្តិការលើវិស័យទូរគមនាគមន៍ព័ត៌មាន និងបច្ចេកវិទ្យាទំនាក់ទំនងរវាងក្រសួងប្រៃសណីយ៍ និងទូរគមនាគមន៍កម្ពុជា និងក្រសួងឧស្សាហកម្ម និងព័ត៌មានវិទ្យាចិន និងគម្រោងកម្មវិធីស្តីពីកិច្ចសហប្រតិបត្តិការ លើវិស័យវប្បធម៌រវាងក្រសួងវប្បធម៌ និងវិចិត្រសិល្បៈកម្ពុជា និងក្រសួងវប្បធម៌ចិន៕