.jpg)
សំណល់វេជ្ជសាស្ត្រ (សម្បកដបវ៉ាក់សាំងការពារកូវីដ ១៩) ក្រោយចាក់រួច នៅដើមឆ្នាំនេះ។ ហេង ជីវ័ន
ភ្នំពេញៈ កម្មវិធីអភិវឌ្ឍន៍សហប្រជាជាតិ (UNDP) សហការជាមួយក្រសួងសុខាភិបាលចាប់ផ្ដើមអនុវត្តគម្រោងថ្មីមួយ ដើម្បីជួយដល់រដ្ឋាភិបាលក្នុងការគ្រប់គ្រងសំណល់វេជ្ជសាស្ត្រឱ្យមានប្រសិទ្ធភាពក្នុងអំឡុងពេលការរាតត្បាតជំងឺកូវីដ ១៩។
គម្រោងនេះមានការគាំទ្រហិរញ្ញវត្ថុ និងបច្ចេកទេសពីប្រទេសចិនតាមរយៈមូលនិធិជំនួយសហប្រតិបត្តិការសម្រាប់ប្រទេសកំពុងអភិវឌ្ឍន៍។
UNDP បញ្ជាក់ក្នុងសេចក្តីប្រកាសព័ត៌មានកាលពីម្សិលមិញថា ខណៈពេលដែលកម្ពុជាកំពុងប្រឈមនឹងការឆ្លងរីករាលដាលក្នុងសហគមន៍នៃជំងឺកូវីដ ១៩ ក្នុងទ្រង់ទ្រាយធំមិនធ្លាប់មាន ការធ្វើប្រព្រឹត្តិកម្មឱ្យបានត្រឹមត្រូវ និងប្រកបដោយសុវត្ថិភាពនូវសំណល់វេជ្ជសាស្ត្រដែលអាចបង្កការឆ្លងរោគគឺជាបញ្ហាប្រឈម។
បច្ចុប្បន្ននេះកម្ពុជាមានឧបករណ៍ការពារខ្លួន និងបរិក្ខារផ្សេងៗក្នុងការគ្រប់គ្រងសំណល់រឹង និងរាវក៏ដូចជាជំនាញ និងបទពិសោធដែលចាំបាច់សម្រាប់គ្រប់គ្រងសំណល់ដែលអាចបង្កការឆ្លងរោគនៅមានកម្រិតនៅឡើយ។
UNDP បញ្ជាក់ថា៖ «ជាការឆ្លើយតបចំពោះតម្រូវការទាំងនេះមូលនិធិជំនួយសហប្រតិបត្តិការសម្រាប់ប្រទេសកំពុងអភិវឌ្ឍន៍បានផ្តល់ថវិកាគាំទ្រដល់គម្រោងដែលមានឈ្មោះថា ការរៀនសូត្រពីបទពិសោធរបស់ប្រទេសចិន ដើម្បីបង្កើនសមត្ថភាពឆ្លើយតបនឹងជំងឺកូវីដ ១៩ នៅក្នុងតំបន់អាស៊ី និងប៉ាស៊ីហ្វិកផ្ដោតលើការគ្រប់គ្រងសំណល់វេជ្ជសាស្ត្រ និងផ្តល់ការគាំទ្រដល់មូលដ្ឋានសុខាភិបាលចំនួន ៣ ដែលត្រូវបានជ្រើសរើសពីដំបូងសម្រាប់ផ្ដល់សេវាព្យាបាលជំងឺកូវីដ ១៩ នៅទីក្រុងភ្នំពេញក្នុងគោលបំណងផ្ដល់ឱ្យមូលដ្ឋានសុខាភិបាលទាំងនេះនូវបរិក្ខារវេជ្ជសាស្ត្រ ក៏ដូចជាកសាងសមត្ថភាពបុគ្គលិកសុខាភិបាល និងអ្នកផ្ដល់សេវាអំពីការធ្វើប្រព្រឹត្តិកម្មសំណល់រឹង និងរាវ»។
គម្រោងនេះ UNDP នឹងធ្វើការជាមួយមន្ទីរពេទ្យមិត្តភាពខ្មែរ-សូវៀត មណ្ឌលសុខភាពចាក់អង្រែ និងមន្ទីរពេទ្យកុមារជាតិ ដោយសហការជាមួយក្រសួងសុខាភិបាល អង្គការសុខភាពពិភពលោក និងអ្នកជំនាញខាងគ្រប់គ្រងសំណល់វេជ្ជសាស្ត្រពីប្រទេសចិន។
UNDP បញ្ជាក់ថា៖ «គម្រោងនេះនឹងបន្តជំរុញឱ្យមានការសហការពីសហគមន៍ប្រជាពលរដ្ឋដែលរស់នៅក្នុងទីក្រុងដើម្បីធានាឱ្យមានការគ្រប់គ្រងសំណល់ដែលអាចបង្កការឆ្លងរោគឱ្យបានត្រឹមត្រូវ សំដៅបង្ការ និងកាត់បន្ថយគ្រោះថ្នាក់មកលើសុខភាពសាធារណៈ និងបរិស្ថានឱ្យនៅតិចបំផុត»។
លោក Nick Beresford នាយក UNDP ប្រចាំកម្ពុជាបានលើកឡើងក្នុងសេចក្តីប្រកាសព័ត៌មាននេះថាគម្រោងនេះ ចាប់ផ្តើមអនុវត្តស្របពេលដ៏សំខាន់ចំពោះប្រទេសកម្ពុជា។
លោកបានបញ្ជាក់ថា៖ «ការធានាឱ្យតំបន់ប្រជុំជនរបស់ប្រទេសនេះអាចធ្វើប្រព្រឹត្តិកម្មសំណល់វេជ្ជសាស្ត្រប្រកបដោយសុវត្ថិភាព និងប្រសិទ្ធភាពក្នុងអំឡុងពេលដែលមានការរាតត្បាតជាសកល គឺជាផ្នែកមួយដ៏សំខាន់នៃការបន្តកិច្ចខិតខំប្រឹងប្រែង ដើម្បីទប់ស្កាត់ការឆ្លងរាលដាលក៏ដូចជាផលប៉ះពាល់ដែលបង្កដោយវីរុសនេះទៅលើប្រទេសទាំងមូល និងប្រជាពលរដ្ឋនៅក្នុងប្រទេសនេះ»។
លោកស្រី ឱ វណ្ណឌីន និងលោកស្រី យក់ សម្បត្តិ អ្នកនាំពាក្យក្រសួងសុខាភិបាល មិនអាចទាក់ទង សុំការបញ្ជាក់បានទេកាលពីម្សិលមិញ។
ក៏ប៉ុន្តែលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានលើកឡើងក្នុងសេចក្តីប្រកាសព័ត៌មាននេះថា ពិធីប្រកាសដាក់ឱ្យអនុវត្តគម្រោង និងការប្រគល់នូវឧបករណ៍បរិក្ខារវេជ្ជសាស្ត្រនាពេលនេះជាការរួមចំណែកយ៉ាងសំខាន់ក្នុងការទប់ស្កាត់ការរីករាលដាលនៃជំងឺកូវីដ ១៩ បានឆាប់រហ័ស។
លោកថា៖ «ថ្ងៃនេះជាមោទនភាពថ្មីមួយទៀតតាមរយៈកម្មវិធីអភិវឌ្ឍន៍អង្គការសហប្រជាជាតិប្រចាំប្រទេសកម្ពុជា រដ្ឋាភិបាលនៃសាធារណរដ្ឋប្រជាមានិតចិនបានផ្តល់នូវឧបករណ៍បរិក្ខារវេជ្ជសាស្ត្រសម្រាប់ការគ្រប់គ្រងសំណល់វេជ្ជសាស្ត្រចំនួន ១២ មុខ ដើម្បីពង្រឹងសមត្ថភាពការគ្រប់គ្រងសំណល់វេជ្ជសាស្ត្រ។
លោក ញឹប អង្គាបុស្ស ប្រធានមន្ទីរពេទ្យកុមារជាតិបានប្រាប់ភ្នំពេញប៉ុស្តិ៍កាលពីម្សិលមិញថា តាមរយៈគម្រោងនេះ UNDP ផ្តល់សម្ភារមួយចំនួនសម្រាប់ប្រើប្រាស់ក្នុងការគ្រប់គ្រងសំណល់វេជ្ជសាស្ត្រនេះ ក៏ប៉ុន្តែលោកមិនទាន់បានដឹងពីចំនួនជាក់លាក់នៃសម្ភារនេះនៅឡើយទេ។
លោកថ្លែងថា៖ «ហើយវាទាក់ទងទៅនឹងឡចំហុយសម្លាប់មេរោគហ្នឹងមួយដែរ»។
លោក ងី មានហេង ប្រធានមន្ទីរសុខាភិបាលរាជធានីភ្នំពេញ និងលោក ងី ម៉េង ប្រធានមន្ទីរពេទ្យមិត្តភាពខ្មែរ-សូវៀត មិនអាចទាក់ទងដើម្បីសុំការបញ្ជាក់បន្ថែមបានទេ កាលពីថ្ងៃម្សិលមិញ៕
