ឧត្តរមានជ័យ៖ អភិបាលខេត្តឧត្តរមានជ័យ លោក ប៉ែន កុសល្យ បានសម្រេចអនុញ្ញាតឱ្យអាជីវកម្មចំនួន ២ គឺផ្ទះសំណាក់ ទី លីហ្វុង និងកន្លែងលក់ស៊ុប ឈ្មោះ ភេម រ៉ា ដែលទីតាំងទាំង ២ នេះ ស្ថិតនៅក្នុងភូមិឈូក សង្កាត់/ក្រុងសំរោង បើកដំណើរការឡើងវិញ ក្រោយពីបានផ្អាកកាលពីចុងខែមុន។
យោងតាមសេចក្តីសម្រចចំនួន ២ ដាច់ដោយឡែកពីគ្នាដែលចុះហត្ថលេខាដោយ លោក ប៉ែន កុសល្យ កាលពីម្សិលមិញ បានឱ្យដឹងថា ការអនុញ្ញាតឱ្យបើកដំណើរការឡើងវិញនូវអាជីវកម្មទាំង ២ នេះ គឺយោងលើការចាំបាច់របស់រដ្ឋបាលខេត្តឧត្តរមានជ័យដោយចាប់ផ្ដើមពីថ្ងៃទី ១១ ខែមិថុនា តទៅ។
កាលពីថ្ងៃទី ២៩ ខែ ឧសភា ឆ្នាំ ២០២១ កន្លងទៅ អាជ្ញាធរខេត្តនេះបានចាត់វិធានការរដ្ឋបាលដោយសម្រេចផ្អាកអាជីវកម្មទាំង ២ ខាងលើដើម្បីចូលរួមអនុវត្តវិធានការរបស់ក្រសួងសុខាភិបាលក្នុងការទប់ស្កាត់ការរីករាលដាលជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
ជាមួយគ្នានេះ អាជ្ញាធរខេត្តក៏បានតម្រូវឱ្យមានការចូលរួមអនុវត្តសេចក្ដីសម្រេចនេះពីសំណាក់រដ្ឋបាលខេត្ត-ស្រុក មន្ទីរ-អង្គភាព ជំនាញពាក់ព័ន្ធ និងម្ចាស់ទីតាំងទាំង ២ ផងដែរ ដើម្បីឱ្យមានប្រសិទ្ធភាព៕