.jpg)
ផ្ទះបណ្ដែតទឹកត្រូវបានឃើញនៅស្រុកកៀនស្វាយថ្ងៃទី ១៤ មិថុនា។ ហ៊ាន រង្សី
កណ្តាលៈ នៅពេលនេះកម្លាំងបញ្ជាការកងឯកភាពខេត្តកណ្ដាលកំពុងបន្តឃ្លាំមើល និងហាមឃាត់ ជាដាច់ខាតការចូលឈប់សំចតរបស់ក្រុមនិគមជនជាតិវៀតណាមរស់នៅលើទូក ផ្ទះបណ្ដែតទឹក និងបែចិញ្ចឹមត្រី ដែលកំពុងចល័តចេញពីផ្ទៃទន្លេនៃភូមិសាស្ត្ររាជធានីភ្នំពេញ ក្រោយពីអាជ្ញាធររាជធានីបានចាត់វិធានការក្ដៅតាមច្បាប់រដ្ឋបាល ដើម្បីលុបបំបាត់ និងរំដោះទន្លេពីសំណង់មិនរៀបរយទាំងនោះ។
លោក គង់ សោភ័ណ្ឌ អភិបាលខេត្តកណ្ដាលបានណែនាំដល់គ្រប់ គណៈបញ្ជាការឯកភាពក្រុង-ស្រុកទាំងអស់ក្រោមរដ្ឋបាលខេត្តកណ្ដាល ដែលមានទីតាំងស្ថិតនៅតាមដងទន្លេ ត្រូវឃ្លាំមើលជាប្រចាំ និងហាមឃាត់ជាដាច់ខាតការចូលឈប់សំចតរបស់អ្នករស់នៅសំណង់មិនរៀបរយលើទូក ផ្ទះបណ្ដែតទឹក និង បែចិញ្ចឹមត្រី ដែលកំពុងចល័តចេញមកពីរាជធានីភ្នំពេញ។
លោកបញ្ជាក់ថា៖ «នៅពេលនេះ រដ្ឋបាលខេត្តកណ្ដាលយើងនៅមិនទាន់មានផែនការរុះរើ ឬចល័តសំណង់មិនរៀបរយលើទូក ផ្ទះបណ្ដែតទឹក និងបែចិញ្ចឹមត្រីពីផ្ទៃទន្លេទេ។ ប៉ុន្តែយើងក៏មិនអនុញ្ញាតឱ្យអ្នកដែលកំពុងចល័តចេញពីផ្ទៃទន្លេក្នុងភូមិសាស្ត្ររាជធានីភ្នំពេញមកចូលសំចតនៅលើផ្ទៃទន្លេនៃភូមិសាស្ត្រខេត្តកណ្ដាលរបស់យើងខ្ញុំនោះដែរ»។
ក្នុងរយៈពេល ២ ថ្ងៃកន្លងមកនេះ ជាពិសេសនៅថ្ងៃទី ១៣ ខែមិថុនា សំណង់មិនរៀបរយលើទូក ផ្ទះបណ្ដែតទឹក និងបែចិញ្ចឹមត្រីរបស់និគមជនជាតិវៀតណាមសរុបជាង ១០០ បានចល័តចេញពីភូមិសាស្ត្រ ខណ្ឌច្បារអំពៅ ខណ្ឌជ្រោយចង្វារ ខណ្ឌដូនពេញ នៃរាជធានីភ្នំពេញឆ្ពោះទៅកាន់តំបន់ក្អមសំណ ដោយឆ្លងកាត់ស្រុកកៀនស្វាយ និងស្រុកល្វាឯមនៃខេត្តកណ្ដាល។ នេះបើតាមការអះអាងរបស់លោក ហេង សុផល អធិការស្រុកល្វាឯមកាលពីថ្ងៃទី ១៤ ខែមិថុនា។
លោកថ្លែងថា៖ «ពួកគេ [ម្ចាស់ផ្ទះបណ្ដែតទឹក និងបែចិញ្ចឹមត្រី] មួយចំនួនបានព្យាយាមចូលឈប់សំចតនៅចំណុចពយកោះទឹកឃ្លាំងនៃភូមិសាស្ត្រស្រុកកៀនស្វាយ និងស្រុកល្វាឯម។ ប៉ុន្តែកម្លាំងសមត្ថកិច្ចចម្រុះរបស់យើងមិនអនុញ្ញាតឡើយ ហើយបានជំរុញឱ្យពួកគេបន្តដំណើរតាមខ្សែទឹកទៅកាន់តំបន់ក្អមសំណ»។
អភិបាលស្រុកកៀនស្វាយលោក អ៊ូ ឈាង ប្រាប់ភ្នំពេញប៉ុស្តិ៍ថា នៅពេលនេះ លោកកំពុងដឹកនាំកម្លាំងបញ្ជាការឯកភាពស្រុកចុះត្រួតពិនិត្យតាមដងទន្លេ ដើម្បីការពារការលួចឆ្មក់ចូលសំចតដោយខុសច្បាប់នូវសំណង់មិនរៀបរយលើទូក ផ្ទះបណ្ដែតទឹក និងបែចិញ្ចឹមត្រីរបស់និគមជនជាតិវៀតណាម ដែលកំពុងចល័តចេញពីផ្ទៃទន្លេនៃភូមិសាស្ត្ររាជធានីភ្នំពេញ។
លោកថ្លែងថា៖ «យើងអនុញ្ញាតឱ្យឆ្លងកាត់ ប៉ុន្តែមិនអនុញ្ញាតឱ្យចូលឈប់សំចតនោះទេ។ កម្លាំងយើងកំពុងបន្តតាមឃ្លាំមើល និងកៀងពួកគេមិនឱ្យចូលអែបច្រាំងទន្លេឡើយ ហើយនៅពេលនេះ ពួកគេភាគច្រើនបានចាកផុតពីតំបន់គ្រប់គ្រងរបស់យើងខ្ញុំហើយ»។
ជាមួយគ្នានេះ លោកឱ្យដឹងដែរថា ក្នុងភូមិសាស្ត្រស្រុកកៀនស្វាយក៏មានសំណង់មិនរៀបរយលើទូក ផ្ទះបណ្ដែតទឹក និងបែចិញ្ចឹមត្រីរបស់វៀតណាមជាច្រើនផងដែរ។ ប៉ុន្តែលោកនៅមិនទាន់ទទួលបានគោលការណ៍ពីរដ្ឋបាលខេត្តឱ្យរុះរើ ឬតម្រូវឱ្យចល័តចេញនោះទេ។
គិតត្រឹមថ្ងៃទី ១៤ មិថុនា ឆ្នាំ ២០២១ សំណង់មិនរៀបរយលើទូក ផ្ទះបណ្ដែតទឹក និងបែចិញ្ចឹមត្រីប្រមាណជាង ៨០ ភាគរយបានរុះរើដោយស្ម័គ្រចិត្ត និងចល័តចេញពីផ្ទៃទន្លេនៃភូមិសាស្ត្ររាជធានីភ្នំពេញ។
នៅសល់ប្រមាណជាង ១០ ភាគរយទៀត ត្រូវបានរដ្ឋបាលរាជធានីភ្នំពេញ ចុះណែនាំឱ្យធ្វើកិច្ចសន្យា ដោយទុករយៈពេលចន្លោះពី ៣ ទៅ ៥ ថ្ងៃបន្ថែមទៀត អាស្រ័យលើទំហំ និងប្រភេទនៃសំណង់ផ្ទះបណ្ដែតទឹក និងបែចិញ្ចឹមត្រីដែលនៅសេសសល់ទាំងនោះ។ នេះបើតាមមន្ត្រីមូលដ្ឋានដែលបានចូលរួមក្នុងប្រតិបត្តិការរំដោះទន្លេរបស់រដ្ឋបាលរាជធានីភ្នំពេញ។
កាលពីថ្ងៃទី ២ មិថុនា ឆ្នាំ ២០២១ រដ្ឋបាលរាជធានីភ្នំពេញបានចេញសេចក្តីជូនដំណឹងមួយតម្រូវឱ្យមានការរុះរើ ឬចល័តចេញជាបន្ទាន់ នូវបែចិញ្ចឹមត្រី ផ្ទះបណ្ដែតទឹក ផ្ទះទូកតូចៗ និងសំណង់មិនរៀបរយលើផ្ទៃទន្លេ នៅភូមិសាស្ត្ររាជធានីភ្នំពេញ។
អាជ្ញាធរអះអាងថា បែចិញ្ចឹមត្រី ផ្ទះបណ្ដែតទឹក ផ្ទះទូកតូចៗ និងសំណង់អនាធិបតេយ្យទាំងនោះបង្កឱ្យប៉ះពាល់ដល់សណ្តាប់ធ្នាប់ ផ្លូវនាវាចរណ៍ ប្រព័ន្ធអេកូឡូស៊ី ចរន្តទឹកហូរ គោករាក់។ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ ធ្វើឱ្យខូចខាតយ៉ាងធ្ងន់ធ្ងរដល់ជីវចម្រុះក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភណភាពរាជធានីភ្នំពេញ ព្រមទាំងប៉ះពាល់ដល់សុខភាពពលរដ្ឋដែលប្រើប្រាស់ទឹកនោះផងដែរ។
សេចក្តីជូនដំណឹងរបស់រដ្ឋបាល រាជធានីភ្នំពេញទុករយៈពេល ១ សប្ដាហ៍ ដើម្បីឱ្យអ្នករស់នៅរុះរើដោយស្ម័គ្រចិត្ត។ ប៉ុន្តែបានព្រមានចាត់វិធានការរដ្ឋបាលដោយពុំទទួលខុសត្រូវរាល់ការខូចខាត ឬការបាត់បង់ណាមួយឡើយ ក្នុងករណីមិនអនុវត្តតាមសេចក្ដីជូនដំណឹងនេះ។ សេចក្តីជូនដំណឹងបញ្ជាក់ថា «ក្នុងករណីរឹងរូស អាជ្ញាធរមូលដ្ឋាន និងមន្ត្រីជំនាញនឹងកសាងសំណុំរឿងបញ្ជូន ទៅតុលាការតាមផ្លូវច្បាប់»។
ចំណាត់ការរបស់រដ្ឋបាលរាជធានីភ្នំពេញបានទទួលការគាំទ្រយ៉ាងទូលំទូលាយពីប្រជាពលរដ្ឋខ្មែរ និងគ្រប់និន្នាការនយោបាយ។ ទន្ទឹមនឹងនោះ ប្រជាពលរដ្ឋខ្មែរជំរុញឱ្យអាជ្ញាធររាជធានីភ្នំពេញអនុវត្តឱ្យបានម៉ឺងម៉ាត់ និងមានប្រសិទ្ធភាពបំផុត ដោយមិនគួរអនុញ្ញាតឱ្យមានការតាំងទីលំនៅដោយខុសច្បាប់យ៉ាងអនាធិបតេយ្យតាមដងទន្លេក្នុងភូមិសាស្ត្ររាជធានីភ្នំពេញ ដែលជាបេះដូងនៃប្រទេសកម្ពុជាតទៅទៀតទេ៕
វីដេអូ៖
