.jpg)
លោក ហ៊ុន សែន ជួបអគ្គរដ្ឋទូតឆែក លោក Martin Vavra ពីម្សិលមិញ នាវិមានសន្តិភាព។ រូប SPM
ភ្នំពេញៈ លោកនាយករដ្ឋមន្ត្រី ហ៊ុន សែន ស្នើឯកអគ្គរដ្ឋទូតសាធារណរដ្ឋឆែកថ្មីប្រចាំកម្ពុជាជំរុញបន្ថែមលើកិច្ចសហប្រតិបត្តិការវិស័យសេដ្ឋកិច្ច ពាណិជ្ជកម្ម វិនិយោគ និងការអភិវឌ្ឍធនធានមនុស្សរវាងប្រទេសទាំង ២។
ការស្នើរបស់លោក ហ៊ុន សែន ធ្វើឡើងក្នុងជំនួបរវាងលោក និងលោក Martin Vavra ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឆែកថ្មីប្រចាំកម្ពុជានៅវិមានសន្តិភាព នាថ្ងៃទី ១៤ ខែមិថុនា។
ហ្វេសប៊ុកលោក ហ៊ុន សែន បញ្ជាក់ពីម្សិលមិញថា លោកបានស្នើឱ្យលោក Martin Vavra យកចិត្តទុកដាក់ទៅលើការជំរុញសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ និងការអភិវឌ្ឍធនធានមនុស្ស។
បើតាមហ្វេសប៊ុកដដែលក្នុងជំនួបនោះលោក Martin Vavra បានប្រាប់លោក ហ៊ុន សែន ថាបេសកកម្មរបស់លោកមកកម្ពុជានាពេលនេះ គឺដើម្បីពង្រឹង និងពង្រីក ទំនាក់ទំនងប្រទេសទាំង ២ ឱ្យកាន់តែធំធាត់ឡើងបន្ថែមទៀត។
ប្រភពបញ្ជាក់ថា៖ «ឯកឧត្តម [Martin Vavra] បានបន្ថែមទៀតថា សាធារណរដ្ឋឆែកមានមនោសញ្ចេតនាចំពោះកម្ពុជា។ ឈរលើមូលដ្ឋាននេះ ឯកឧត្តមបានសន្យាចំពោះសម្តេចតេជោនាយករដ្ឋមន្ត្រី [ហ៊ុន សែន] ថានឹងប្រឹងប្រែង ដើម្បីជំរុញកិច្ចសហប្រតិបត្តិការលើវិស័យនយោបាយ សេដ្ឋកិច្ច វិស័យពាណិជ្ជកម្ម និងវិស័យវិនិយោគ។ ជាមួយគ្នានោះ ឯកឧត្តមក៏បានគោរពជម្រាបជូនសម្ដេចតេជោថា សាធារណរដ្ឋឆែកនឹងជួយដល់កម្ពុជា ជាពិសេសលើការអភិវឌ្ឍធនធានមនុស្ស»។
ហ្វេសប៊ុកដដែលបន្តថា លោក ហ៊ុន សែន បានថ្លែងអំណរគុណដល់ប្រជាជន និងរដ្ឋាភិបាលនៃសាធារណរដ្ឋឆែកដែលបានជួយកម្ពុជាពីអតីតកាលលើវិស័យនយោបាយ សេដ្ឋកិច្ច និងសង្គមកិច្ច។ លើសពីនេះក៏បានលុបបំណុលមួយចំនួនធំ ហើយបំណុលនៅសល់បានយកមកជួយកម្ពុជាវិញ តាមរយៈការសាងសង់សាលារៀន និងវិស័យសង្គមកិច្ចជាដើម។
លោក ហ៊ុន សែន ស្វាគមន៍ និងអបអរសាទរចំពោះលោក Martin Vavra ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និង ពេញសមត្ថភាពប្រចាំនៅកម្ពុជា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ភ្នំពេញប៉ុស្តិ៍ពីម្សិលមិញថា ជាធម្មតាជំនួបរវាងថ្នាក់ដឹកនាំប្រទេសកម្ពុជាជាមួយមន្ត្រីទូតបរទេសតែងតែមានការជំរុញឱ្យមានកិច្ចសហប្រតិបត្តិការលើវិស័យនានា ដូចជាការផ្លាស់ប្តូរពាណិជ្ជកម្ម សេដ្ឋកិច្ច ឬទេសចរណ៍ជាដើម។ កន្លងមកទំហំពាណិជ្ជកម្មរវាងកម្ពុជា និងឆែកនៅមានកម្រិតតិចតួចនៅឡើយ។
លោកថ្លែងថា៖ «គប្បីយើងឱ្យមានការជំរុញបន្ថែមទៅលើវិស័យទាំងអស់ហ្នឹងដើម្បីឱ្យទំនាក់ទំនងវាកាន់តែមានភាពស៊ីជម្រៅ និងមានសារៈសំខាន់ថែមទៀត»។
រដ្ឋាភិបាលឆែកបានរក្សាទុកប្រទេសកម្ពុជាក្នុងចំណោមប្រទេសអាទិភាពចំនួន ៦ សម្រាប់ជាដៃគូអភិវឌ្ឍន៍៕
