.jpg)
មន្ត្រីនគរបាលទទួលការចាក់វ៉ាក់សាំងប្រឆាំងកូវីដ ១៩ កាលពីថ្ងៃទី ១ មេសា នៅខេត្តព្រះសីហនុ។ រូបថត រដ្ឋបាលខេត្តព្រះសីហនុ
ភ្នំពេញៈ ប្រជាពលរដ្ឋ កម្មករ-កម្មការិនីប្រមាណជាង ១,២ លាននាក់ ក្នុងខេត្តចំនួន ៥ នឹងត្រូវទទួលបានការចាក់វ៉ាក់សាំងការពារជំងឺកូវីដ ១៩ បន្ទាប់ពីរាជធានីភ្នំពេញ និងខេត្តកណ្តាល ដែលនឹងត្រូវចាប់ផ្តើមចាក់ជូនពួកគេ នាពេលខាងមុខនេះ។ នេះបើតាម លោក ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានប្រតិបត្តិយុទ្ធនាការចាក់វ៉ាក់សាំង។
ការអះអាងបែបនេះ នៅពេលលោកចូលរួមក្នុងកិច្ចប្រជុំបូកសរុបលទ្ធផលយុទ្ធនាការចាក់វ៉ាក់សាំងកូវីដ ១៩ ជូនប្រជាពលរដ្ឋ កម្មករ និយោជិត និងជនបរទេសដែលមានអាយុ ១៨ ឆ្នាំឡើង ក្នុងខណ្ឌទាំង ៦ ក្នុងភូមិសាស្ត្ររាជធានីភ្នំពេញ នាព្រឹកថ្ងៃទី ១៤ ខែមិថុនា។
លោកបញ្ជាក់ថា៖ «ផែនការចាក់វ៉ាក់សាំងកូវីដ ១៩ តាមបណ្ដាខេត្តខាងមុខនេះ មានចំនួន ៥ ខេត្ត ដើម្បីបង្កើនភាពស៊ាំក្នុងប្រជាពលរដ្ឋ ឈានទៅទប់ស្កាត់ការឆ្លងរីករាលដាលនៃជំងឺកូវីដ ១៩ ក្នុងនោះមានខេត្តព្រះសីហនុ ខេត្តកំពង់ស្ពឺ ខេត្តតាកែវ ខេត្តកំពង់ចាម និងខេត្តស្វាយរៀង»។
លោក ឥត សារ៉ាត់ បានបន្ថែមថា សរុបចំនួនប្រជាពលរដ្ឋ កម្មករ-កម្មការិនី ដែលត្រូវចាក់វ៉ាក់សាំងក្នុងខេត្តទាំង ៥ នេះ មានចំនួន ១០ ២៤ ៤១២ នាក់ ក្នុងនោះកងទ័ពទទួលខុសត្រូវចាក់ចំនួន ៨៣៩ ២៩៤ នាក់ សុខាភិបាលបណ្ដាខេត្តទទួលខុសត្រូវចាក់ចំនួន ៤០០ ៧២៧ នាក់។
ជាមួយគ្នានោះ លោក ទៀ បាញ់ រដ្ឋមន្រ្តីក្រសួងការពារជាតិ ក៏បានប្រាប់អ្នកសារព័ត៌មាន បន្ទាប់ពីបញ្ចប់កិច្ចប្រជុំនេះថា យុទ្ធនាការចាក់វ៉ាក់សាំងជូនប្រជាពលរដ្ឋ នៅបណ្តាខេត្តទាំង ៥ នាពេលខាងមុខនេះ ខេត្តដែលនឹងត្រូវចាប់ផ្តើមចាក់មុនដំបូងគេ គឺនៅខេត្តព្រះសីហនុ នាថ្ងៃទី ២១ ខែមិថុនាតទៅ។
គួរបញ្ជាក់ផងដែរ មន្រ្តីរាជការ កងកម្លាំងប្រដាប់អាវុធគ្រប់ប្រភេទ និងក្រុមគ្រូពេទ្យជួរមុខ បានទទួលការចាក់វ៉ាក់សាំងរួចរាល់មុនពេលមានយុទ្ធនាការចាក់វ៉ាក់សំាងជូនប្រជាពលរដ្ឋ និងកម្មករ-កម្មការិនី។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ធ្លាប់បានលើកឡើងកាលពីថ្ងៃទី ៨ ខែមិថុនាថា លោកនាយករដ្ឋមន្ត្រី ហ៊ុន សែន សម្រេចដាក់ផែនការនៃការចាក់វ៉ាក់សាំងបង្ការវីរុសកូវីដ ១៩ របស់ក្រសួងសុខាភិបាល និងគណៈកម្មការចំពោះកិច្ច ទៅកាន់តំបន់នៃខេត្តមួយចំនួន ដែលមានហានិភ័យ និងមានកម្មករ-កម្មការិនីច្រើន បន្ទាប់ពីរាជធានីភ្នំពេញ។
លោកស្រីថា៖ «ការចាក់វ៉ាក់សាំងទៅតាមបណ្តាខេត្តនេះដែរ មិនមែននៅទូទាំងខេត្តទាំងអស់ទេ គឺក្រសួងនឹងរើសអាទិភាពទៅតាមទីតាំង ដែលជាទីតាំងមានការផ្ទុះច្រើន ហើយក៏ជាទីតាំងដែលមានហានិភ័យ និងជាខេត្តដែលមានកម្មករ កម្មការិនីរស់នៅទីនោះច្រើនដែរ»៕
