កោះកុងៈ គម្រោងរេដបូកតំបន់ជួរភ្នំក្រវាញតាមរយៈអង្គការសម្ព័ន្ធមិត្តសត្វព្រៃ (Wildlife Alliance) ប្រកាសផ្តល់ជំនួយថវិកាដែលជាការឆ្លើយតបបន្ទាន់ ដើម្បីសាងសង់ផ្លូវប្រវែង ៧ គីឡូម៉ែត្រ និងស្ពានមួយកន្លែងជូនដល់ប្រជាជននៅភូមិពោធិ៍បឹង ឃុំដងពែង ស្រុកស្រែអំបិល ខេត្តកោះកុង ដែលកំពុងជួបនូវការខ្វះខាត។
អង្គការសម្ព័ន្ធមិត្តសត្វព្រៃបានថ្លែងក្នុងសេចក្តីប្រកាសព័ត៌មាន កាលពីថ្ងៃទី ១៦ ខែមិថុនាថា៖ «គម្រោងរេដបូកតំបន់ជួរភ្នំក្រវាញ តាមរយៈអង្គការសម្ព័ន្ធមិត្តសត្វព្រៃ កំពុងប្រកាសផ្ដល់ជំនួយហិរញ្ញវត្ថុ ដើម្បីឆ្លើយតបទៅនឹងការប្រឈមនានា ផ្នែកជីវភាពរស់នៅរបស់ប្រជាពលរដ្ឋនៅភូមិពោធិ៍បឹង»។
សេចក្តីប្រកាសព័ត៌មានបន្តថា៖ «គម្រោងរេដបូកតំបន់ជួរភ្នំក្រវាញ កំពុងឆ្លើយតបទៅនឹងការអំពាវនាវតាមទូរស័ព្ទរបស់ប្រជាពលរដ្ឋភូមិពោធី៍បឹង (សារព័ត៌មានស៊ីអិនស៊ី ចុះថ្ងៃទី ១០ ខែមិថុនា ឆ្នាំ ២០២១) ស្នើសុំជំនួយដើម្បីសាងសង់ផ្លូវប្រវែង ៧ គីឡូម៉ែត្រ ដែលនៅខ្វះខាត និងស្ពានមួយកន្លែង»។
ពិធីប្រគល់ជំនួយនឹងប្រព្រឹត្តិទៅនៅថ្ងៃទី ២១ ខែមិថុនា នៅសាលាឃុំដងពែង ស្រុកស្រែអំបិល។
សេចក្តីប្រកាសព័ត៌មានបញ្ជាក់ថា៖ «អង្គការសម្ព័ន្ធមិត្ដសត្វព្រៃ តំណាងឲ្យគម្រោងរេដបូកតំបន់ជួរភ្នំក្រវាញ នឹងប្រគល់ជំនួយដោយផ្ទាល់ ដើម្បីឲ្យការសាងសង់ផ្លូវបានរួចរាល់ ហើយនឹងពិភាក្សាជាមួយអាជ្ញាធរមូលដ្ឋាន ដើម្បីរៀបចំកម្មវិធីនៃផែនការកសាងស្ពាន សាលារៀន និងមណ្ឌលសុខភាព»។
អង្គការសម្ព័ន្ធមិត្ដសត្វព្រៃ បានចុះសិក្សាផ្នែកសេដ្ឋកិច្ច-សង្គមនៅភូមិពោធិ៍បឹង កាលពីខែវិច្ឆិកា ឆ្នាំ ២០២០ ព្រមទាំងបានរួមគ្នាជាមួយមេភូមិ និងមេឃុំ និងបានធ្វើការកំណត់ពីតម្រូវការ ដែលបន្ទាន់ជាងគេក្នុងការជួយលើកកំពស់ជីវភាពរស់នៅរបស់ប្រជាពលរដ្ឋ គឺការកសាងបង្ហើយផ្លូវពីពោធិ៍បឹង ទៅកាន់ទីរួមស្រុកស្រែអំបិល ដើម្បីឲ្យប្រជាពលរដ្ឋអាចដឹកជញ្ជូនផលិតផលកសិកម្មរបស់ខ្លួនទៅកាន់ផ្សារស្រែអំបិលបាន។
សេចក្តីប្រកាសព័ត៌មានបញ្ជាក់ថា៖ «ស្ថានភាពបច្ចុប្បន្ននៃផ្លូវមានលក្ខណៈពិបាក ដែលត្រូវចំណាយពេលជាច្រើនម៉ោង ទើបទៅដល់ទីរួមស្រុកស្រែអំបិល» ។
គម្រោងរេដបូកតំបន់ជួរភ្នំក្រវាញ ត្រូវបានរៀបចំឡើង ដោយក្រសួងបរិស្ថាន និងអង្គការសម្ព័ន្ធមិត្ដសត្វព្រៃមានគោលបំណងដើម្បីបានជាប្រយោជន៍សម្រាប់ជួយលើកកំពស់ជីវភាពរស់នៅរបស់ប្រជាពលរដ្ឋមូលដ្ឋាន។
គម្រោងនេះ ក៏មានគោលបំណង ដើម្បីរក្សាការពារព្រៃឈើឲ្យនៅគង់វង្ស ដោយសារតែព្រៃឈើ គឺជាកន្លែងស្ដុកកាបូនសម្រាប់លក់ និងដើម្បីនាំប្រាក់ចំណូល ជូនរាជរដ្ឋាភិបាលកម្ពុជា ។
អ្នកទិញឥណទានកាបូនព្រៃឈើ នៃតំបន់ជួរភ្នំក្រវាញ គឺមកពីទ្វីបអឺរុប និងអាមេរិក ហើយការលក់បានចាប់ផ្ដើមតាំងពីខែមករា ឆ្នាំ២០១៩។
សេចក្តីប្រកាសព័ត៌មានបញ្ជាក់ថា ជំនួយនាពេលនេះ ជូនប្រជាពលរដ្ឋភូមិពោធិ៍បឹង គឺជាលទ្ធផលផ្ទាល់នៃការលក់ឥណទានកាបូនព្រៃឈើជួរភ្នំក្រវាញ ទៅឲ្យក្រុមហ៊ុនអន្ដរជាតិ ដែលទិញពិន្ទុឥណទានស្រូបកាបូន ជាថ្នូរនឹងការបំភាយឧស្ម័នកាបូនិច។
បើតាមសេចក្តីប្រកាសព័ត៌មានប្រជាពលរដ្ឋនៅតំបន់ជួរភ្នំក្រវាញ កំពុងតែធ្វើការដោយមានភ្ជាប់ចំណងផ្ទាល់ជាមួយក្រុមហ៊ុននានា នៅឯក្រៅប្រទេស ដើម្បីទប់ស្កាត់ឥទ្ធិពលនៃការប្រែប្រួលអាកាសធាតុសកល។
លោកស្រី Claire Baker-Munton មន្ត្រីផ្នែកទំនាក់ទំនង របស់អង្គការសម្ព័ន្ធមិត្ដសត្វព្រៃ មិនអាចទាក់ទងដើម្បីសុំការបញ្ជាក់បន្ថែមបានទេ៕