ភ្នំពេញៈ ខេត្តចំនួន ២១ ក្នុងចំណោមខេត្តទាំង ២៤ នៅទូទាំងប្រទេស បានទទួលថវិកាសរុបជិត ៣ ០០០ លានរៀល ពីនាយករដ្ឋមន្រ្តី ហ៊ុន សែន សម្រាប់ជួយក្នុងការរៀបចំនិងផ្គត់ផ្គង់ទៅដល់អ្នកកំពុងធ្វើចត្តាឡីស័កជិត ១ សែននាក់។
យោងតាមរបាយការណ៍របស់ក្រសួងសុខាភិបាលនៅថ្ងៃទី ២២ ខែមិថុនា បានឱ្យដឹងថា លោកនាយករដ្ឋមន្រ្តីបានផ្តល់ថវិកាបន្ថែមទៅដល់បណ្តាខេត្តសម្រាប់ត្រៀមពីថ្ងៃទី ២១ ដល់ថ្ងៃទី ២៧ ខែមិថុនា ដែលមានថវិកាសរុបចំនួន ២ ៧២០ លានរៀល ដើម្បីធ្វើការផ្គត់ផ្គង់អ្នកកំពុងធ្វើចត្តាឡីស័កចំនួន ៩៥ ១៦៣ នាក់។
នៅក្នុងខេត្តចំនួន ២៤ នេះ មានខេត្តចំនួន ៣ ដែលមិនត្រូវបានផ្តល់ថវិកាបន្ថែមដោយសារអ្នកកំពុងធ្វើចត្តាឡីស័កនៅមានចំនួនតិច និងមានសល់ថវិកាច្រើនសម្រាប់ចាត់ចែងដែលក្នុងនោះមានខេត្តកោះកុង ដែលមានអ្នកកំពុងធ្វើចត្តាឡីស័កចំនួន ៤៥ នាក់ ខេត្តស្ទឹងត្រែងមានចំនួន ៤៥ នាក់ និងខេត្តមណ្ឌលគិរី មិនមានអ្នកកំពុងធ្វើចត្តាឡីស័កទេ។
លោកនាយករដ្ឋមន្រ្តីផ្តល់ថវិកាបន្ថែមនេះ គឹមានចាប់ពី ១០ លានរៀលរហូតដល់ ៣៥០ លានរៀល។
របាយការណ៍ដដែលបានបញ្ជាក់ថា៖ «ខេត្តបាត់ដំបង បានទទួលថវិកាបន្ថែមច្រើនជាងគេ រហូតដល់ ៣៨០ លានរៀល ដែលមានអ្នកកំពុងធ្វើចត្តាឡីស័កចំនួន ២ ៣១០ នាក់, ខេត្តកំពង់ស្ពឺ ទទួលបានថវិកាបន្ថែមចំនួន ៣៥០ លានរៀល ដែលមានអ្នកកំពុងធ្វើចត្តាឡីស័កចំនួន ១ ៨១០ នាក់, ខេត្តបន្ទាយមានជ័យ ទទួលបានថវិកាបន្ថែមចំនួន ២៩០ លានរៀល ដែលមានអ្នកកំពុងធ្វើចត្តាឡីស័កចំនួន ១ ៨១៩ នាក់»។
កាលពីសប្តាហ៍មុន លោកនាយករដ្ឋមន្រ្តីបានផ្តល់ថវិកាបន្ថែមជាង ២ ០០០ លានរៀល ដល់ខេត្ត ចំនួន ២៤ ដើម្បីជួយ និង ផ្គត់ផ្គង់ទៅដល់ ប្រជាពលរដ្ឋ ដែលកំពុងធ្វើចត្តាឡីស័កជិង ១០ ម៉ឺននាក់ផងដែរ៕