ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជក់ជាថ្មីថា ប្រធានក្រុមហ៊ុននិងបុគ្គលិកចំនួន ៦ នាក់រួមនឹងរដ្ឋលេខាធិការក្រសួងម្នាក់ត្រូវបានដកចេញពីគម្រោងជាផ្លូវការ បន្ទាប់ពីរកឃើញកំហុសបច្ចេកទេសនៃការសាងសង់កំណាត់ផ្លូវជាតិលេខ ៣ (កំពត-វាលរេញ) ដោយលោកបានអះអាងថា ការសាងសង់ផ្លូវមិនអាចធ្វើតាមទឹកលុយដោយមិនគោរពតាមស្តង់ដាបច្ចេកទេសនោះទេ។
ការប្រកាសអះអាងយ៉ាងដូច្នេះបានធ្វើឡើងក្នុងអំឡុងពេលលោកបានដឹកនាំគណៈប្រតិភូគណៈកម្មការទី៩ នៃរដ្ឋសភា និងក្រុមការងារចុះពិនិត្យការដ្ឋានសាងសង់ផ្លូវជាតិលេខ ៣ កំពត-វាលរេញ នៅថ្ងៃទី ២២ មិថុនា ឆ្នាំ ២០២១។
ក្នុងឱកាសនោះ លោក ស៊ុន ចាន់ថុល បានអះអាងថា៖ «នៅពេលយើងចុះត្រួតពិនិត្យ ការស្តារ ការជួសជុលផ្លូវនេះ យើងឃើញកង្វះខាតមួយចំនួនចំពោះក្រុមហ៊ុន KCI ដែលជាក្រុមហ៊ុនផ្តល់ការប្រឹក្សាក្នុងការត្រួតពិនិត្យគុណភាពលើអ្នកសាងសង់។ដោយមើលឃើញពីការធ្វេសប្រហែសរបស់គាត់ ក្រសួងបានដកប្រធានក្រុមហ៊ុន KCI និងបុគ្គលិក ៦នាក់ចេញ ព្រោះមិនបានតាមដានការងារឲ្យបានលម្អិតឲ្យខ្ញុំ»។
ក្រៅពីនោះ លោក ស៊ុន ចាន់ថុល បានអះអាងទៀតថា រដ្ឋលេខាធិការម្នាក់ដែលទទួលបន្ទុកត្រួតពិនិត្យផ្លូវនេះ ក៏ត្រូវបានផ្លាស់ប្តូរចេញដើម្បីជំនួសមន្ត្រីមានបច្ចេកទេសថ្មីផងដែរ ខណៈដែលលោកមិនអាចទទួលយកបានចំពោះការសាងសង់ផ្លូវដោយមិនត្រឹមត្រូវ និងមិនមានការយកចិត្តទុកដាក់។
លោកបានបន្ថែមថា៖ «ឯកឧត្តមរដ្ឋលេខាធិការម្នាក់ ក៏លែងឲ្យគាត់មើលដែរ ខ្ញុំឲ្យឯកឧត្តម ខាន់ ម៉ាណេរ មកជំនួសវិញ ដើម្បីតាមដានឲ្យលម្អិតមែនទែនក្នុងការសាងសងដងផ្លូវនេះ។នៅពេលយើងពិនិត្យមើលទៅ នៅសល់ជាង ២០ គីឡូម៉ែត្រនេះ មិនអាចធ្វើសើៗធ្វើពីមុខ ខូចក្រោយ ធ្វើពីក្រោយខូចមុខទេ យើងត្រូវតែរៀបចំនីតិវិធីថ្មីហើយរកថវិកាឲ្យបានគ្រប់គ្រាន់»។
បើតាមលោក ស៊ុន ចាន់ថុល ការដែលក្រសួងសម្រេចបញ្ចប់តួនាទីរបស់ពួកគេក្នុងគម្រោងសាងសង់ផ្លូវនេះ ក៏ព្រោះតែបានរកឃើញថា ផ្លូវជាង ៥ គីឡូម៉ែត្រ ក្នុងចំណោមផ្លូវដែលសាងសង់បន្តប្រមាណ ២០ គីឡូម៉ែត្រគឺមានដីស្អុយនៅពីក្រោម ដែលធ្វើឲ្យគុណភាពផ្លូវ មិនរឹងមាំនិងធន់នោះទេ។
បន្ថែមពីនេះលោកបានអះអាងទៀតថា ប្រសិនបើក្នុងករណីជំនួយថវិកាសាងសង់ផ្លូវនីមួយៗដែលទទួលបានពីម្ចាស់ជំនួយមិនគ្រប់គ្រាន់សម្រាប់ឲ្យអ្នកបច្ចេកទេសអាចសាងសង់ប្រកបដោយគុណភាពនោះក្រសួងនឹងស្វែងរកថវិកាបន្ថែមទៀតសម្រាប់ជួសជុលដោយមិនអាចទទួលបានទេចំពោះការសាងសងផ្លូវតាមទឹកលុយហើយមិនស្របតាមបច្ចេកទេស។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបានប្រាប់ ភ្នំពេញ ប៉ុស្តិ៍ នៅថ្ងៃទី ២២ មិថុនាថា ជាធម្មតាបើក្រុមហ៊ុនមិនបានអនុវត្តតាមលក្ខខណ្ឌបច្ចេកទេសដែលបានឯកភាពព្រមព្រៀង នោះគឺប្រឈមទៅនឹងចំណាត់របស់ក្រសួងហើយ។ លោកជឿថា ការបោះជំហានទៅរកតម្លាភាព និងគុណភាព គឺពិតជាផ្តល់ប្រយោជន៍ធំធេងណាស់ចំពោះប្រទេសជាតិ និងប្រជាពលរដ្ឋ។
លោក បញ្ជាក់ថា៖ «ជាការពិតណាស់ដើម្បីទប់ស្កាត់ការស្លាប់និងរបួសធ្ងន់ធ្ងរបង្កដោយគ្រោះថ្នាក់ចរាចរណ៍ចាំបាច់ត្រូវមានផ្លូវដែលមានគុណភាពនិងប្រព័ន្ធបរិក្ខារ បន្ធូរបន្ថយភាពធ្ងន់ធ្ងរនៃការបុកប៉ះ ហើយក៏ត្រូវមានអ្នកបើកបរដែលមានសមត្ថភាពនិងឥរិយាបថបើកបរសុវត្ថិភាព បូករួមជាមួយយានយន្តដែលមានប្រព័ន្ធសុវត្ថិភាពដំណើរការល្អប្រសើរផងដែរ»។
បើតាមក្រសួងសាធារណការ និងដឹកជញ្ជូន កំណាត់ផ្លូវជាតិលេខ ៣ ចេញពីកំពត-វាលរេញប្រវែង ២០ គីឡូម៉ែត្រ ត្រូវបានរដ្ឋាភិបាលអនុញ្ញាតឲ្យក្រុមហ៊ុនជំនាញសិក្សាជាថ្មី ដើម្បីកាយស្តារគ្រឹះជួសជុលឡើងវិញហើយគ្រោងនឹងបញ្ចប់ការសិក្សានៅចុងឆ្នាំ ២០២១ នេះ និងស្វែងរកកញ្ចប់ថវិកាប្រមាណ ៦០ លានដុល្លារបន្ថែម ដើម្បីសាងសង់ឲ្យត្រូវតាមស្តង់ដា និងរឹងមាំបានយូរ៕
វីដេអូ៖